Milaan en Turyn—Fassinerende stede om te besoek

DEUR ONTWAAK!-MEDEWERKER IN ITALIË

’N BESOEK aan Italië kan ’n genotvolle ondervinding wees. Die kos, die wyn, die natuurskoon, die geskiedenis, die kultuur, die musiek, die taal—dra alles daartoe by om hierdie land onvergeetlik te maak. Dié somer sal moontlik ’n goeie tyd wees om deur hierdie stede te toer, veral vir diegene wat uitgenooi is om een van die streekbyeenkomste van Jehovah se Getuies by te woon wat daar gehou gaan word. Kom ons neem jou nou op ’n kort toer van twee merkwaardige Italiaanse stede en hulle streke.

Milaan—Die ware hoofstad van Italië?

Wat sakebedrywighede en nywerhede betref, word Milaan dikwels as die ware hoofstad van Italië beskou. In vergelyking met ander Italiaanse stede is dit nie so goed bekend vir sy oudhede en kuns nie. Hier oorheers die moderne oor die antieke. Milaan is nietemin die tuiste van uitstekende kunswerke en argitektuur wat van ’n eeue-oue verlede getuig.

Ongeveer 600 v.G.J. het die Galliërs, ’n ou Keltiese volk van die gebied wat nou as Frankryk bekend staan, hulle in hierdie streek gevestig. In 222 v.G.J. het die Romeine die stad verower en dit die verlatynse naam Mediolanum, nou Milaan, gegee. Deur die eeue heen was die Italiaanse skiereiland ’n verdeelde en verowerde land, en dit het eers in die tweede helfte van die 19de eeu onafhanklik geword. Milaan is dus herhaaldelik deur invallers aangeval. Onder diegene wat hierdie gebied ingeneem het, was die Lombarde, wat waarskynlik uit Skandinawië gekom het. Hulle het hulle naam aan Lombardye gegee, die streek waarvan Milaan die hoofstad is.

Kom besoek die stad

Die geskiedenis van Milaan, soos dié van die res van Italië, word deur die Katolieke Kerk oorheers. Dit is dus geen wonder nie dat die katedraal daar die derde grootste kerk in Europa en een van die grootste Gotiese kerke in die wêreld is. Dit is omtrent 150 meter lank, het verskeie torings en meer as 3 000 standbeelde en drakekopspuiers. Die bouwerk daaraan het in 1385 begin en het vyf eeue geneem om te voltooi. Wanneer Italianers vandag praat van ’n werk wat sloer, sê hulle dat dit is soos om “die katedraal te bou”.

Lesers van die Bybel sal dit interessant vind om God se naam, in die vorm “Jahve”, hoog bo in ’n Gotiese venster van die katedraal se voorkant te sien. Die buitekant van die voorgewel is versier met verskeie voorstellings van Bybeltonele.

Die Castello Sforzesco is een van die geboue wat ’n simbool van die stad geword het. Dit is in die 15de eeu deur die Sforza-familie, die heersers van Milaan, gebou. Vandag huisves dit ’n aantal museums. Een bekende kamer bevat fresko’s wat party sê deur Leonardo da Vinci, die beroemde kunstenaar en wetenskaplike, geskilder is.

Onder da Vinci se bekendste skilderwerke is ’n fresko in die 15de-eeuse Renaissance-klooster van Santa Maria delle Grazie. Dit beeld Jesus uit in wat algemeen die Laaste Avondmaal genoem word en word beskou as een van die bekendste van alle Renaissance-skilderwerke. Die Pinacoteca di Brera, nog ’n museum, bevat een van die grootste Italiaanse versamelings van skilderye deur beroemde kunstenaars soos Bellini, Raphael, Tintoretto en Caravaggio.

Bybelstudente sal die Pinacoteca Ambrosiana, wat ’n biblioteek en kunsgalery is, interessant vind. Daar kan ’n mens die Muratori-fragment vind, ’n Latynse katalogus van die Christelike Griekse Geskrifte wat van die einde van die tweede eeu G.J. dateer. Dit help om die indeling van die kanon van die “Nuwe Testament” te bevestig.a

In dieselfde biblioteek is ’n kodeks wat Ambrosianus O 39 sup. genoem word en van die einde van die negende eeu G.J. dateer, waarin die Goddelike naam met die tetragrammaton weergegee word wat in vierkantige Hebreeuse karakters geskryf is, soos die New World Translation of the Holy Scriptures—With Referencesb verduidelik. Die biblioteek bevat ook ander ou vertalings van die Bybel en die Atlantiese Kodeks, asook ’n versameling van meer as 2 000 tekeninge en wetenskaplike aantekeninge wat Leonardo da Vinci gemaak het.

