Is jou kind veilig?

Volgens die Amerikaanse Nasionale Administrasie vir Hoofwegverkeersveiligheid (NHTSA) is motorongelukke die vernaamste doodsoorsaak onder kinders tussen die ouderdomme van 5 en 14. Die NHTSA sê: “Meer as 50% van die kinders wat in ongelukke sterf, is nie [in veiligheidstoestelle] vasgemaak nie. Daarbenewens is 4 uit 5 kinders verkeerd vasgemaak.”

Die NHTSA gee ’n aantal veiligheidswenke en waarskuwings vir mense wat kinders by hulle in die motor het wanneer hulle bestuur. Hoewel wette van land tot land verskil en in Amerika selfs van staat tot staat verskil, kan hierdie riglyne vir baie ouers en kinderoppassers as stof tot nadenke dien. Vergewis jou van julle plaaslike wette en doen wat jy kan om die veiligheid van jou kosbare vraggie te verseker!

VEILIGHEIDSWENKE

Die veiligste plek vir alle kinders is op die agtersitplek.

1 Babas moet op die agtersitplek van die motor in ’n veiligheidstoel geplaas word wat na agter kyk.

2 ’n Kind wat ten minste ’n jaar oud is en ten minste nege kilogram weeg, kan in ’n veiligheidstoel geplaas word wat vorentoe kyk.

3 Wanneer die kind 18 kilogram weeg, kan hy in ’n kinderstoeltjie sit, wat met een van die skoot- en skouergordels van die motor vasgemaak word.

4 Wanneer die kind omtrent 36 kilogram weeg en 1,4 meter lank is, kan hy ’n veiligheidsgordel vir volwassenes begin gebruik.

WAARSKUWINGS

Kinders moenie in die voorste passasiersitplek sit voordat hulle ten minste 13 jaar oud is nie. Die lugkussing vir die voorste passasier kan jonger kinders en babas ernstig beseer.

As ’n kinderstoeltjie gebruik word, sal ’n skootgordel alleen nie voldoende beskerming bied as die kinderstoeltjie nie ’n skerm het nie.

Moenie dink dat ’n skouergordel alleen ’n klein kind sal beskerm nie; in geval van ’n ongeluk kan die gordel ’n ernstige nekbesering of selfs die kind se dood veroorsaak.

Volg die instruksies noukeurig wanneer jy ’n kinderstoeltjie installeer en gebruik. Volgens die NHTSA “kan selfs die ‘veiligste’ stoeltjie nie jou kind beskerm as dit verkeerd gebruik word nie”.

[Prent op bladsy 31]

Behoorlike installering van ’n kinderstoeltjie sluit in dat die sitplekgordel goed vasgemaak word