Die vele take van moeders
4:50 vm. Alex, die baba, kom huilend en deur die slaap na die kant van die bed waar Helen, sy moeder, slaap. Haar twee ander kinders—Penny (5) en Joanna (12)—en haar man, Nick, slaap nog. Helen tel Alex in die bed en borsvoed hom. Sy kan nie weer aan die slaap raak nie.
5:45 vm. Helen loop saggies kombuis toe, maak koffie en lees.
6:15–7:20 vm. Nick staan op. Helen maak Penny en Joanna wakker, kry die ontbyt reg en verrig ’n paar huishoudelike takies. Om 7:15 gaan Nick werk toe, en hy laai Joanna by die skool af. Helen se moeder daag op om Alex op te pas.
7:30 vm. Helen laai Penny by die kleuterskool af. Terwyl sy werk toe ry, kry Helen tyd om te dink aan wat moederskap werklik behels. “Dis die moeilikste taak wat ek nog ooit gehad het”, sê sy.
8:10 vm. Helen sit by ’n lessenaar wat oorvol werk is. Sy is bekommerd dat nog ’n swangerskap haar dalk haar werk sal kos. Die gesin het die ekstra salaristjek nodig.
10:43 vm. Nadat Helen die telefoon neergesit het—die oproep was oor haar kinders—troos haar medewerker Nancy haar: “Jy is so ’n goeie ma.” Trane rol oor Helen se wange.
12:05 nm. Helen eet gou ’n toebroodjie en dink aan die tyd voordat haar eerste dogter gebore is. Destyds het sy planne gehad vir dinge wat sy in haar “vrye” tyd wou doen. ‘Wat ’n grap!’ dink sy.
3:10 nm. Ná ’n hele paar telefoonoproepe van die huis af oor Alex se manewales praat Helen oor die besondere band wat sy met haar kinders het: “Dis heeltemal anders as die liefde wat ek nog vir enige ander persoon gehad het.” Hierdie innige gevoel het haar die aanvanklike, onverwagte moeilikhede help oorkom.
5:10 nm. Nadat Helen Joanna opgelaai het, sien sy na verskillende sake om. Sy bel Nick en herinner hom daaraan dat dit sy beurt is om Penny op te laai.
6:00–7:30 nm. Terug by die huis los Helen Ouma af en kyk verder na Alex, verrig huishoudelike takies en berei aandete voor. Wanneer Helen oor die behoeftes van ’n baba gevra word, sug sy: “’n Baba wil eenvoudig alles van sy moeder hê: haar arms, liggaam en melk, en hy hou haar uit die slaap.”
8:30–10:00 nm. Helen help Joanna met haar huiswerk en borsvoed Alex. Terwyl Nick ’n halfuur lank vir Penny lees, verrig Helen nog ’n paar huishoudelike takies.
11:15 nm. Nadat Penny en Joanna gaan slaap het, is Alex nog wakker in sy moeder se arms, maar dan raak hy eindelik aan die slaap. “Ek dink hy is reg vir die bed”, sê Helen vir Nick, wat al deur die slaap is.