’n Nuttige wenk vir besoekers om te onthou, is dat baie museums en biblioteke in ou geboue is, wat besonders mooi is, maar gou stampvol raak weens vandag se immertoenemende toeloop van toeriste. In baie gevalle moet besprekings vooruit gedoen word, en party museums beperk die duur van besoeke.

Voordat musiekliefhebbers die ou deel van die stad verlaat, wil hulle dalk die buitekant sien van La Scala, een van die bekendste operageboue in die wêreld. Selfs as ’n besoeker nie ’n opera kan bywoon nie, kan hy ’n toer van die museum doen, waar baie aandenkings van musikante en beroemde sangers uitgestal word.c

’n Toer van die moderne deel van Milaan, een van die rykste stede in Europa, met sy wolkekrabbers en sportstadion sal jou ’n geheelbeeld van die stad gee. Jy sal die verskeidenheid, prag en lang geskiedenis van Milaan kan waardeer. Besoekers wat daarvan hou om inkopies te doen en na besienswaardighede te kyk, sal dit geniet om die groot Galleria Vittorio Emanuele II te besoek, met sy pragtige glasplafon en koepel.

Jy sal bly wees dat jy Milaan besoek het! Maar kom ons reis nou weswaarts en besoek nog ’n unieke stad van Italië.

Turyn—nog een van Italië se juwele

Turyn, ’n stad met ’n bevolking van omtrent ’n miljoen mense, is geleë op die nouste punt van die Povallei, aan die voet van die westelike Alpe en minder as 100 kilometer van Frankryk se grens. Dit word omring deur ’n ontsagwekkende “amfiteater” van Alpeberge wat so ver strek as wat ’n mens kan sien. Amper die helfte van die provinsie van Turyn bestaan uit berge, woude en valleie. Binne ’n uur se ry kan jy by ’n oord in die berge wees. In minder as twee uur kan jy op die strande in Ligurië wees.

Turyn dateer uit ’n tyd voor die Romeine. Dit was oorspronklik ’n nedersetting van mense wat die Taurini genoem is, en dit het later ’n Romeinse kolonie geword, waarvan die ruïnes in die geskiedkundige gebied geleë is. Daar is geboue uit die Middeleeue, maar die meeste van die stad se argitektuur dateer uit die 17de en 18de eeu, met die barokstyl wat die geboue in die middestad oorheers.

Turyn is die tuiste van een van die beste Egiptiese museums in die wêreld. Sy besonderse versameling van voorwerpe van die antieke beskawing wat om die Nyl ontwikkel het, word net deur die een in Kaïro oortref.

In ’n besoek van net ’n paar uur kan jy ook die stad se geskiedkundige en kunssentrum, die Madamapaleis, die Koninklike Paleis en die Mole Antonelliana, wat met ’n hoogte van 170 meter tot nog onlangs een van die hoogste klipstrukture in Europa was. As ’n landmerk van die stad word dit soms Turyn se ekwivalent van die Eiffeltoring in Parys genoem. Dan is daar Valentino-park, met sy botaniese tuine, asook grasperke, lane, fonteine en ’n Middeleeuse burg in die park—’n skilderagtige en getroue rekonstruksie van ’n 15de-eeuse Piëmontese dorpie.

Turyn is een van die belangrikste fabrieksentrums in Italië. Dit is die tuiste van die FIAT-motormaatskappy (Fabbrica Italiana Automobili Torino). Vir diegene wat in antieke motors belangstel, het die Museo dell’Automobile, omtrent drie kilometer buite die stad, ’n versameling van 150 veteraan-, antieke en klassieke motors, waaronder Bugatti’s, Maserati’s en Lancias. Dit is duidelik waarom die bestaan van omtrent die helfte van Turyn se huidige bevolking op die een of ander manier aan die motorbedryf verbind is.

