Hoe veilig is matte?
HOEVEEL tyd bring jy in vertrekke deur waar die vloer met ’n mat bedek is? ’n Verslag in die tydskrif New Scientist gee te kenne dat die antwoord sorgwekkend kan wees, veral wat kinders betref.
Die tydskrif het gesê: “Ons blootstelling aan giftige besoedelstowwe is tussen 10 en 50 keer hoër in binnenshuise omgewings as wat dit in die buitelug is.” John Roberts, ’n omgewingsingenieur in die Verenigde State, beweer dat monsters van matstof uit tipiese wonings onrusbarend hoë vlakke besoedelstowwe kan bevat. Dit sluit in lood, kadmium, kwik, plaagdoders en die kankerwekkende poligechloreerde bifenole (PCB’s) en polisikliese aromatiese koolwaterstowwe (PAH’s).
Na bewering kan plaagdoders wat deur middel van skoene en die pote van troeteldiere in die huis ingedra word, die hoeveelheid plaagdoder in die matte se stof 400 keer vermeerder. Daar word gesê dat hierdie besoedelstowwe jare lank nog nadelig kan wees. Omdat plaagdoders en PAH’s halfvlugtig is, verdamp dit, dryf dit rond en sak dit dan weer op matte en ander oppervlakke neer.
Jong kinders speel dikwels op die vloer en sit dan hulle vingers in hulle mond. Daarom is hulle veral aan besoedelstowwe blootgestel. Omdat jong kinders ’n vinniger metabolisme as volwassenes het, asem hulle in verhouding met hulle gewig baie meer lug in as volwassenes.
Party navorsers wonder of die toenemende gebruik van volvloermatte in huise dalk bydra tot die toename in asma, allergieë en kanker onder kinders. Roberts sê: “’n Huis met kaal vloere en ’n paar vloermatte sal ongeveer een tiende van die stof hê wat in ’n huis met volvloermatte gevind word.”
Roberts stel voor dat jy ’n kragtige stofsuier gebruik om matte veiliger te maak. Gaan dan etlike weke lank een keer per week 25 keer oor die mat binne ’n meter van die hoofingange, 16 keer oor dele met baie voetverkeer en 8 keer oor die res van die matte.
Nadat jy hierdie eenvoudige prosedure voltooi het, behoort jy die stofvlak laag te hou as jy die matte elke week die helfte van die voorgestelde kere stofsuig. Roberts raai ook aan: “Plaas ’n deurmat van hoë gehalte by elke ingang van jou huis en vee jou voete twee keer daaraan af voordat jy binnegaan.”