Ons swaar tye—Waarom so gewelddadig?
AFSTOOTLIKE, lewensgevaarlike geweld teister die mensdom al sedert opstand teen die regmatige soewereiniteit van God in die tuin van Eden. Die oorspronklike opstandeling, Satan, het deur sy bedrog die “mensemoordenaar” geword van Adam en die hele ongebore mensegesin wat nog in sy lendene was (Johannes 8:44; Romeine 5:12). Kort daarna is Abel gewelddadig deur Kain vermoor terwyl Kain “baie kwaad” was (Genesis 3:1-4:15). ’n Vreedsame wêreld het geëindig. Sedertdien was daar geweld! Maar talle mense het nou die onrustige gevoel dat die geweld in ons tyd anders is, dat dit hand-uit geruk het, dat dit bewys lewer van ’n dodelike siek samelewing. Is dit bloot ’n illusie? Was dit nie maar altyd so sleg nie?
Kanadese filosoof George Grant het ons kritieke geskiedenistydperk bestempel as “die gewelddadigste tydperk wat die wêreld nog ooit beleef het”. Hy is nie al een wat hierdie beskouing huldig nie. Psigiater Thomas Radecki noem dit “’n wêreldwye epidemie van geweld”, en voeg by: “Ons vermoor mense 300 persent meer dikwels per hoof as ons ouers se geslag, . . . verkrag hulle 500 persent meer dikwels, en rand hulle 600 persent meer dikwels aan.”
Dr. Everett C. Koop, geneesheer-generaal in die Verenigde State, het die euwel beskryf as ’n “epidemie van geweld” wat “die gemeenskap en gesinslewe bedreig”. Die geweld wat deesdae in Noord-Amerikaanse skole toeneem, is ’n skrikwekkende voorbeeld, ’n Amerikaanse TV-nuusberig het gemeld dat “driemiljoen hoërskoolkinders elke maand slagoffers van misdade is wat wissel van diefstal tot verkragting en moord”.—Ons kursiveer.
Weens die uitbreiding van terrorisme het “Europa ’n bloeddeurdrenkte slagveld geword”, sê ’n Franse kommentator. Die omvang van die gevaar blyk uit sy verdere opmerking dat die “Verenigde Koninkryk se sekuriteitsnywerheid groter is as die polisiemag, die vloot of die leër”. (Ons kursiveer.) Geen wonder dat die tagtigerjare nou “die Tweede Skrikdekade” genoem word nie.
Waarom so gewelddadig?
Noukeurige navorsers van die verontrustende toename in geweld in ons gevaarlike tye verstrek talle oorsaaklike faktore: die klem wat die media op gewelddade, misdadigheid en verdorwenheid lê; die wyse waarop wêreldleiers hulle skaamteloos tot geweld wend om aan bewind te bly; die gevoel van uiterste frustrasie oor onregte wat skynbaar nooit opgelos word nie en wat sommige laat dink dat vuurwapens iets kan uitrig wat verkiesings nie kan nie; die gevoellose wyse waarop miljoene ongeborenes wreed hulle lewe ontneem word deur aborsie; die manier waarop godsdiensleiers “regverdige” oorloë goedpraat maar sedelike beginsels verwaarloos. Die wêreld raak gou ongevoelig, gehard teenoor geweld. En daar is ander redes ook.
Die permissiwiteit van sogenaamde progressiewe denke het in ons tyd gebruike en sedelike standaarde verander. Dit het die beperkinge verwyder wat voorheen ’n demper geplaas het op gesindhede en optrede wat tot geweld kan lei. Die treurige gevolge kan veral duidelik in jongmense gesien word. Kinderpsigiater dr. Thomas Millar glo dat “permissiewe gesindhede verantwoordelik is vir ’n toenemend gewelddadige Noord-Amerikaanse samelewing”. Hy het gesê: “Daar was nog nooit in die geskiedenis van die wêreld soveel massamoordenaars nie.”
Amptelike verslae oor die ongeëwenaarde styging in onbeheerste geweld onder tieners in na-oorlogse Japan skryf die situasie aan die verbrokkeling van die gesin toe. Japan se minister van opvoeding in 1983 het gesê: “Daar is deesdae nie ’n enkele boek wat kinders leer dat hulle hulle ouers moet eer nie.” Daar word ook erken dat “die daaglikse dosis onverwaterde barbaarsheid wat in strokiesverhale, rolprente en televisieprogramme aangebied word nog ’n faktor is wat geweld onder Japannese jeugdiges aanmoedig”.
