Wanneer slawerny tot ’n einde sal kom!

VRYHEID! Min woorde lê die mens so na aan die hart. Mense het geveg en gely, gelewe en gesterwe, in hulle strewe na vryheid. Maar ongelukkig het baie dit gedoen sonder om enigsins nader aan hulle doelwit te kom. Is daar hoop om van slawerny bevry te word—’n hoop wat nie in frustrasie en teleurstelling sal eindig nie? Daar is.

Die apostel Paulus is geïnspireer om van God se belofte te skryf: “Die skepping [sal] self ook van die slawerny aan die verderflikheid vrygemaak . . . word en die glorieryke vryheid van die kinders van God . . . hê” (Romeine 8:21). Maar hoe kan ons seker wees dat God werklik sulke “glorieryke vryheid” gaan meebring? Een manier is om te ondersoek hoe God deur die geskiedenis heen met die mens gehandel het.

“Waar die gees van Jehovah is, daar is vryheid”, sê die Bybel (2 Korintiërs 3:17). Ja, God se gees, oftewel werkende krag, is uiters kragtig. Hy gebruik dit al baie lank om vryheid op baie maniere teweeg te bring. Hoe so? Wel, ons moet in gedagte hou dat daar baie verskillende soorte slawerny is. Ons het reeds een van die wreedste soorte bespreek, waar die sterke die swakke deur dwang en geweld tot slaaf maak. Maar kom ons kyk na ’n paar ander vorme van slawerny.

Mense kan hulleself verslaaf aan verskillende dinge waarvan dit uiters moeilik is om weg te breek. En mense kan slawe word van leuens en bedrog, as hulle mislei word om ’n lewe van slawerny aan valse leerstellings te lei. Die verraderlikste vorm van slawerny is een wat ons almal teister—of ons dit nou weet of nie—en die gevolge daarvan is dodelik. Dit moet egter beklemtoon word dat, hoewel ons in hierdie bespreking verskeie vorme van slawerny saam groepeer, ons hulle geensins met mekaar gelykstel nie. Hulle verskil grootliks. Nogtans het hulle belangrike dinge in gemeen. Uiteindelik sal die God van vryheid toesien dat die mensdom van die las van al hierdie vorme van slawerny verlos word.

Verslawings

Let op hoe die boek When Luck Runs Out kompulsiewe dobbelary beskryf: “’n Versteuring waar die individu deur ’n oorweldigende en onbeheerbare drang gedryf word om te dobbel. Die drang duur voort en word sterker en dringender . . . totdat dit uiteindelik alles wat in sy lewe betekenisvol is, binnedring, benadeel en dikwels vernietig.” Niemand weet hoeveel mense aan dobbelary verslaaf is nie. Na raming is daar in net een land, die Verenigde State, ongeveer sesmiljoen.

Alkoholverslawing kan net so vernietigend wees, indien nie meer vernietigend nie, en in die meeste plekke is dit baie algemener. In een groot land is tot die helfte van alle volwasse mans in ’n sekere mate alkoholiste. Ricardo, wat 20 jaar gelede ’n alkoholis geword het, verduidelik wat hierdie soort verslawing beteken: “Van die oomblik dat jy wakker word, smag jou liggaam na alkohol—om jou senuwees te kalmeer, jou probleme te vergeet of net om jou die nodige selfvertroue te gee om die lewe te hanteer. Dit word ’n obsessie by jou om ’n drankie te kry, en tog probeer jy jou en ander om jou oortuig dat jou gedrag normaal is.”

Alkohol is nie die enigste ding waaraan mense verslaaf raak nie. Wêreldwyd is daar miljoene mense wat dwelmmiddels gebruik. Daarbenewens gebruik ongeveer 1,1 miljard mense tabak—wat een van die verslawendste dwelms bevat. Baie mense wil baie graag met die gewoonte breek, maar hulle voel dat hulle slawe daarvan is. Is Jehovah in staat om mense van sulke kragtige vorme van slawerny te bevry?a

Neem byvoorbeeld Ricardo. “Ongeveer tien jaar gelede het ek besef dat alkohol my lewe beheer”, verduidelik Ricardo. “Dit het my huwelik, my werk en my gesin benadeel, en ek het besef dat ek nooit van my probleme ontslae sal kan raak as ek nie uit daardie greep ontsnap nie. Deur ’n studie van die Bybel het ek geleer dat ’n swaar drinker geteister word deur armoede—letterlik sowel as geestelik (Spreuke 23:20, 21). Ek wou ’n goeie verhouding met God hê, en my opregte bede vir God se hulp het my in staat gestel om eerlik met myself te wees. ’n Man het die Bybel met my gestudeer en ’n baie goeie vriend geword. Wanneer ek ’n terugslag gehad het, het hy nie moed opgegee nie, maar geduldig en ferm vir my gewys watter weg God vir ware Christene uiteensit.”

