Van ons lesers

Kinders Ek het onlangs die reeks “’n Kind se vroeë jare—Wat moet ouers doen?” (22 Oktober 2004) gelees. Hierdie artikels het my so beïndruk dat ek besluit het om aan julle te skryf. Ek het ’n dogtertjie wat binnekort vyf word. Ek het altyd gedink dat ek elke oomblik van haar lewe moet beplan. Maar volgens die tydskrif meen sommige opvoeders dat informele spel eintlik nodig is, aangesien dit kreatiwiteit stimuleer en ’n kind se sosiale, verstandelike en emosionele vaardighede ontwikkel. Baie dankie! Hou asseblief aan om artikels oor soortgelyke onderwerpe te publiseer!

I. K., Rusland

Toe ek hierdie reeks gelees het, kon ek die trane nie keer nie. Ek het teruggedink aan die tyd, 29 jaar gelede, toe ek my baba gehad het, terwyl ek nog baie jonk was en Jehovah nie geken het nie. Ek het baie foute gemaak. Maar my trane van verdriet het in trane van vreugde verander. My dogter het ’n week gelede haar eerste baba gehad. Ek is so dankbaar teenoor Jehovah dat my kleinkind ouers het wat Jehovah liefhet en wat by sulke artikels sal baat vind.

E. H., Verenigde State

Jongmense vra Baie dankie vir die artikel “Jongmense vra . . . Hoe kan ek vir hom sê hoe ek voel?” (22 Oktober 2004). ’n Jong vrou het onlangs ons verhouding beëindig. Omdat ek nog gevoelens vir haar het, kon ek net aanhou hoop dat sy weer daaroor sou dink. Maar nadat ek hierdie artikel gelees het, het ek besef dat dit net ’n droom is, en vir die eerste keer voel ek dat ek die werklikheid kan aanvaar. Dankie dat julle so ’n praktiese onderwerp bespreek het. Ek sien weer eens hoe Bybelbeginsels ons kan help.

J. K., Japan

Alhoewel ek nie op die oomblik van plan is om iemand te leer ken met die doel om te trou nie, is hierdie artikel nuttig omdat dit my help om waaksaam te bly. Ons as jongmense is weliswaar meer kwesbaar vir Satan se aanvalle, maar Jehovah help ons. Hou aan om sulke artikels te publiseer!

C. D., Roemenië

Hierdie artikel het my gehelp om dinge realisties te beskou. Dit het my gehelp om eers ’n rukkie te wag voordat ek sê hoe ek voel. Bowenal het dit my aangemoedig om meer in die gemeente te doen sodat ek my reputasie in die gemeente sowel as my verhouding met Jehovah kan verbeter. Dit sal my ’n aantrekliker mens vir almal maak. Dankie vir die manier waarop julle besorgdheid oor jongmense toon!

D. K., Holland

Ek het eendag met ’n vriendin gesels oor iemand in wie sy ’n romantiese belangstelling gehad het. Sy wou my advies hê oor wat sy moes doen. Ons het aan Bybelbeginsels probeer dink. Hoe verras was ons tog toe ons net die volgende dag hierdie tydskrif ontvang het! Baie dankie dat julle sulke artikels publiseer!

J. S., Ierland

Ek is 14. By die skool is liefde en verhoudings dikwels ’n onderwerp van gesprekke in my klas. Toe ek hierdie artikel gelees het, het ek baie geleer oor hoe om in die toekoms na ’n huweliksmaat te soek. Ek verstaan ook nou dat Jehovah werklik vir ons omgee en vir ons goeie raad gee. Ek wil verstandig optree teenoor diegene van die teenoorgestelde geslag—op ’n manier wat vir God aanneemlik is. Hou asseblief aan om wonderlike artikels soos dié in die toekoms te publiseer.

K. I., Japan