Hoe om motorongelukke te voorkom

SKREEUENDE bande, die geknars van metaal, glas wat breek, mense wat gil . . . Hierdie geluide is dalk bekend vir iemand wat al in ’n motorongeluk betrokke was. Die Buro vir Bevolkingstatistiek sê dat “ongeveer 1,2 miljoen mense elke jaar [wêreldwyd] in padongelukke sterf en dat tot 50 miljoen beseer word”.

Maar as jy veiligheidsbewus is en gesonde verstand gebruik, kan dit jou help om baie ongelukke te vermy. Kom ons kyk hoe.

Spoedgrense, sitplekgordels en SMS’e

Op sommige paaie meen jy dalk dat die spoedgrens te laag is. Maar as jy die spoedgrens oorskry, maak dit gewoonlik min verskil aan die tyd wat dit jou sal neem om jou bestemming te bereik. Byvoorbeeld, oor ’n afstand van 80 kilometer sal jy minder as nege minute spaar as jy jou spoed van 100 kilometer per uur tot 130 kilometer per uur vermeerder. Is dit die moeite werd om jou aan die risiko van ’n ongeluk bloot te stel om so min tyd te spaar?

Sitplekgordels is ontwerp om veiligheid te verseker. ’n Regeringsagentskap in die Verenigde State het tot die slotsom gekom dat sitplekgordels tussen 2005 en 2009 in daardie land alleen meer as 72 000 lewens gered het. Kan ’n lugsak ’n sitplekgordel vervang? Nee. ’n Lugsak werk saam met die sitplekgordel om verdere beskerming te bied. As jy nie jou sitplekgordel dra nie, sal die lugsak minder doeltreffend wees en kan dit selfs gevaarlik wees. Maak dit dus ’n gewoonte om jou sitplekgordel te dra, en maak seker dat jou passasiers dieselfde doen. Nog ’n waarskuwing: Moet nooit probeer om SMS’e te lees of te skryf terwyl jy bestuur nie.

Padtoestande en instandhouding

Bande het minder kloukrag op paaie wat nat is of met stof, sand of gruis bedek is. As jy stadiger ry, is dit minder waarskynlik dat jy sal gly as jy rem trap. As jy gereeld op sneeu- of ysbedekte paaie ry, kan jy dit oorweeg om sneeubande vir die winter te koop. Hierdie bande het dieper groewe en het ook beter kloukrag.

Kruisings is vir alle bestuurders gevaarlik. Een deskundige beveel die volgende aan: Wanneer ’n verkeerslig na groen oorslaan, moet jy eers wag voordat jy die kruising oorsteek. Deur net ’n paar sekondes te wag, kan jy voorkom dat jy getref word deur ’n motor wat deur die rooi lig ry.

Dit is noodsaaklik om jou motor in stand te hou as jy ongelukke wil vermy. Stel jou voor wat kan gebeur as jou remme ingee terwyl jy bestuur. Om meganiese probleme te voorkom, reël sommige motoreienaars dat ’n bekwame werktuigkundige hulle motor gereeld versien. Sommige motoreienaars verkies weer om van die instandhoudingswerk self te doen. Hoe dit ook al sy, maak seker dat jou motor gereeld nagesien en herstel word.

Drink en bestuur

Bestuurders wat normaalweg verantwoordelik en versigtig is, kan hulle aan groot gevaar blootstel as hulle bestuur nadat hulle ’n drankie gedrink het. In die Verenigde State het meer as 37 000 mense gedurende 2008 hulle lewe in motorongelukke verloor. Omtrent ’n derde van hierdie mense is dood in ongelukke waarby dronkbestuur ’n faktor was. Selfs net ’n klein hoeveelheid alkohol kan jou bestuursvermoë belemmer. Party mense besluit om glad nie alkohol te drink wanneer hulle gaan bestuur nie.

Deur die verkeersreëls te gehoorsaam, jou sitplekgordel te dra, jou motor in ’n goeie toestand te hou en nie te bestuur nadat jy alkohol gedrink het nie, kan jy jou eie lewe en die lewens van ander beskerm. Hierdie wenke kan jou help om ongelukke te vermy terwyl jy bestuur, maar net as jy dit toepas.

[Venster/Prent op bladsy 11]

MOENIE BESTUUR WANNEER JY VAAK IS NIE

“Mense moet onthou dat ’n bestuurder wat vaak is, net so gevaarlik kan wees soos een wat dronk is.” Hierdie stelling wat deur ’n amptenaar van die Amerikaanse Nasionale Slaapstigting gemaak is, toon hoe gevaarlik dit is om te bestuur wanneer jy lomerig is. Die volgende simptome is ’n aanduiding dat dit vir jou onveilig sal wees om te bestuur:a

● Jy vind dit moeilik om te fokus, knip jou oë aanhoudend of sukkel om jou oë oop te hou

● Jy sukkel om jou kop regop te hou

● Jy gaap aanhoudend

● Jy kan nie die laaste paar kilometer wat jy gery het, onthou nie

● Jy sien nie afritte en verkeerstekens raak nie

● Jy bly nie in jou baan nie, ry te naby aan die voertuig voor jou of ry oor die dreunstroke aan die kant van die pad

Indien jy hierdie simptome ondervind, moet jy iemand anders laat bestuur of by ’n veilige plek stilhou om ’n slapie te vang. Dit sal wel ’n bietjie tyd in beslag neem, maar ter wille van jou veiligheid, en dié van ander, is dit die moeite werd!

[Voetnoot]