Van ons lesers

Tienerafsprake Ek wil vir julle baie dankie sê vir die artikel “Jongmense vra . . . Tienerafsprake—Wat is fout daarmee?” (22 Desember 2001). Nou die dag het ek my ma dieselfde vraag gevra—‘Wat is so verkeerd daarmee om afsprake te maak?’ Ek het geweet wat die antwoord is, maar ek het net iets nodig gehad om my te oortuig. Toe ek die artikel lees, het dit gevoel asof Jehovah my gedagtes gelees het. Hierdie artikel het my meer vasbeslote gemaak om nie met iemand uit te gaan totdat ek gereed is om te trou nie. Ek het dit nog altyd waardeer dat julle artikels op die regte tyd kom! Nogmaals baie dankie.

L. F., Verenigde State

Ek het die artikel onmiddellik gelees, en dit was baie aanmoedigend. Ek is in graad nege, en die druk om afsprake te maak, is baie groot. Feitlik al my skoolmaats het kêrels, en hulle maak dikwels opmerkings oor die feit dat ek nie een het nie. Hierdie artikel was dus net wat ek nodig gehad het! Sulke artikels help ons om nooit die wyse raad wat ons in die Bybel vind, te vergeet nie.

J. R., Finland

Ek is 16 jaar oud, en die begeerte om met iemand van die teenoorgestelde geslag uit te gaan—selfs om net gewaardeer of opgemerk te word—is sterk. Maar ek het ernstig daaroor nagedink, en ek besef dat dit belangrik is om volwasse genoeg te wees voordat jy begin afsprake maak. Dit sal ons help om gevare te vermy en nie verantwoordelikhede op ons te neem waarvoor ons nog nie gereed is nie.

A. G., Italië

Ek is 16 jaar oud. Hierdie artikel het op die regte tyd vir my en my vriende gekom. Ons het dit saam gelees omdat ons besef het dat daar gevare bestaan wanneer jongmense afsprake maak. Hierdie artikel het ons ook gehelp om te sien wat die doel van afsprake en die Bybel se beskouing daarvan is. Die laaste deel van die artikel het my laat besef dat, as ek wag om afsprake te maak, ek geestelik sal kan groei en “die bloei van die jeug” kan gebruik om dit te doen.—1 Korintiërs 7:36.

R.L.W., Verenigde State

Lewensverhaal Ek moes net skryf om vir julle te sê hoe baie ek die artikel “Onderskraag deur vertroue op God” (22 Desember 2001) waardeer het. Die ondervinding van Rachel Sacksioni-Levee lig toe hoe Jehovah God sy knegte tydens hulle beproewinge onderskraag. Terwyl toestande in die wêreld versleg, help sulke ondervindinge ons om ondanks ons beproewinge voort te gaan om God se wil te doen.

J. F., Brittanje

Artritis Baie dankie vir die reeks oor artritis (8 Desember 2001). Ek is 19 jaar oud, en toe ek 8 was, het ek uitgevind dat ek artritis het. Ek het altyd pyn, hoewel party dae erger as ander is. Wat my vertroos, is die hoop van lewe in God se nuwe wêreld, wanneer ons vry sal wees van alle aftakelende siektes. Totdat daardie tyd aanbreek, is ek vol vertroue dat hy my die nodige krag sal gee om hierdie pynlike siekte te verduur.

M. R., Brasilië

Die inligting in hierdie reeks was baie interessant. Ek is 28 jaar oud, en die afgelope drie jaar ly ek aan ’n baie seldsame vorm van artritis. Met die hoop wat hierdie artikels my gegee het, kan ek voortgaan om Jehovah te dien.

M. U., Italië

Dankie vir die artikels oor artritis. Ek wil graag hê dat God se Koninkryk binnekort moet kom sodat ek ‘net soos ’n takbok sal kan klim’ (Jesaja 35:6). Ek is sewe jaar oud en het rumatoïede artritis in my knieë.

E. I., Griekeland