’n Spinnekop wat hom voordoen as ’n mier
DAAR is ’n klein spinnekoppie wat in ’n miershoop inkruip en in die geheim tussen sy vyande lewe. Om te keer dat hy ontdek word, verander hy sy voorkoms en gedrag. Dit is belangrik, want miere kan redelik kwaai raak as hulle gepla word. Aangesien die spinnekop se lyf van die mier s’n verskil, is dit nogal ’n uitdaging.
Die mier het ses pote en twee voelers, terwyl die spinnekop agt pote en geen voelers het nie. Hoe kry die spinnekop dit dan reg om soos ’n mier te lyk? Wel, hy hardloop in die miershoop rond op ses pote en laat sy ander twee pote uitstaan sodat hulle soos voelers lyk.
Wat meer is, die spinnekop beweeg sy twee namaakvoelers op ’n heel geloofwaardige manier. Hy beweeg hulle op so ’n manier heen en weer dat hulle vir miere se voelers aangesien word. Hierdie bobaasvermommer kan selfs die miere se rukkerige, kronkelende manier van loop naboots!
Die spinnekop probeer in elke opsig die volmaakte mier wees, aangesien dit uiters belangrik vir sy veiligheid is om as ’n inwoner van die miershoop erken te word. In die miershoop kry die spinnekop beskerming teen sy natuurlike vyande, wat spinnekopjagters insluit. Sangvoëls, wat hierdie spinnekop as ’n lekkerny beskou, los hom ook uit. Selfs spinnekoppe wat ander spinnekoppe jag, word deur die “voelers” van die nabootser om die bos gelei.
Maar as ’n voël, akkedis of ander dier die miershoop aanval, neem die spinnekop vinnig sy ware identiteit aan en ontsnap hy. Spinnekoppe kan beter sien as miere, en hulle kan spring, terwyl miere nie kan nie—wat dit vir hulle makliker maak om te ontsnap.
Gedurende die dag doen die spinnekop alles in sy vermoë om nie in die miershoop ontdek te word nie. Maar snags is hy aktief en sal hy in dieselfde miershoop waarin hy bly, miere vang! As die spinnekop se bedrywighede ontdek word, maak hy gebruik van sy agt pote om vinnig weg te kom.
’n Wyfiespinnekop sal moontlik by die mannetjiespinnekop in die miershoop aansluit. Sy is nie net getrou aan haar maat nie, maar lê ook heelwat inisiatief aan die dag. Sy bou ’n beskuttende skerm van sydrade in die miershoop, wat nie net haar maat beskerm nie, maar ook haar eiers.
Daar is ongetwyfeld baie meer wat ons omtrent hierdie spinnekop kan leer. En dieselfde kan gesê word van die meeste ander diersoorte op die aarde. Hoe wonderlik sal dit tog wees om in die toekoms meer te leer oor God se interessante skeppingswerke!
[Prent op bladsy 31]
’n Spinnekop tussen twee miere
[Erkenning]
Bill Beatty