Ricardo voel vandag bevry van die slawerny waarin hy vroeër was—ten minste in ’n relatiewe sin. Hy erken geredelik dat hy aanvanklik van tyd tot tyd terugslae gehad het. “Maar ondanks daardie terugslae”, sê hy, “het my begeerte om Jehovah getrou te dien, saam met die ondersteuning van my vrou en mede-Christene, my gehelp om die situasie te hanteer. Ek sien uit na die tyd wat God belowe, wanneer ‘niemand sal sê, “ek is siek” nie’ en alkoholisme iets van die verlede sal wees. Intussen sal ek my daaglikse stryd voortsit om my liggaam aan te bied ‘as ’n offerande wat lewend, heilig en vir God aanneemlik is’.”—Jesaja 33:24; Romeine 12:1.

Regoor die wêreld het derduisende mense persoonlik God se hulp ondervind terwyl hulle daaraan gewerk het om van verskillende verslawings ontslae te raak. Hulle was weliswaar grootliks verantwoordelik vir hulle eie verslawing, dalk deur te swig voor die een of ander vorm van druk of versoeking. Hulle het nietemin gevind dat Jehovah ’n baie geduldige Bevryder is. Hy is bereid om almal wat hom werklik wil dien, te help en te versterk.

“Die waarheid sal julle vrymaak”

Wat van diegene wat slawe van leuens en bedrog is? Jesus Christus verseker ons dat vryheid van hierdie dinge moontlik is. “As julle in my woord bly”, het hy gesê, “is julle werklik my dissipels, en julle sal die waarheid ken, en die waarheid sal julle vrymaak” (Johannes 8:31, 32). Destyds was baie van die mense wat na hom geluister het, slawe van ’n streng stel wette wat op die Fariseërs se tradisies gegrond was. Trouens, Jesus het van die godsdiensleiers van sy dag gesê: “Hulle bind swaar vragte saam en sit dit op die skouers van die mense, maar self is hulle nie bereid om dit met hulle vinger te verroer nie” (Matteus 23:4). Jesus se leringe het mense uit hierdie slawerny bevry. Hy het godsdiensleuens as sodanig aan die kaak gestel en selfs die bron daarvan geïdentifiseer (Johannes 8:44). En hy het die leuens met die waarheid vervang, en God se redelike vereistes vir die mensdom duidelik geopenbaar.—Matteus 11:28-30.

Soos Jesus se dissipels vind duisende mense vandag dat hulle met God se hulp kan wegbreek van godsdiensleuens en valse tradisies waarvan hulle slawe was. Nadat hulle die verkwikkende waarhede van die Bybel geleer het, is hulle bevry van die onderdrukkende vrees vir die dooies, vry van angs oor ewige foltering in ’n brandende hel en vry van die druk om swaar verdiende geld te betaal vir dienste deur geestelikes wat beweer dat hulle Christus verteenwoordig—die een wat gesê het: “Julle het verniet ontvang, verniet moet julle gee” (Matteus 10:8). Daarbenewens is daar selfs ’n groter vryheid op hande.

Die verraderlikste vorm van slawerny

Let op hoe Jesus ’n verraderlike vorm van slawerny beskryf het, wat vroeër gemeld is, en wat elke man, vrou en kind op aarde raak: “Voorwaar, voorwaar, ek sê vir julle: Elkeen wat sonde doen, is ’n slaaf van die sonde” (Johannes 8:34). Wie kan sê dat hy nie sondig nie? Selfs die apostel Paulus het erken: “Die goeie wat ek wil, doen ek nie, maar die slegte wat ek nie wil nie, dit beoefen ek” (Romeine 7:19). Hoewel niemand homself van die bande van sonde kan bevry nie, is ons situasie nie hopeloos nie.

Jesus het sy dissipels verseker: “As die Seun julle dan vrymaak, sal julle werklik vry wees” (Johannes 8:36). Die vervulling van hierdie belofte sal in werklikheid bevryding van die skadelikste van alle vorme van slawerny beteken. Om te verstaan hoe ons daarvan bevry kan word, moet ons eers kyk hoe ons in die eerste plek slawe geword het.

