Dwelmmisbruik—Daar is ’n oplossing!
“GROOT besending kokaïen in wynbottels gevind.” Die koerantartikel onder hierdie opskrif het verduidelik hoe die polisie in Johannesburg beslag gelê het op ’n skeepshouer met 11 600 bottels Suid-Amerikaanse wyn. Die wyn is met tussen 150 en 180 kilogram kokaïen gemeng. Dit is glo die grootste besending kokaïen wat nog in die land ingekom het.
Hoewel sulke onderskeppings bemoedigend klink, is die waarheid dat die polisie net op ongeveer 10 tot 15 persent van die wêreld se dwelms beslag lê. Ongelukkig is dit dieselfde as ’n tuinier wat ’n paar blare van ’n skadelike onkruid afsny, maar die wortels in die grond los.
Die groot winste wat uit dwelms gemaak word, belemmer regerings se pogings om die vervaardiging en verkope daarvan te beëindig. In die Verenigde State alleen het die onwettige handel in dwelms ’n jaarlikse omset van miljarde rande. Met soveel geld op die spel, is dit nie verbasend dat polisie- en staatsamptenare, selfs party in hoë posisies, hulle aan korrupsie skuldig maak nie.
Alex Bellos van The Guardian Weekly het uit Brasilië berig dat daar volgens ’n parlementêre ondersoek “drie kongreslede, 12 staatsafgevaardigdes en drie burgemeesters se name genoem is . . . op ’n lys van meer as 800 mense wat na bewering by georganiseerde misdaad en dwelmhandel in Brasilië betrokke is”. Op die lys is daar ook “polisiemanne, regsgeleerdes, sakemanne en boere in 17 van die 27 state”. ’n Professor van politiek aan die Universiteit van Brasília het oor hierdie bevindinge gesê: “Dit is ’n geweldige aanklag teen alle sektore van die Brasiliaanse samelewing.” Dieselfde kan van baie samelewings gesê word waar dwelms ’n sterk houvas het. Die markbeginsel van vraag en aanbod verleen stukrag aan die probleem.
Weens die beperkte sukses van wetlike beperkings, sê party dat sekere dwelms wettig verklaar moet word. Die algemene idee is dat individue toegelaat moet word om klein hoeveelhede vir persoonlike gebruik te besit. Hulle meen dat dit regeringsbeheer makliker sal maak en die groot winste van dwelmbase sal sny.
Party is suksesvol
Detoksifikasie kan verslaafdes eerstens help om uit die greep van dwelms te kom en kan hulle fisiese gesondheid verbeter. Ongelukkig is die kanse groot dat ’n verslaafde weer in die versoeking sal kom om dwelms te gebruik sodra hy na sy gewone omgewing terugkeer. Die skrywer Luigi Zoja gee die rede hiervoor: “Dit is onmoontlik om eenvoudig ’n gedragswyse te verander sonder om die pasiënt te help om ’n heeltemal nuwe denkwyse te ontwikkel.”
Darren, wat in die vorige artikel genoem is, het ’n “nuwe denkwyse” gevind wat sy lewe verander het. Hy verduidelik: “Ek was ’n verklaarde ateïs, maar selfs al het ek van die oggend tot die aand dwelms gebruik, het ek mettertyd tot die besef gekom dat daar ’n God moet wees. Oor ’n tydperk van twee of drie maande het ek van dwelms probeer wegbreek, maar my vriende wou niks weet dat ek weier nie. Hoewel ek nog steeds dwelms gebruik het, het ek die Bybel gereeld begin lees voor ek bed toe gegaan het. Ek het minder met my vriende geassosieer. Een aand het ek en my kamermaat baie ‘hoog’ geraak op dwelms. Ek het vir hom iets gesê van die Bybel. Die volgende oggend het hy sy broer, wat een van Jehovah se Getuies is, gebel. Hy het ons vertel van ’n Getuie wat in dieselfde stad as ons gewoon het, en ek het hom gaan besoek.
“Ons het tot 11:00 nm. gesels, en ek is daar weg met omtrent 12 Bybelstudiehulpe. Ek het die Bybel saam met hom begin studeer en het opgehou om dwelms te misbruik en te rook. Omtrent nege maande later is ek as een van Jehovah se Getuies gedoop.”
Dit is nie maklik om dwelms te los nie. Michael, wat in die vorige artikel genoem is, vertel van die probleme wat hy gehad het toe hy ná 11 jaar van dwelmmisbruik, opgehou het: “Ek het dit baie moeilik gevind om te eet en het dus gewig verloor. Ek het tintelende sensasies gekry, in sweet uitgeslaan en het ’n aura om mense gesien. Die drang om weer dwelms te begin gebruik, was geweldig sterk, maar om na aan Jehovah te kom deur gebed en Bybelstudie het my gehelp om dit te vermy.” Hierdie voormalige dwelmslawe stem saam dat dit noodsaaklik was om heeltemal weg te breek van hulle vorige vriende.
Waarom mensepogings onsuksesvol is
Die misbruik van dwelms is net een faset van ’n groter wêreldwye probleem. Die hele wêreld is in die greep van ’n oorweldigende invloed van boosheid, geweld en wreedheid. Die Bybel sê: “Die hele wêreld lê in die mag van die bose” (1 Johannes 5:19). Die “bose” word deur die apostel Johannes in Openbaring 12:9 geïdentifiseer: “Toe is die groot draak neergeslinger, die oorspronklike slang, die een wat Duiwel en Satan genoem word, wat die hele bewoonde aarde mislei; hy is na die aarde neergeslinger, en sy engele is saam met hom neergeslinger.”
