Luister en leer

“ONS het 85 persent van wat ons weet, geleer deur te luister”, sê ’n verslag in die koerant Toronto Star. Hoewel ons baie tyd daaraan bestee om te luister, word ons aandag afgetrek, deur ander dinge in beslag geneem of ons vergeet 75 persent van wat ons hoor. Hierdie treffende statistiek beklemtoon die behoefte om ons luistervaardighede te ontwikkel.

Volgens die verslag is “swak luistervaardighede . . . die oorsaak van baie maatskaplike probleme”. Rebecca Shafir, ’n spraakpatoloog en kommunikasiedeskundige, glo dat dit dikwels ’n faktor in selfmoorde, skoolgeweld, gesinsverbrokkeling en dwelmmisbruik is.

Sosioloë sê dat mense verskillende luisterstyle het. Party is mensgeoriënteerde luisteraars en hou daarvan om al die kleurvolle besonderhede te hoor wat met ’n storie verband hou. Ander is aksiegeoriënteerde luisteraars en wil hê dat die spreker tot die punt moet kom. “In ’n gesprek tussen ’n mensgeoriënteerde luisteraar en ’n aksiegeoriënteerde luisteraar kan daar dus heel moontlik ’n kommunikasieprobleem ontstaan”, sê die Star.

Jesus het met goeie rede gesê: “Skenk dus aandag aan hoe julle luister” (Lukas 8:18). Goeie luistervaardighede dui op goeie maniere. Dit is ’n noodsaaklike deel van goeie kommunikasie. Praktiese wenke oor hoe om tydens ’n gesprek te luister, is onder meer om weg te draai van dinge wat jou aandag kan aftrek, effens vorentoe te leun en aktiewe terugvoering te gee, deur oogkontak te behou en met jou kop te knik. Aangesien baie van wat ons leer, afhang van hoe goed ons luister, moet ons almal voortdurend daarna strewe om aandagtig te luister.