’n Verkwikkende drankie van ’n eksotiese plant

DEUR ONTWAAK!-MEDEWERKER IN NIGER

GENIET jy ’n koue drankie op ’n warm dag? Baie gesinne in Wes-Afrika geniet ’n verkwikkende, helderkleurige drankie wat heerlik, gesond en goedkoop is—en, dit word van ’n plant gemaak. Die drankie word bissap genoem, en die blomplant waarvan dit gemaak word, is die tropiese rosella. Hierdie plant kan twee meter of hoër word. Dit groei in verskillende streke van die wêreld, maar veral in die droër klimate van lande soos Niger, Mali en Senegal.

Hoe bissap voorberei word

Een eetlepel van die plant se kelkblare word in ongeveer ’n liter water gegooi. Die mengsel word op kookpunt gebring en dan vir 15 tot 20 minute gelos om te trek. Die vloeistof word deur ’n sif gegooi om die kelkblare te verwyder, en die tee kan warm of koud gedrink word, met of sonder suiker. Vandag wil ons ’n koue drankie voorberei wat die kinders sal geniet; daarom gaan ons suiker byvoeg. Party gesinne berei ook die drankie voor met kruisement- of vanieljegeursel. Die koue, helderrooi bissap word in klein, deursigtige plastieksakkies gegooi wat dan toegeknoop word. Dit kan nou onder die kinders uitgedeel word, wat nie meer kan wag nie! Opgewonde skeur hulle ’n hoekie van die sakkie af en geniet hulle hulle gunstelingkoeldrank. Party verkies natuurlik om dit uit ’n glas te drink.

Buiten dat dit heerlik is, is bissap glo ook goed vir jou. Dit bevat kalsium, fosfor, yster, vitamiene A en C en nog meer! Sommige sê dat bissap ook ’n ligte lakseermiddel, ’n urineermiddel en ’n stimulant vir die lewer is. Hoe dit ook al sy, hoe gelukkig is ons tog dat hierdie plant nie net mooi is om na te kyk nie, maar ons ook van ’n gesonde, verkwikkende drankie voorsien!

[Foto-erkenning op bladsy 31]

Photo by Kazuo Yamasaki