Van ons lesers
Gejaagde wêreld Die reeks artikels “Die lewe in vandag se gejaagde wêreld” (8 Februarie 2001) het die kern van die probleme in ons moderne gemeenskap aangeroer. Die vraag: “Wat is vir jou belangriker, dinge of mense?” het my aandag getrek. Hou asseblief aan om sulke goeie artikels vir ons te druk!
J. K., Japan
Die artikels het my gehelp om prioriteite te stel en my bedrywighede te evalueer. Sonder dat ek dit besef het, het ek in ’n groef verval wat daartoe gelei het dat ek chronies moeg, angstig en geestelik uitgeput was. Ek verander nou my gewoontes en gee voorkeur aan die dinge wat wel saak maak. Dankie vir die hulp om my lewe te vereenvoudig!
L.D.C., Guatemala
Die immuunstelsel Ek het die nommer van 8 Februarie 2001 met die artikel “Wagte wat jou gesondheid beskerm” vir ’n dokter gegee wat betrokke is by voorkomende geneeskunde. Hy was beïndruk met die prent op bladsy 15 wat wys hoe die wit bloedselle die bakterieë aanval. Hy het dit vergroot en geraam, en nou gebruik hy dit om die immuunstelsel te verduidelik.
H. K., Japan
Ek lees die Ontwaak! al 30 jaar lank, en ek waardeer die tydige inligting baie. Die artikel “Wagte wat jou gesondheid beskerm” het my veral beïndruk, want dit het my gehelp om te verstaan hoe wonderlik die immuunstelsel werk wat Jehovah vir ons gegee het.
L. G., Mexiko
Ek is ’n dokter en het as mediese student omtrent die immunologie geleer. Die handboek se verduideliking omtrent die immuunstelsel was moeilik verstaanbaar, maar hierdie artikel was wonderlik. Dit het die onderwerp op ’n maklik verstaanbare manier opgesom. ’n Dosent het eenmaal gesê dat ons, wanneer ons die immuunstelsel bestudeer, nie logieserwys kan ontken dat God dit gemaak het nie. Ek sien uit na nog interessante artikels oor die menseliggaam.
N. K., Japan
Tsoenamies Ek is 12 jaar oud en lees al julle tydskrifte. Ek het regtig gehou van die artikel “Reusegolwe—mites en werklikhede” (8 Februarie 2001). Hierdie golwe is vir my baie interessant, en ek het gedink julle het baie goed deur middel van ’n illustrasie gewys hoe kragtig hulle is.
K. S., Verenigde State
Radioaktiewe neerslag Die eenvoudige verduideliking in die artikel “Radioaktiewe neerslag wek kommer” (22 Februarie 2001) het my geboei. Ek het geweet dat elemente soos stronsium 90 baie skadelik is, maar ek het nie geweet dat dit van kleintyd af ’n uitwerking op ’n mens kan hê nie. Dit is nuttig om sulke ingewikkelde onderwerpe te verstaan, want dit help mense om te besef dat die mensdom regtig die Grootse Skepper nodig het om probleme op te los. Baie dankie vir julle voortdurende besorgdheid oor julle lesers deurdat julle sulke moeilike onderwerpe so vereenvoudig dat almal daarby baat kan vind.
M. Z., Italië
Jongmense vra Ek lees die Ontwaak! al vandat dit die Vertroosting genoem is. Al is ek bejaard, geniet ek dit om die “Jongmense vra . . . ”-artikels te lees. As ek van die situasies wat daarin beskryf word, in ’n meer volwasse konteks toepas, neem ek baie inligting in en kry ek goeie raad. Die reeks is selfs leersaam vir ouer mense soos ek.
R. S., Verenigde State