Benewens die mens se eie swakhede moet hy teen hierdie magtige vyand stry. Dit was Satan wat aan die begin die mens se ondergang veroorsaak het. Hy is vasbeslote om die mensdom verder te verderf en hulle van God af weg te keer. Dit lyk of die mensdom se misbruik van dwelms ’n deel van sy strategie is. Hy het groot toorn omdat hy weet dat “hy ’n kort tydperk het”.—Openbaring 12:12.
Wat is God se oplossing?
Die Bybel openbaar die Skepper se liefdevolle voorsiening om die mensdom van sy sondige toestand te verlos. In 1 Korintiërs 15:22 word daar vir ons gesê: “Net soos almal in Adam sterf, só sal almal ook in die Christus lewend gemaak word.” Jesus het gewillig as ’n volmaakte mens aarde toe gekom en sy aardse lewe opgeoffer om die mensdom van die gevolge van sonde en die dood los te koop.
Omdat mense uitgevind het waarom ons sterf en wat die oplossing vir die mens se probleme is, was dit vir baie ’n aansporing en het dit hulle die moed gegee om dwelms te los. Maar die Bybel help ons nie net nou individueel om die dwelmprobleem te bowe te kom nie. Dit voorspel ’n tyd, nadat Satan se invloed beëindig is, wanneer al die wêreld se euwels, insluitende dwelmmisbruik, vir goed tot ’n einde sal kom.
Die boek Openbaring beskryf “’n rivier van water van die lewe . . . , helder soos kristal, wat uit die troon van God en van die Lam uitvloei” (Openbaring 22:1). Hierdie simboliese rivier beeld God se voorsiening deur Jesus Christus af om die mensdom tot volmaakte lewe op ’n paradysaarde te herstel. Openbaring beskryf bome van die lewe wat langs die rivier floreer en sê: “Die blare van die bome was vir die genesing van die nasies” (Openbaring 22:2). Daardie simboliese blare beeld Jehovah se genesende voorsienings af om die mensdom tot geestelike en liggaamlike volmaaktheid te herstel.
Uiteindelik sal die mensdom vry wees, nie net van dwelmmisbruik nie, maar ook van al die ander euwels en probleme wat hulle in hierdie verdorwe stelsel teister!
[Venster/Prent op bladsy 9]
Hoe veilig is dagga?
’n Aantal lande oorweeg dit om dagga, hoofsaaklik vir geneeskundige gebruik, wettig te verklaar. Daar is gevind dat hierdie dwelm die naarheid verlig wat deur chemoterapie veroorsaak word, en dit help vigs-lyers om aptytverlies teë te werk. Dit is ook al as ’n pynstiller gebruik.
Hoewel daar nie eenstemmigheid oor die bevindinge van die navorsing is nie, het toetse wat in die tydskrif New Scientist verskyn het van die skadelike uitwerkings van daggagebruik bevestig.
’n Toets wat deur die Harvard-universiteit gedoen is, het ’n groep wat dagga daagliks gerook het, vergelyk met ’n groep wat dit minder gereeld gebruik het. Daar was min verskille in gewone verstandstoetse. Maar in een aanpasbaarheidstoets het strawwe daggagebruikers baie laer punte gekry.
’n Ander universiteit het ’n groep wat gereeld dagga gerook het en ’n groep sigaretrokers oor ’n tydperk van 15 jaar getoets. Die daggarokers het gewoonlik drie of vier keer per dag dagga gerook, terwyl die sigaretrokers 20 of meer sigarette per dag gehad het. Ewe veel van albei groepe het knaend gehoes en brongitis gekry. ’n Ondersoek van die longe het getoon dat daar in albei groepe soortgelyke selskade was.
Hoewel die daggarokers baie minder gerook het, is daar gevind dat een daggasigaret drie keer soveel teer as ’n sigaret vrystel. New Scientist het verder berig: “Daggarokers haal baie dieper asem en hou hulle asem langer in.”
Daarbenewens is daar bevind dat die immuunselle van die longe van daggarokers 35 persent swakker is om bakterieë te beveg as die selle van die sigaretrokers.
[Erkenning]
U.S. Navy photo
[Venster op bladsy 11]
“’n Pynlike aanklag” teen ouers
’n Hoofartikel in die koerant Saturday Star het kommer uitgespreek oor die onrusbarende toename in dwelmmisbruik onder jongmense in Suid-Afrika en gesê:
“Die feit dat ons kinders dit doen [dwelms gebruik], is dikwels ’n pynlike aanklag teen ons as ouers en teen die samelewing in die geheel. Week na week sloof ons ons af vir geld, aanbid ons by die tempel van materiële voorspoed. Ons kinders put ons verstand en ons krag uit. Kwaliteitstyd? Dit is maklik om vir hulle geld te gee om hulle uit die pad te kry. Dit is makliker as om na hulle te luister—na hulle vrese, hulle hoop, hulle probleme. Wanneer ons vanaand by ’n restauranttafel sit of voor die TV ontspan, sal ons dan weet wat hulle doen?”
Of, mag ons byvoeg, wat hulle dink?
[Prent op bladsy 10]
Baie is al beweeg om dwelms te los