Van ons lesers

Geskiedenis Ek skryf in verband met die reeks “Wat leer die geskiedenis ons?” (8 Maart 2001). Dit is van die treffendste artikels wat ek nog gelees het. Ek kon die tydskrif eenvoudig nie neersit totdat ek dit klaar gelees het nie. Ek verwonder my altyd oor die navorsing wat julle vir julle tydskrif doen en die skat van inligting wat dit bevat.

M. C., Verenigde State

Aftakelende siekte Baie dankie vir die artikel “My stryd teen ’n aftakelende siekte” (8 Maart 2001). My lewe met interstisiële sistitis (IS) het begin toe ek 18 was. Dit was nog altyd vir my moeilik om met die beperkings wat my siekte meegebring het, saam te leef. Ek het al gevoel dat ek nie genoeg volharding openbaar nie, en ek het met gevoelens van onwaardigheid geworstel. Nadat ek hierdie artikel gelees het, kon ek uiting gee aan jare van opgekropte emosies. Toe ek lees dat IS ook beperk het wat Tanya Salay kon doen, het dit my gehelp om ’n beter beskouing van sake te verkry.

B. Y., Verenigde State

Wanneer ek artikels soos dié lees, word my eie probleme onbeduidend. Ek wil graag hê Tanya Salay moet weet hoe trots ek op haar is en hoe bly ek is dat sy nie haar lewe geneem het nie, maar op Jehovah vertrou het. Haar man moet ook geprys word vir sy ondersteuning.

I. W., Verenigde State

Baie dankie vir hierdie soort artikels. Al het ons nie self hierdie probleme nie, help sulke artikels ons om groter begrip te hê vir diegene wat dit wel het.

C. L., Verenigde State

Onbeantwoorde liefde Terwyl ek die artikel “Jongmense vra . . . Hoe kan ek vir hom nee sê?” (22 Maart 2001) gelees het, het ek aan die pyn gedink wat ek self deurgemaak het. Ek het my gevoelens geïgnoreer, en ons huwelik was ’n mislukking. Soos die artikel gesê het: “’n Jammergevoel is ’n swak grondslag om ’n huwelik op te bou.”

A. M., Verenigde State

’n Jong man het my gevra om met hom uit te gaan, maar aangesien ons nie dieselfde doelwitte gehad het nie, het ek vir hom nee gesê. Ten spyte daarvan het hy weer vir my gesê hoe hy oor my voel. Ek was baie ontsteld omdat ek bang was dat ek alleen sou wees as ek hom verwerp. Maar toe ek hierdie artikel lees, het ek gerus gevoel. Ek het geweet dat ek die regte besluit gemaak het.

S. N., Japan

Drie dae voor ek hierdie artikel ontvang het, het ’n jong man vir my gesê: “Ek wil jou graag beter leer ken.” Ek het nie geweet wat om te doen nie. Ek het van hom gehou, maar ek het geweet dat ek te jonk is om met hom uit te gaan. Noudat ek hierdie artikel gelees het en ook weer die artikel gelees het oor “Jongmense vra . . . Sê nou my ouers dink ek is te jonk om afsprake te maak?” (22 Januarie 2001), weet ek wat ek moet doen.

R. S., Verenigde State

Ek het gedink ek maak die regte besluit toe ek verloof geraak het. My ouers en volwasse Christenvriende het vir my gesê dat hulle nie dink ek maak die regte besluit nie, maar ek het nie na hulle geluister nie. Ná meer as ’n maand het ek die verlowing verbreek. As ek maar net die moed gehad het om nee te sê voordat dinge so ernstig geword het, sou ek myself en my gewese verloofde baie pyn gespaar het.

V. T., Italië

Bloedsomloopstelsel  Daar is onlangs aan my limfstelsel geopereer, en ek het watersug gehad. Die artikel “Die wonders van die bloedsomloopstelsel” (22 Maart 2001) het my gerusgestel. Op die laaste bladsy van die artikel het ek ’n verduideliking gevind van waarom die swelling plaasvind.

M. R., Italië