Daar is oral helpende hande

BAXTER, ’n 15-jarige hoërskoolleerling, het ’n interessante manier waarop hy sy Saterdagmiddae deurbring. Hy besoek ’n groep bejaardes, speel musiek en hou saamsinggeleenthede by hulle ouetehuis. “Hy laat die inwoners lag, en hy vul hulle lewe met pret en vreugde”, sê Baxter se onderwyser. Lucille, wat 78 jaar oud is, verrig ’n soortgelyke weldaad. Sy deel kos uit onder die behoeftiges en besoek eensame hospitaalpasiënte. ’n Vriendin sê van Lucille: “As daar ’n behoefte is en sy kan help, sal sy daar wees.”

Wat is vrywilligerdiens?

Hierdie lewensbeskouing—‘Help wanneer daar ’n behoefte is’—word wêreldwyd onder etlike miljoene mense aangetref. Hulle reik ’n helpende hand uit op boupersele en in kantore, fabrieke, verpleeginrigtings, hospitiums, vlugtelingkampe, sentrums vir haweloses, brandweerstasies, krisissentrums, dierebeskermingsentrums, ensovoorts. Hulle is feitlik oral! Hulle gebruik hulle vaardighede vir take so uiteenlopend soos om ander te help om ’n huis te bou tot geldinsameling en van die vertroeteling van babas wat verwerp is tot die versorging van terminaalsiekes. Hulle is vrywilligers—mense wat ’n verskil maak in die lewe van behoeftiges.

Vrywilligerwerk is al beskryf as “’n edele gedagte wat in dade omgesit is”. Dit behels elemente soos verbondenheid tot ’n saak, ’n gees van selfopoffering, die afwesigheid van vergoeding en onbaatsugtige dade. “Vrywilligerdiens”, sê twee persone wat al lank vrywilligers is, is “om van onsself te gee: van ons tyd, ons hande en voete, ons idees, ons vermoë om iemand anders te help, ons vermoë om probleme op te los, ons professionele kennis”. Dit is interessant dat die vrywilligers self ook by sulke onbaatsugtigheid baat vind.—Sien die venster “Vrywilligers vind ook baat”.

Meer vrywilligers—meer hulp nodig

In die Verenigde State doen ongeveer 100 miljoen mense vrywilligerwerk—en hulle getalle bly toeneem. “Ons organisasie hou aan om teen ’n geweldige tempo te groei”, het Kathleen Behrens, uitvoerende direktrise van die vrywilligersorganisasie New York Cares, onlangs vir Ontwaak! gesê. “Verlede jaar alleen het ons meer as 5 000 nuwe vrywilligers gehad wat by ons program aangesluit het.” Vrywilligersgroepe in Europa ondervind soortgelyke groei. In Frankryk het die aantal vrywilligers byvoorbeeld gedurende die laaste twee dekades elke jaar met 6 persent toegeneem. Maar die behoefte aan meer vrywilligers het nie afgeneem nie. Inteendeel, Verenigde Nasies-vrywilligers (’n VN-agentskap) sê dat daar regoor die wêreld “vandag meer vrywilligers nodig is as ooit tevore”. ’n Museumkurator sê: “Vrywilligers is ons lewensbloed.”

Maar daar is ’n paradoks. Hoewel baie direkteure, bestuurders en koördineerders wat met vrywilligers werk, meen dat hulle “hulle gewig in goud werd is”, ontvang baie van die werk wat die vrywilligers doen, geen erkenning nie. Om daardie situasie te begin verander, het die Verenigde Nasies besluit om die jaar 2001 te gebruik as ’n tyd om die kollig op vrywillige werkers te werp. Die venster “Internasionale jaar van vrywilligers” beskryf party van die doelwitte wat die VN hoop om te bereik.

Intussen vind daar veranderinge plaas in die wêreld van vrywilligerdiens wat ’n uitdaging bied vir vrywilligers sowel as diegene wat hulle werk koördineer. Daar is nietemin nog steeds baie mense regoor die wêreld wat gewillig is om ’n verskil te maak. Wat motiveer hulle om dit te doen? Wat bereik hulle? En hoe kan hulle jou lewe raak?

[Venster/Prent op bladsy 4]

Vrywilligers vind ook baat

“Om na ander uit te reik, het ’n dieper, betekenisvoller en baie genotvoller beloning meegebring as wat ek kon bereik het deur aan te hou om my uitsluitlik op my sakeloopbaan toe te spits”, sê Michael, ’n deeltydse vrywilliger. Michael is nie alleen nie. Sharon Capeling-Alakija, uitvoerende koördineerder van Verenigde Nasies-vrywilligers, sê: “Regoor die wêreld is mense wat . . . vrywilligerdiens doen, ten volle bewus van hoeveel hulle by die ondervinding baat vind.” Dr. Douglas M. Lawson, ’n kenner op die gebied van vrywilligerwerk, bevestig dat navorsers gevind het dat “’n persoon se algemene fisiologiese toestand en sielkundige welsyn gedurende net ’n paar uur van vrywilligerdiens so verbeter dat hulle daarna verwys as ‘Die Helper-euforie’”. En “helper-euforie” is geensins ’n kortstondige gevoel nie. Navorsers by die Cornell-universiteit in die Verenigde State het meer as 30 jaar lank ’n groep mense aan ’n studie onderwerp en het gevind dat “diegene wat vrywilligerdiens gedoen het, gelukkiger en gesonder was as diegene wat dit nie gedoen het nie”. Die Bybel sê interessant genoeg: “Dit verskaf groter geluk om te gee as om te ontvang.”—Handelinge 20:35; Spreuke 11:25.

[Venster/Prent op bladsy 5]

Internasionale jaar van vrywilligers

Op 20 November 1997 het die Algemene Vergadering van die Verenigde Nasies aangekondig dat die jaar 2001 die “Internasionale jaar van vrywilligers” (IJV 2001) gaan wees. Volgens die VN is daar vier doelwitte wat hulle gedurende die jaar wil bereik.

Groter erkenning Regerings word aangemoedig om die belangrikheid van vrywilligers te erken deur hulle prestasies te ondersoek en te boekstaaf en deur toekennings te gee vir uitstaande vrywilligerwerk.

Vergemakliking Lande word aangespoor om vrywilligerdiens aan te moedig deur byvoorbeeld vrywilligerdiens as ’n alternatief vir diensplig te aanvaar of sekere belastingvrystellings toe te ken.

Netwerkvorming Die media word gevra om meer te help deur suksesverhale van vrywilligerwerk bekend te maak. Sulke projekte kan dus herhaal word, “wat dit onnodig sal maak vir elke plaaslike gemeenskap om die wiel van voor af uit te vind”.

Promosies Vrywilligersorganisasies word aangemoedig om uitstallings te reël om die publiek in te lig oor hoe daardie gemeenskap by vrywilligerwerk baat vind.

Die VN hoop dat IJV 2001 sal lei tot ’n groter aanvraag na die dienste van vrywilligers, meer persone wat hulle beskikbaar stel vir vrywilligerdiens en meer fondse en fasiliteite vir vrywilligersorganisasies om die samelewing se groeiende behoeftes aan te pak. Altesaam 123 regerings het hulle gesamentlike ondersteuning gegee om die doelwitte van hierdie VN-resolusie te bereik.