Wêreldvrede is nie net ’n droom nie!
SOU Alfred Nobel optimisties gewees het oor die vooruitsigte op wêreldvrede as hy op die afgelope eeu kon terugkyk? Hy sou ongetwyfeld bly gewees het om te weet dat baie mense opregte pogings aangewend het om oorlog te beëindig. Nietemin sou ’n harde werklikheid hom in die gesig staar. Professor Hugh Thomas som die situasie goed op: “Die twintigste eeu—hoewel dit oor die algemeen een van sosiale verbetering en groter regeringsbesorgdheid oor die lewens van die armes was—is oorheers deur die masjiengeweer, die tenk, die B-52, die kernbom en laastens die missiel. Dit is gekenmerk deur bloeddorstiger en vernietigender oorloë as dié van enige ander tydperk.” Thomas sê verder dat “dit derhalwe ’n onuitgemaakte saak is of die era werklik as een van vooruitgang beskou kan word of nie”.
Lyk die vooruitsigte op wêreldvrede beter noudat ons die 21ste eeu betree het? Hoegenaamd nie! Met verwysing na die terreuraanvalle op 11 September 2001 in die stad New York en in Washington, DC, sê die tydskrif Newsweek: “In ’n wêreld waar 767’s in geleide missiele kan verander, lyk niks onmoontlik, belaglik—of selfs erger, voorkombaar—nie.”
Party sê dat twee dinge moet gebeur voordat wêreldvrede ’n werklikheid kan word: Eerstens moet mense se beskouing en gedrag drasties verander; en tweedens moet alle nasies onder een regering verenig word. Die Bybel voorspel ’n tyd wanneer vrede tot stand gebring sal word—maar nie deur mensepogings nie. Psalm 46:9 sê aangaande die Skepper, Jehovah God: “Hy laat oorloë ophou tot aan die einde van die aarde.” Hoe sal God dit teweegbring? Deur middel van sy Koninkryk, waarvoor talle opregte mense al herhaaldelik gebid het. Daardie Koninkryk is nie net ’n onbegrypbare toestand van die hart nie, maar ’n werklike regering waardeur God vrede van die een einde van die aarde tot die ander einde tot stand sal bring. Die geïnspireerde profeet Jesaja het voorspel dat onderdane van daardie regering ‘nie meer sal leer om oorlog te voer nie’ (Jesaja 2:4). Mense sal deur middel van ’n wêreldwye onderrigtingsprogram leer om in vrede te lewe en om sodoende ‘van hulle swaarde ploegskare te smee en van hulle spiese snoeimesse’.
Jehovah se Getuies doen dit nou reeds. Hulle weier om die wapen teen hulle medemens op te neem, hoewel hulle aan talle verskillende etniese groepe behoort en in meer as 200 verskillende lande woon. Hulle neutrale standpunt in ’n oorloggeteisterde wêreld bewys dat vrede nie net ’n utopiese droom is nie, maar ’n realistiese moontlikheid.
Sal jy graag meer oor hierdie Bybelse hoop vir ware vrede wil leer? Jy kan gerus aan die uitgewers van hierdie tydskrif skryf. Gebruik die gepaste adres op bladsy 5 of kom in aanraking met Jehovah se Getuies in jou omgewing.