Die Bybel se beskouing
Hoe beskou God geweld?
GEWELD kom algemeen voor en neem baie vorme aan. Buiten oorloë is daar sport-, dwelm-, bende-, skool- en werkverwante geweld, en dit word ook as vermaak opgedis. Dit lyk selfs of gesinsgeweld in baie huise iets algemeens is. ’n Onlangse studie het byvoorbeeld daarop gedui dat 1,2 miljoen mans en vrouens in Kanada ten minste een keer in ’n onlangse vyfjaarperiode deur hulle huweliksmaat aangerand is. ’n Ander studie het tot die gevolgtrekking gelei dat ongeveer 50 persent van vroueslaners ook hulle kinders mishandel.
Jy vind sulke gewelddade sekerlik net so ontstellend soos die meeste ander mense. Nogtans het geweld ’n belangrike element geword in baie van die hedendaagse vermaak. Gehore word nie net geboei deur die geweld wat in rolprente uitgebeeld word nie, maar ook deur werklike fisiese aggressie op die televisie. Boks en ander gewelddadige sportsoorte is in talle lande baie gewild. Maar hoe beskou God geweld?
Geweld se lang geskiedenis
Geweld het ’n lang geskiedenis. Die eerste fisiese gewelddaad deur ’n mens wat in die Bybel opgeteken is, word in Genesis 4:2-15 beskryf. Kain, die eerste seun van Adam en Eva, het jaloers geword op sy broer Abel en hom koelbloedig vermoor. Hoe het God gereageer? Die Bybel verduidelik dat Jehovah God Kain baie swaar gestraf het omdat hy sy broer om die lewe gebring het.
In Genesis 6:11 lees ons dat die aarde meer as 1 500 jaar ná daardie voorval “vol geweld” was. Hoe het God weer eens gereageer? Hy het die regverdige Noag beveel om ’n ark te bou waarin hy en sy gesin veilig sou wees tydens ’n vloed wat Jehovah oor die aarde sou bring en waardeur daardie gewelddadige samelewing “verdelg” sou word (Genesis 6:12-14, 17). Maar waarom was die mensdom so geneig tot geweld?
Die invloed van demone
Die Genesisverslag toon dat seuns van God, ongehoorsame engele, as mense gematerialiseer, met vroue getrou en kinders voortgebring het (Genesis 6:1-4). Hulle nageslag, wat die Nefilim genoem is, was buitengewoon groot en manne van naam. Onder die invloed van hulle demoonvaders het hulle gewelddadige bullebakke geword. Toe die vloedwaters styg en die aarde bedek, het hierdie goddelose bullebakke omgekom. Maar die demone het blykbaar gedematerialiseer en na die geesteryk teruggekeer.
Die Bybel maak dit duidelik dat hierdie opstandige engele sedertdien ’n sterk invloed op mense uitoefen (Efesiërs 6:12). Hulle leier, Satan, word die oorspronklike “mensemoordenaar” genoem (Johannes 8:44). Daarom kan daar tereg gesê word dat die geweld op die aarde demonies, of satanies, is.
Die Bybel waarsku teen die verleidelike krag van geweld. In Spreuke 16:29 sê dit: “’n Man van geweld sal sy naaste verlei en laat hom beslis op ’n weg gaan wat nie goed is nie.” Vandag word baie mense verlei sodat hulle gewelddade goedkeur, bevorder of pleeg. Miljoene mense word ook beïnvloed om genot te put uit vermaak waarin geweld verheerlik word. Die woorde van Psalm 73:6 gee ’n baie akkurate beskrywing van vandag se geslag. Die psalmis sê: “Hoogmoed [was] vir hulle ’n halssnoer; geweld omhul hulle soos ’n kleed.”
God haat geweld
Hoe moet Christene hulle in ’n gewelddadige wêreld gedra? Die Bybelverslag van Jakob se seuns Simeon en Levi gee ons betroubare leiding. Hulle suster Dina het met die onsedelike mense van Sigem vriende gemaak. Dit het daartoe gelei dat sy deur ’n Sigemiet onteer is. Uit weerwraak hiervoor het Simeon en Levi al die manne van Sigem sonder enige genade vermoor. Later het Jakob onder Goddelike inspirasie sy seuns se onbeheerste woede vervloek met die woorde: “Simeon en Levi is broers. Instrumente van geweld is hulle moordwapens. Moenie in hulle intieme groep kom nie, o my siel. Moenie met hulle vergadering verenig word nie.”—Genesis 49:5, 6.
In ooreenstemming met hierdie woorde assosieer Christene nie met diegene wat geweld bevorder of gewelddade pleeg nie. Dit is duidelik dat God diegene haat wat geweld bevorder. Die Bybel sê: “Jehovah ondersoek die regverdige sowel as die goddelose, en Sy siel haat beslis elkeen wat geweld liefhet” (Psalm 11:5). Christene word vermaan om alle vorme van onbeheerste woede, selfs skeltaal, te vermy.—Galasiërs 5:19-21; Efesiërs 4:31.
Sal geweld ooit tot ’n einde kom?
Die eertydse profeet Habakuk het Jehovah God gevra: “Hoe lank sal ek tot u om hulp roep teen geweld?” (Habakuk 1:2). Dalk het jy al iets soortgelyks gevra. God het Habakuk geantwoord en belowe om “die goddelose” te verwyder (Habakuk 3:13). Die profetiese boek van Jesaja bied ook hoop. Daarin belowe God: “Van geweld sal daar nie meer in jou land gehoor word nie, van geen plundering en verbreking binne jou grense nie.”—Jesaja 60:18.
Jehovah se Getuies is vol vertroue dat God binnekort alle vorme van geweld sowel as diegene wat dit bevorder van die aarde sal verwyder. Dan sal die aarde nie vol geweld wees nie, maar “vol . . . van die kennis van die heerlikheid van Jehovah soos die waters die see bedek”.—Habakuk 2:14.
[Prent op bladsy 16]
Geweld het by Kain begin toe hy Abel doodgemaak het