Van ons lesers
Allerheiligeaand Ek wil graag iets regstel wat in julle artikel “Gewilde vierings—Onskadelike pret?” (8 Oktober 2001) genoem is. Julle verwys na “Guy Fawkes-aand”, wat in Brittanje ook algemeen bekend staan as die nag van vreugdevure. Guy Fawkes-aand is beslis ’n fees wat Christene moet vermy. Dit is ’n politieke fees, wat die teregstelling van ’n man verheerlik. Maar hoewel die datum van hierdie fees (5 November) naby aan dié van Allerheiligeaand is en daar sekere ooreenkomste tussen die nag van vreugdevure en Allerheiligeaand is, is die nag van vreugdevure nie deel van die spiritistiese fees van Allerheiligeaand nie.
P. B., Brittanje
“Ontwaak!” antwoord: Allerheiligeaand is gekies as ’n voorbeeld van ’n gewilde gebruik met ’n onsmaaklike oorsprong. Die Lanternfees in Taiwan en Guy Fawkes-aand is gemeld as vierings wat in sekere opsigte met Allerheiligeaand “ooreenkom”. Ons het egter nie bedoel om te impliseer dat hierdie twee vierings in werklikheid deel uitmaak van Allerheiligeaand of dat hulle dieselfde oorsprong het nie. Hoe dit ook al sy, met die oog op hulle ooreenkomste met Allerheiligeaand—’n viering wat duidelik spiritistiese ondertone het—sal dit verstandig wees as lesers ondersoek instel na die oorsprong van hierdie feeste wanneer hulle besluit of hulle daaraan gaan deelneem of nie.
Dankie dat julle die verband tussen Allerheiligeaand en die okkulte getoon het. Mense beskou dit as onskadelike pret, maar party het as gevolg daarvan in groot moeilikheid beland. Kinders wat in die nag rondloop, kan hulleself beseer of gedokterde lekkergoed ontvang. ’n Meisie in ons buurt moes hospitaal toe geneem word. Sommige tieners meen dat Allerheiligeaand ’n geleentheid is om in die strate rond te loop en mense se huise te beskadig. Een welmenende huisbewoner wat lekkergoed uitgedeel het, het gevind dat haar vrygewigheid geensins waardeer is nie; ’n kind het ’n leuen vertel en haar daarvan beskuldig dat sy gedokterde lekkergoed uitgedeel het. Ondanks al hierdie dinge is Allerheiligeaand steeds ’n belangrike viering in ons buurt. Ek hoop al my bure sal julle uitstekende artikel lees.
G. H., Verenigde State
Speelgoed Baie dankie vir die brokkie in “Ons beskou die wêreld” met die titel “Te veel speelgoed” (8 Oktober 2001). Ek het ’n dogtertjie van 15 maande wat vier trommels vol speelgoed in haar kamer gehad het. Alles was altyd rondgestrooi, en sy kon nooit besluit waarmee sy wou speel nie. Toe my pa hierdie brokkie in die Ontwaak! vir my wys, het ek dit dadelik gelees en haar speelgoed verminder tot ’n halwe trommel. Nou geniet my dogter dit weer om met haar speelgoed te speel.
P. G., Duitsland
Leif Eriksson Ek wil julle bedank vir die artikel “Leif Eriksson—Het hy Amerika ontdek?” (22 September 2001). Ons is besig om van Columbus in ons geskiedenisklas te leer. Toe ons onderwyser ons vertel dat Columbus Amerika ontdek het, het ek my hand opgesteek en gesê dat ek gelees het Leif Eriksson het dalk Amerika 500 jaar vroeër ontdek. Ek het nog ’n bietjie navorsing gedoen en kopieë gemaak van ’n paar ander Ontwaak!-artikels oor Columbus. My onderwyser het daardeur gelees en was beïndruk met alles wat ek gekry het.
M. D., Duitsland
Bybellees Dankie vir die artikel “Jongmense vra . . . Hoe kan ek Bybellees genotvoller maak?” (22 Augustus 2001). Ek het altyd gedink dat dit vervelig is om die Bybel te lees en dat ek dit nooit sal regkry om deur so ’n dik boek te lees nie. Maar toe ek danksy hierdie artikel die Bybel probeer lees het, het ek gevind dat dit baie interessant is. Nou lees ek die Bybel gereeld.
M. S., Duitsland