“’n Gedenkteken vir die Duiwel self”

DEUR ONTWAAK!-MEDEWERKER IN SPANJE

DAAR is ’n buitengewone standbeeld in die stad Madrid, Spanje. Die voorkoms en die naam daarvan—“Die gevalle engel”—sal iemand wat in die verbygaan daarna kyk, dalk nie verbaas nie. Maar ’n nadere ondersoek sal aan die lig bring dat dit ’n gedenkteken is vir niemand anders nie as Satan die Duiwel!

’n Besoeker aan Spanje, wat tradisioneel ’n Katolieke land is, verwag om standbeelde van engele of “heiliges” te sien, maar nie een wat aan die heerser van die demone gewy is nie. Ricardo Bellver, ’n 19de-eeuse Spaanse beeldhouer, het egter besluit om van die tradisie af te wyk. Hy was bekend met John Milton se epiese gedig Paradise Lost, wat beskryf hoe Satan weens sy trots en opstandigheid uit die hemel gewerp is. In 1874 het Bellver ’n standbeeld voltooi wat hierdie dramatiese val uitbeeld.

Bellver het nie, soos in die tradisionele voorstellings van Satan, die Duiwel as ’n monster met horings uitgebeeld nie. Inteendeel, hy het die heerser van die demone voorgestel as ’n pragtige maar verdorwe engel toe hy uit die hemel gewerp is (Openbaring 12:9). En hierdie voorstelling kom meer ooreen met wat die Bybel sê.a

Wat het die mense van Madrid van hierdie standbeeld gedink? Volgens ’n kunsgeskiedkundige het sommige dit skokkend gevind dat ’n standbeeld vir Satan opgerig sou word. Die Spaanse regering het egter die geld daarvoor voorsien, en die standbeeld het twee kunspryse gewen, een in Madrid en die ander by die Internasionale Tentoonstelling van Parys in 1878. Kuns het oor tradisie geseëvier, en teen 1879 het die indrukwekkende bronsstandbeeld sy plek in die Retiro-park ingeneem.

In vandag se sekulêre samelewing lok hierdie standbeeld vir Satan min reaksie uit. “Die stad Madrid behoort trots te wees dat dit die enigste stad in die wêreld is wat ’n gedenkteken vir die Duiwel self opgerig het”, sê María Isabel Gea in haar boek Curiosidades y Anécdotas de Madrid (Rariteite en verhale van Madrid). Hoe dit ook al sy, van die duisende wat elke Sondag die Retiro-park besoek, skenk min mense enige aandag aan die standbeeld.

Net so besef min mense vandag dat Satan die onsigbare oorsaak van baie van die wêreld se probleme is (Openbaring 12:12). Maar aangesien die Skrif so duidelik na hom verwys, twyfel Bybelstudente nie aan sy bestaan of sy invloed nie. Jesus het Satan se direkte versoekings weerstaan. Hy het hierdie bose geesskepsel ook beskryf as “’n leuenaar en die vader van die leuen” en as ‘’n mensemoordenaar wat nie in die waarheid vasgestaan het nie’.—Johannes 8:44; Matteus 4:1-11.

Terwyl die aarde erger weë as ooit tevore ondervind, is dit noodsaaklik om die invloed van hierdie gefrustreerde gevalle engel teë te staan (Jakobus 4:7).b Intussen kan liefhebbers van waarheid en geregtigheid vertroosting put uit die wete dat Satan uit die hemel gewerp is en dat dit ’n voorspel is tot sy naderende vernietiging wanneer Christus “die werke van die Duiwel . . . verbreek”.—1 Johannes 3:8.

[Voetnote]