Van ons lesers

Kommunikasie Ek het vandag die nommer van 22 Januarie 1994 ontvang wat die artikels oor “Kommunikasie in die huwelik” bevat. Dit is seker die beste artikels wat ek nóg gelees het. Ek en my man is nou ’n anderhalf jaar getroud. Ons het ’n baie goeie verhouding en is heel gelukkig, hoewel misverstande soms opduik. Die Ontwaak! het goeie insig verskaf in die redes waarom dit gebeur. Voordat ek die artikels vir ’n derde keer begin lees, moet ek vir Jehovah en vir julle dankie sê omdat julle sulke tydige inligting publiseer.

C. M., Verenigde State

My man doen goed as ’n Christen- ouere man en ’n voltydse evangeliedienaar. Ons het egter ’n kommunikasiegaping sedert ons getroud is en het al ongemaklike oomblikke beleef. Hierdie artikels het ons duidelik getoon wat die oorsake van die probleem is. Ons is seker hulle sal ons help om ons verhouding te verbeter.

C. A., Japan

Toe ek “Alta” se reaksie gelees het, het ek besef dat ek my eie gevoelens geensins beter sou kon beskryf het nie. Dieselfde kan van my man en “Leon” gesê word. Hierdie artikel help eerder die oorsaak behandel as bloot die gevolge. Ek is ook beïndruk deur die aangename manier waarop die artikels hierdie belangrike onderwerp bespreek het.

E. F., Italië

Al is ek net 17 en nie van plan om in die volgende paar jaar te trou nie, het ek nogtans hierdie insig in die rede waarom mense op ’n sekere manier optree baie waardeer. Ek is van plan om hierdie artikel te hou en dit in die volgende paar jaar van tyd tot tyd te lees. Ek sal dit veral nodig hê wanneer ek wel gereed is om te trou!

N. B., Verenigde State

My pa is baie soos “Leon”. Maar nou verstaan ek dat hy daarop geregtig is om hom af te sonder en nie met my te praat nie. Al was die artikel insiggewend, is ek bevrees dat hy die artikel sal gebruik om te bewys dat wat hy doen reg is.

A. B., Verenigde State

Die artikels het lesers probeer help om te verstaan waarom mans en vrouens sekere gevoelens koester en op ’n sekere manier optree. Ons het egter nie bedoel om te kenne te gee dat óf mans óf vrouens op die een of ander manier die reg het om nie te kommunikeer of hulle onvanpas te gedra nie. Die Skrif moedig vaders aan om nie ‘hulle kinders te vertoorn’ nie (Kolossense 3:21, NW). Dit sal onredelike lang stiltes insluit wanneer kinders ouerlike leiding wil hê en nodig het.—RED.

Ek is seker dat briewe met positiewe kommentare oor hierdie artikels instroom. Voeg asseblief my kommentare daarby. In die artikel oor “Leon” en “Alta” kon julle die name met my en my vrou s’n vervang het. Hoe wens ek tog dat ek my vrou se gevoelens kon verstaan het! Ek het net soos “Leon” in haar behoeftes probeer voorsien, maar op ’n manier waarop ek sou wou hê daar in my eie behoeftes voorsien moes word. Nou het my vrou van 20 jaar van my geskei. Miskien sal hierdie artikels my vrou se hart raak en kan ons ons huwelik weer probeer opbou.

J. K., Verenigde State

Bybelvasvra Ek het die artikel “Het jy al ooit gewonder?” in die nommer van 8 Januarie 1994 só geniet. Ek het afskrifte van daardie bladsy gemaak en dit aan vriende, familielede en ander belangstellendes gestuur. Ek het hulle aangemoedig om elke teks na te slaan en enige vrae wat hulle moontlik het neer te skryf. Dit is ’n baie goeie manier om ’n Bybelbespreking met mense te hê. Doen dit in die toekoms asseblief weer!

M. S., Verenigde State