Die Bybel toon dat God die mens met wilsvryheid geskep het, sonder enige neiging tot sonde. Maar ’n selfsugtige, onsigbare geesseun van God wou mag oor die mensdom uitoefen, ongeag watter lyding dit oor die mensdom sou bring. Om dié doel te bereik, het hierdie opstandige engel, wat later Satan die Duiwel genoem is, ons eerste menseouers, Adam en Eva, teen God laat draai. Nadat Adam God se spesifieke instruksies opsetlik verontagsaam het, het hy nie net self ’n sondaar geword nie, maar ook onvolmaaktheid en die dood aan al sy nakomelinge oorgedra (Romeine 5:12). Uiteindelik het Satan ‘die heerser van die wêreld’ geword, en ‘die sonde het as koning oor die mensdom geheers saam met die dood’.—Johannes 12:31; Romeine 5:21; Openbaring 12:9.

Hoe kan ons bevry word? Deur dissipels van Jesus te word, kan ons baat vind by Christus se offerdood, wat die mag het om “die een tot niet te maak wat die vermoë het om die dood te veroorsaak, dit is die Duiwel”, en om “almal te bevry wat uit vrees vir die dood hulle hele lewe lank aan slawerny onderworpe was” (Hebreërs 2:14, 15). Stel jou net voor—bevryding van slawerny aan sonde en die dood! Is sulke vryheid nie ’n wonderlike gedagte nie?

Maar wat van die soort slawerny wat ons aan die begin bespreek het? Sal daar ooit ’n einde wees aan die gedwonge verslawing van mense?

’n Vaste grondslag vir hoop

Ons kan ongetwyfeld seker wees dat so ’n walglike vorm van slawerny beëindig sal word. Waarom? Wel, dink hieraan: Jehovah God was direk verantwoordelik vir die grootste uittog na vryheid in die ganse mensegeskiedenis. Jy ken moontlik die geskiedenisverslag.

Die nasie Israel was slawe in Egipte; hulle is gedwing om swaar handearbeid te verrig en is aan wrede behandeling onderwerp. Hulle het tot God om hulp geroep, en in sy groot barmhartigheid het hy hulle verhoor en opgetree. Jehovah het Moses en Aäron as sy woordvoerders gebruik en ’n bevel uitgevaardig dat die Egiptiese Farao die Israeliete vrylaat. Die trotse koning het herhaaldelik geweier, selfs nadat Jehovah ’n reeks verwoestende plae oor die land gebring het. Maar toe het God Farao op sy knieë gedwing. Uiteindelik was die Israeliete vry!—Eksodus 12:29-32.

Dit is ’n opwindende verslag, nie waar nie? Maar jy wonder dalk waarom God nie vandag iets soortgelyks gedoen het nie. Waarom het hy nie in menseaangeleenthede ingegryp en ’n einde aan slawerny gemaak nie? Onthou, Jehovah is nie ‘die heerser van die wêreld’ nie—Satan is. Weens die uitdagings wat daar in Eden geopper is, het Jehovah hierdie goddelose Teenstander toegelaat om ’n beperkte tyd lank te heers. Slawerny, verdrukking en wreedheid is bloot kenmerke van Satan se heerskappy. Onder hierdie invloed het menseheerskappy ’n betreurenswaardige rekord opgebou. Die Bybel gee ’n bondige opsomming van daardie rekord: “Die mens [het] oor die mens geheers . . . tot sy nadeel.”—Prediker 8:9.

Maar hoe lank nog? Die Bybel verduidelik dat ons in “die laaste dae” lewe, ’n tyd wanneer selfsug en hebsug hoogty sal vier (2 Timoteus 3:1, 2). Dit beteken dat God se Koninkryk, waarvoor Jesus ons leer bid het, binnekort ’n regverdige samelewing tot stand sal bring waarin slawerny nie toegelaat sal word nie (Matteus 6:9, 10). Jesus Christus, God se aangestelde Koning, sal optree en elke spoor van slawerny uitwis totdat die laaste vyand, die dood, tot niet gemaak is.—1 Korintiërs 15:25, 26.

Wanneer daardie dag uiteindelik aanbreek, sal die getroue mensdom sien dat die bevryding van God se volk uit slawerny in Egipte maar net ’n klein voorskou was van hierdie veel groter bevryding. Ja, mettertyd sal “die skepping self ook van die slawerny aan die verderflikheid vrygemaak . . . word”. Uiteindelik sal almal “die glorieryke vryheid van die kinders van God” ten volle kan geniet.—Romeine 8:21.

[Voetnoot]

[Prent op bladsy 7]

In die Verenigde State alleen is daar na raming sesmiljoen mense wat aan dobbelary verslaaf is

[Prente op bladsy 7]

Honderdmiljoene is aan dwelms, alkohol en tabak verslaaf

[Prente op bladsy 8, 9]

Soos Ricardo het duisende al God se hulp ervaar om met verslawende gewoontes te breek

[Prente op bladsy 10]

Soos die eertydse Israeliete uit slawerny bevry is, sal ware aanbidders van God binnekort ’n veel groter bevryding geniet