Van ons lesers
Vertroosting vir die siekes Ek is 22 jaar oud, en ek ly al my hele lewe lank aan ’n degeneratiewe soort kanker. Ek het die voorbladreeks “Vertroosting vir die siekes” (22 Januarie 2001) geniet. Hoe vertroostend is dit tog om te weet dat Jehovah die gevoelens van frustrasie en woede verstaan wat my oorweldig! Ek kon my vereenselwig met William en Rose Meiners en die manier waarop hulle hulle situasie hanteer het. Jehovah weet hoe om diegene te onderskraag wat hom liefhet!
A.C.C., Chili
Brandblussers Dankie vir die artikel “Brand! Watter brandblusser moet jy gebruik?” (22 Januarie 2001). Stuur asseblief vir ons 130 eksemplare van hierdie tydskrif sodat ons dit vir ons werknemers kan gee om huis toe te neem.
D. F., Verenigde State
Dankie vir julle harde werk aan hierdie artikel. Daar is geen ander tydskrif van 32 bladsye wat so ’n groot verskeidenheid praktiese inligting bevat nie. Ek wil julle egter daarop wys dat julle seker ’n brandblusser met “droë chemikalieë” bedoel het toe julle van ’n brandblusser met “droë poeier” gepraat het. Brandblussers met droë poeier, wat ’n geel ster met die letter D op het, kan net vir metaalbrande gebruik word, terwyl brandblussers met droë chemikalieë vir klas ABC- of BC-brande gebruik kan word.
J. H., Verenigde State
Dankie vir die regstelling. In sommige lande sluit die term “brandblussers met droë poeier” ook in wat in die Verenigde State bekend staan as brandblussers met droë chemikalieë. Aangesien die “Ontwaak!” ’n internasionale tydskrif is, is dit onvermydelik dat verskille in terminologie van tyd tot tyd sal voorkom.—RED.
Te jonk om afsprake te maak? Ek het die artikel “Jongmense vra . . . Sê nou my ouers dink ek is te jonk om afsprake te maak?” (22 Januarie 2001) werklik geniet. Ek is 17 jaar oud, en ek het tot die gevolgtrekking gekom dat ek nog nie gereed is om te trou of om vir ’n gesin te sorg nie. Hierdie artikel het my gehelp om goed na te dink voor ek afsprake maak en ook om verstandig te wees wanneer ek wel eendag besluit om afsprake te maak en te trou.
A.M.H., Verenigde State
Ek is net 15 jaar oud, en die druk op hoërskool om afsprake te maak, kan baie uitputtend wees. Dit is aanmoedigend om te weet dat die Bybel en mede-Christene my ondersteun. Dit help my om standvastig te bly!
L. M., Kanada
Ek kon my vereenselwig met die foto van die twee jongmense wat oor die telefoon praat, omdat ek my in daardie situasie kon voorstel. Ek moes ophou om met een persoon te assosieer, want ek weet ek is nie gereed om afsprake te maak nie. Sulke artikels moedig my aan om by my besluit te bly om te wag.
M.R.C., Verenigde State
Ek is 14 jaar oud. Hierdie artikel het my regtig gehelp om te besef hoe gevaarlik dit is om op my ouderdom afsprake te maak, aangesien ek werklik nie gereed is om te trou nie. Die artikel het my gehelp om te sien dat dit nou belangriker is om my verhouding met Jehovah te versterk as om ’n romantiese verhouding met iemand anders aan te knoop.
A. P., Kanada
Dit lyk of hierdie artikel net vir my geskryf is. Ek het gedink dat my ouers te streng is met my en dat hulle nie my gevoelens verstaan nie. Nou besef ek dat hulle alles in hulle vermoë doen om my te help en te beskerm. Ek kan nie wag om toekomstige “Jongmense vra”-artikels te lees nie!
H. E., Roemenië