Jehovah se Getuies in Turyn en Milaan

Die valleie om Turyn het eeue lank baie Waldense inwoners gehad, die afstammelinge van reisende predikers van die Protestantse Hervorming. Dit is dus geen wonder nie dat Charles Taze Russell, wat die leiding geneem het onder die vroeë Bybelstudente (soos Jehovah se Getuies destyds genoem is), gedurende ’n reis na Europa in 1891 met ’n plaaslike Waldense pastoor, Daniele Rivoir, in aanraking gekom het. Russell het reëlings met hom getref om verskeie Bybelstudiehulpe in Italiaans te vertaal. In 1903 is die eerste groep Bybelstudente in hierdie gebied gevorm. Toe Russell in 1912 na Italië toe teruggekeer het, was daar 40 persone wat gereeld Christelike vergaderinge in ’n gebou in Pinerolo, naby Turyn, bygewoon het. En hulle eerste Italiaanse byeenkoms is in 1925 in Pinerolo gehou.

Die Bybelstudente se geskiedenis in Turyn kan dus tot die 1920’s teruggevoer word. Die eerste sendelinge van Jehovah se Getuies is in 1946 na Italië gestuur. Hulle het gehelp om ’n goeie grondslag te lê vir die Getuies se werk. In die laat 1940’s en vroeë 1950’s is die eerste gemeentes in Turyn gestig. Nou is daar sowat 13 000 Getuies van Jehovah in die stad en sy provinsie. Maar wat van Milaan?

Die takkantoor wat Jehovah se Getuies in Italië verteenwoordig, was bietjie langer as ’n jaar in Milaan. In 1948 is dit na Rome verskuif. Die eerste naoorlogse byeenkoms is in 1947 in ’n stadsteater in Milaan gehou. Ongeveer 700 mense van regoor die land was teenwoordig. In 1963 is die “Ewige Goeie Nuus”-internasionale byeenkoms in Milaan se Vigorelli Velodrome gehou, wat toe moontlik die bekendste fietsbaan in Europa was.

Die hedendaagse predikingswerk van Jehovah se Getuies het groot welslae in Milaan behaal. Tans is daar 57 gemeentes in die stad, met meer as 4 000 bedrywige evangeliedienaars, asook ’n Byeenkomssaal in ’n stadsteater wat omskep is.

Dit kan inderdaad lonend wees om Milaan en Turyn te besoek. As jy daarheen sou gaan, kan jy verseker wees dat jy ’n hartlike ontvangs en ’n onvergeetlike ondervinding sal hê.

[Voetnote]

[Venster op bladsy 27]

Die lykkleed van Turyn—Is dit eg?

Miskien is Turyn se bekendste besienswaardigheid die lykkleed wat party glo die laken is waarin Christus se liggaam toegedraai is. ’n Reisgids verduidelik: “Die beroemdste—en twyfelagtigste—van alle heilige relieke word in Turyn se katedraal gehou.” Dit word permanent uitgestal in een van die katedraal se kapelle, toegesluit in ’n lugdigte, koeëlbestande glaskas wat met ’n edelgas gevul is. Die boek sê verder: “In 1988 is die mite van die lykkleed egter weerlê: ’n koolstofdateringstoets het getoon dat dit van niks verder as die 12de eeu dateer nie.”d

[Voetnoot]

[Kaart op bladsy 24]

(Sien publikasie vir oorspronklike teksuitleg)

MILAAN

TURYN

[Erkenning]

Mountain High Maps® Copyright © 1997 Digital Wisdom, Inc.

[Prent op bladsy 24]

Milaan se katedraal

[Prent op bladsy 24]

In Milaan lyk dit of die moderne die antieke oorheers

[Prente op bladsy 25]

In Milaan, La Scala (bo) en die Galleria Vittorio Emanuele II (regs)

[Prent op bladsy 25]

Die “Laaste Avondmaal” deur Leonardo da Vinci

[Erkenning]

Scala/Art Resource, NY

[Prent op bladsy 26]

Valbrug na Turyn se Middeleeuse burg

[Prent op bladsy 26]

Mole Antonelliana in Turyn; sy toring is 170 meter hoog

[Prent op bladsy 26]

Die Porivier wat deur Turyn vloei