Dit is dus nie ’n oordrywing om te sê dat wat ’n persoon lees of sien sy gesindheid beïnvloed nie. Vyandelikhede word verhoog, sodat “die aanskouing van geweld [dikwels] tot geweld lei”. Een verslag het gesê: “Die sportarena word inderdaad slegs deur die slagveld van ’n guerrilla-oorlog in geweld oortref.” ’n Deeglike studie wat in Psychology Today gepubliseer is, beweer dat gewelddadige seksrolprente mans ongevoelig maak teenoor verkragting en die slagoffers van verkragting. Dr. Leonard Eron van die Universiteit van Illinois sê ook: “As daar voortdurend na geweld op televisie gekyk word, het dit ’n blywende uitwerking op gedrag—en dit is nie ’n onbeduidende uitwerking nie.” En tog kan kinders in Amerika Saterdagoggende altesaam ’n stuk of 30 gewelddade per uur op TV aanskou! Die gevolgtrekking van ’n opsomming van meer as 2 500 studies wat die afgelope tien jaar gedoen is, is: “Geweld op televisie lei tot aggressiewe gedrag.”
Seksuele misdrywe en perversiteite kweek ook geweld deur alle fatsoenlikheid te vernietig (Romeine 1:26, 27). Vuil taal, pornografie en geslagsafwykings tel onder die kragtigste “ondermyners van fatsoenlikheid’”. Dit is interessant dat die Bybel daarop wys dat toe opstandige engele gedurende die laaste dae voor die Vloed op aarde verskyn het om ongeoorloofde geslagsdade te pleeg, dit ’n verwante probleem veroorsaak het. God het self vir Noag gesê: “Die aarde is deur hulle vervul met geweld” (Genesis 6:1-5, 13). Hulle seksueel gewelddadige invloed het geëindig toe God daardie losbandige wêreld met water verdelg het.—Genesis 6:7; 7:11-24.
“Die laaste dae”
Jesus het die einde van die huidige gewelddadige stelsel voorspel deur te sê: “Soos dit gebeur het in die dae van Noag, so sal dit ook wees in die dae van die Seun van die mens” (Lukas 17:26). Sou dit weer grootskaalse geweld insluit weens die invloed van goddelose engele? Ja, want Jesus het nie net vir daardie toekomstige tyd wydverspreide ongeregtigheid voorspel nie, maar het in Openbaring die oorsaak daarvan geïdentifiseer. Hy vertel hoe die oorspronklike opstandeling, Satan self, uit die hemel gewerp word en sy engele saam met hom. Waarheen? Die geïnspireerde gesig antwoord: “Wee die bewoners van die aarde . . . want die duiwel [die oorspronklike geweldenaar] het na julle neergedaal met groot woede.” Gedurende die tyd van die einde van ’n sterwende orde word die mensdom dus nogeens geteister deur geweld—weer aangeblaas deur goddelose geeste!—Openbaring 12:7-12; 6:4; Mattheüs 24:12.
Hierdie verskerpte demoniese invloed moet dus nie oor die hoof gesien word as een van die redes vir die toenemende geweld in ons swaar tye nie. Een van die openbarings hiervan is die groeiende belangstelling in en betrokkenheid by die okkulte en allerhande spiritistiese gebruike.
As jy van mense lees wat geliefde familielede of vriende sinneloos vermoor omdat hulle “stemme” gehoor het wat hulle beveel het om dit te doen, of wanneer kultusleiers beveel dat onskuldige slagoffers wreed vermoor moet word, behoort dit ook nie verbasend te wees om te lees dat die moordenaars aktiewe Satanaanbidders was of op die een of ander manier daadwerklik by die okkulte betrokke was nie.—Deuteronomium 18:10-13; Galasiërs 5:19-21.
