Van ons lesers
Liefdelose huwelike My huwelik het geen sin meer gehad nie. Dit was asof ek en my man mekaar bloot verdra het en nie meer vir mekaar lief was nie. Ek het soms daaraan gedink om te skei. Maar danksy die reeks “Kan ons ons huwelik red?” (8 Januarie 2001) is ons van nuuts af weer verlief.
E. R., Spanje
Ek is ’n Christenvrou, maar die afgelope jaar was my huwelik baie ongelukkig. Omdat ek en my man mekaar diep seergemaak het, het dit onmoontlik gelyk om ons verhouding te herstel. Maar toe ek hierdie artikels lees, was dit asof Jehovah vir my sê: ‘Moenie moed opgee nie!’ Dit het my beweeg om self positiewe stappe te neem om weer die hegte band van liefde wat ons eens gehad het, op te bou. Ek het alreeds die positiewe resultate begin sien. Ek sal hierdie artikels oor en oor lees.
N. H., Japan
Ek is onlangs gedoop, en my ongelowige vrou het my teëgestaan. Julle artikels het my gehelp om te sien hoe ek ’n sukses van my huwelik kan maak. Dit kon nie op ’n beter tyd gekom het nie.
W. S., Australië
Aangesien ek gelukkig getroud is, het ek hierdie artikels begin lees met die gedagte dat hulle prakties goed sou wees om ander te help. Maar reg van die begin af het dit praktiese punte na vore gebring wat my eie huweliksband kon versterk.
M. D., Italië
’n Christensuster in ons gemeente het vir my vertel dat sy en haar ongelowige man ’n uitval gehad het en dat hulle uitmekaar uit is. ’n Ruk later het sy vir my gesê dat dinge baie verbeter het. Sy het hierdie artikels “verslind”, en dit het haar baie gehelp om die probleem op te los. Sy het gesê dat die punte oor kommunikasie veral nuttig was. Sy en haar man is nou weer bymekaar.
N. S., Kanada
Buikspraak Die artikel “Wie praat?” (8 Januarie 2001) het my verwar. Het Satan nie hierdie metode gebruik om Eva te bedrieg nie? Misleiding en kullery moet geen deel van ’n Christen se lewe wees nie.
B. H., Verenigde State
Watter metode Satan ook al gebruik het om Eva te bedrieg, dit kon nie regte buikspraak gewees het nie, aangesien dit spesifieke asemhalings- en stemtegnieke behels en Satan ’n geesskepsel is. Daar is geen skriftuurlike beswaar daarteen om buikspraak as ’n vorm van vermaak te gebruik nie. Dit sal natuurlik verkeerd wees om so ’n vaardigheid te gebruik om iemand moedswillig te bedrieg of spiritistiese gebruike te bevorder, soos party dalk in Bybeltye gedoen het (Jesaja 8:19).—RED.
Ek geniet dit ook om buikspraak te beoefen en het dit al by talle Christelike gesellighede gebruik. Soos die artikel getoon het, sukkel die menseoor om vas te stel uit watter rigting klanke kom. Maar ’n mens kan, interessant genoeg, nie ’n dier in hierdie opsig bedrieg nie. As ek my pop gebruik om met my hond te praat, dan kyk hy nie na die pop nie, maar na my. Jehovah het diere ’n skerp gehoorsin gegee.
L. R., Verenigde State
Haarlose hond Ek het ’n gewoonte—ek lees altyd eers die artikels waarin ek die minste belangstel. Aangesien ek nie juis van honde hou nie, het ek die artikel in die nommer van 8 Januarie “Het jy al ’n Xoloitzcuintli gesien?” eerste gelees. Teen die tyd dat ek die artikel klaar gelees het, wou ek amper een van daardie honde hê! Ek het natuurlik gou tot my sinne gekom. In elk geval, ek moet sê dat ek die afgelope 40 jaar wat ek julle tydskrifte lees, nog nooit teleurgestel is nie. Ek geniet dikwels die einste artikels wat ek gedink het ek nie sou geniet nie.
D. W., Verenigde State