Van ons lesers
Braille Veels geluk met die artikel “Louis Braille—Bring lig na gevangenes van die duisternis” (8 September 2000). Die hoof van die skool waar ek werk, het ’n gesigsgebrek. Hy was baie beïndruk toe ek die artikel vir hom gelees het. ’n Eksemplaar van die tydskrif is in die skoolbiblioteek geplaas.
M.A.S., Brasilië
Bepeinsing Ek wil julle graag bedank vir die artikel “Die Bybelse beskouing: Bepeinsing wat voordelig is” (8 September 2000). Ek besef nou dat ek dagdromery met bepeinsing verwar het. Aangesien ek Filippense 4:8 toepas, weet ek nou hoe om op die regte manier oor my probleme na te dink. Baie dankie!
W. P., Pole
Bewers Ek is 15 jaar oud en wil vir julle dankie sê vir die artikel “Die oorspronklike houtkapper is nog aan die werk” (8 September 2000). Ek geniet dit om te lees van diere en hoe hulle leef. Maar ek het nooit geweet dat bewers soveel kan doen nie! Ek dink dit is ongelooflik hoe hulle vir hulleself en hulle gesin sorg!
S. J., Verenigde State
Ek is tien jaar oud, en ek het die artikel gelees terwyl ek by ’n spruit gekampeer het. Ek kon my net voorstel hoe die bewers daar sou moes werk. Ek geniet die artikels oor diere, want dit help my om al die wonderlike dinge wat Jehovah gemaak het, te waardeer.
B. P., Verenigde State
Onduidelike wiskunde? Ek wil graag ’n klein foutjie, na my mening, onder julle aandag bring in die artikel “Die soeke na ’n volmaakte samelewing” (22 September 2000). Julle het gesê dat dit 26 jaar sal neem om 200 bundels met duisend bladsye elk deur te lees. Volgens my berekeninge, sal dit minder as vier jaar neem.
P. I., Roemenië
Dankie vir jou opmerking. Hoewel 200 verhalende bundels met duisend bladsye elk weliswaar baie minder tyd sal neem om deur te lees, bestaan die inligting wat deur die Menslike Genoomprojek ingesamel is uit die volgordes van DNS, wat baie meer vermoeiend en tydrowend sal wees om te lees.—RED.
Ek dink julle het ’n algemene fout begaan in die artikel “Wat die blote oog nie kan sien nie” (22 Augustus 2000). Daar het julle van mikroskope gepraat wat voorwerpe ’n miljoen keer kan vergroot, “soos om ’n posseël tot die grootte van ’n klein land te vergroot”. Eenmiljoen posseëls sal op ’n vierkant pas waarvan die sye 1 000 X 1 000 seëls is. Gestel ’n seël is 2,5 X 2,5 sentimeter, dan sal dit ’n vierkant bedek waarvan die sye ongeveer 25 meter elk is. Ek dink nie ’n mens sal enige land kry wat so klein is nie!
R. C., Verenigde State
Pleks van te dink dat ’n seël vergroot word tot ’n vierkant van 1 000 x 1 000 seëls, moet jy jou ’n groepering van ’n 1 000 000 x 1 000 000 seëls voorstel, aangesien vergroting lineêr is. Dit sal naastenby die grootte van ’n klein eiland wees.—RED.
Veilige lugvaart Net ’n briefie om julle te bedank vir die artikel “Lugvaart word veiliger gemaak” (22 September 2000). Ek hou baie daarvan om te vlieg, maar nadat ek hierdie artikel gelees het, besef ek hoeveel werk en tyd dit verg om vlieëniers, met ons veiligheid in gedagte, op te lei.
E. P., die Maagde-eilande
Maerheid Toe ek die artikel “Jongmense vra . . . Waarom is ek so maer?” (22 September 2000) sien, het my oë vol trane geword. Ek is 16 en weeg 45 kilogram. Omdat ek so maer is, het ek lelik en onaantreklik gevoel. Toe ek die artikel lees, het ek die praktiese wenke daarin waardeer. Die slot het my die meeste geraak omdat dit my laat besef het dat Jehovah die hart raaksien.
E. L., Italië