Daar is derhalwe baie belangrike redes waarom hierdie slegte dinge in ons swaar tye gebeur. Elkeen van die gemelde oorsake is in die een of ander opsig ’n skending van God se regverdige wette. Die oorspronklike opstand het nou saad geskiet. Die tragiese gevolge van wat gesaai is, word nou gemaai. God laat hom nie bespot nie (Galasiërs 6:7). Eintlik is hierdie geslag van ongeëwenaarde geweld presies wat die apostel Paulus in 2 Timotheüs 3:1-5 voorspel het. Hy sê ook wat die oorsake is: “Daar [sal] in die laaste dae swaar tye . . . kom. [Waarom?] Want die mense sal liefhebbers van hulleself wees, geldgieriges, . . . bandeloos [of, “gewelddadig”, Today’s English Version], wreed, . . . roekeloos.” Is dit nie presies wat ons vandag rondom ons sien nie? Ja, ons lewe in “die laaste dae”!
’n Hele geslag het binne ’n kort tydbestek ‘net aan hulleself begin dink’, terwyl ‘geldmaak vir hulle alles geword het’ (Die Lewende Bybel), en ‘hulle eerder liefde vir genot het as liefde vir God’ (NAV). Sulke selfvergoding is bloot ’n hedendaagse verwerping van Jehovah se soewereiniteit. Hierdie geslag word egter terselfdertyd deur sy gewelddadige beeld gedoem om verwyder en vervang te word.—1 Johannes 2:15-17.
Ons gewelddadige wêreld eindig!
As jy die Bybel se beskouing het, naamlik dat geweld sy oorsprong het in opstand teen die soewereiniteit van God, is dit nie moeilik om te verstaan dat geweld nie sal eindig en vrede nie weer herstel sal word voordat God hedendaagse opstandelinge tereg vir ewig verwyder nie. En dit is presies wat hy voornemens is om te doen. “Die God van vrede sal die Satan spoedig onder julle voete verbrysel” (Romeine 16:20). Al Satan se gewelddadige “saad” moet tot niet gaan. En Satan ook.—Genesis 3:15; Mattheüs 25:41.
Hoe heerlik sal die lewe nie wees wanneer Satan verwyder is nie! Die “Vredevors”, Jesus, sal dan seker maak dat daar “vrede sonder einde” is (Jesaja 2:2-4; 9:5, 6). Dit sal ’n splinternuwe orde wees “waarin geregtigheid woon” (2 Petrus 3:13). Die aarde se nuwe Heerser sal alle vorme van geweld, asook lyding en die dood, vir ewig verwyder. Hy sê: “Die dood sal daar nie meer wees nie. Ook leed, smart en pyn sal daar nie meer wees nie. Die dinge van vroeër het verbygegaan.”—Openbaring 21:1-4, NAV.
Soos in die dae van Noag het Jehovah liefdevol voorsiening gemaak vir redding uit ’n gewelddadige wêreld (Sefanja 2:2, 3). Totdat daardie redding kom, moet ons aanhou om God se Woord te bestudeer sodat ons ’n ingeligte geloof kan opbou. “Die geloof dan is ’n vaste vertroue op die dinge wat ons hoop, ’n bewys van die dinge wat ons nie sien nie. . . . want hy wat tot God gaan, moet glo dat Hy is en ’n beloner is van die wat Hom soek.”—Hebreërs 11:1, 6.
Met sterk geloof kan jy alle geweld verwerp (Mattheüs 26:52). Jy kan die sekerheid hê dat geregtigheid nog sal seëvier (Deuteronomium 32:4). Jy kan permissiwiteit in jou kinders teëwerk deur ‘hulle op te voed in die tug en vermaning van die Here’. Onthou, die Bybel is die boek wat kinders leer om hulle ouers te eer (Efesiërs 6:1-4). Julle kan as ’n gesin pornografie vermy en julle verstande met heilsame gedagtes vul (Filippense 4:8). Dit sal julle ook teen “bose geeste” beskerm.—Efesiërs 6:10-18.
Gelukkig kan die wete dat die toestande wat nou heers tydelik is en binnekort gaan eindig, dat daar ’n uitweg is, ons die krag gee om te volhard. Talle van Jehovah se Getuies sal dit beaam. Jy kan ook ‘hierdie dinge wat kom, ontvlug’. Jesus het oor hierdie selfde smarte gedurende hierdie tyd van die einde gesê: “As hierdie dinge begin gebeur, kyk dan na bo en hef julle hoofde op, omdat julle verlossing naby is.” Skep dus moed! Jesus sal die mensdom binnekort van alle verdrukking en geweld verlos.—Lukas 21:28, 36; Psalm 72:1, 2, 12, 14.