Die soeke na oplossings
MEER as honderd nasies het van 1972 af ’n internasionale verdrag onderteken wat die ontwikkeling, vervaardiging en opberging van biologiese wapens verbied. Hierdie verdrag, wat die Konvensie oor Biologiese en Gifwapens (BTWC) genoem word, was die eerste verdrag wat ’n hele klas wapens verbied het. Die tekortkoming van die verdrag was dat dit nie ’n manier uiteengesit het waarop vasgestel kon word of nasies die reëls nakom nie.
Dit is moeilik om te bevestig dat lande nie biologiese wapens ontwikkel nie, aangesien dieselfde tegnieke en kennis wat vir vreedsame doeleindes gebruik word, ook gebruik kan word om biologiese wapens te ontwikkel. Die feit dat biotegnologie hierdie “tweeledige gebruik” het, maak dit maklik om die ontwikkeling van wapens weg te steek in gisfabrieke en laboratoriums wat oënskynlik met wettige burgerlike bedrywighede besig is.
Afgevaardigdes van verskillende nasies het in 1995 ’n bindende protokol begin opstel om die probleme in verband met bevestiging op te los. Hulle het meer as ses jaar lank beraadslaag oor watter vaste maatreëls ingestel kan word om te verseker dat nasies hulle aan die BTWC onderwerp. Op 7 Desember 2001 het ’n drie week lange konferensie wat bygewoon is deur 144 van die partye tot die verdrag van 1972, op wanorde uitgeloop. Die probleem was dat die Verenigde State dit nie eens was met die sleutelvoorstelle oor hoe daar bevestig kan word dat ’n nasie hom aan die BTWC onderwerp nie. Die Verenigde State het aangevoer dat dit hulle aan spioenasie sou blootstel as hulle buitestanders sou toelaat om hulle militêre en nywerheidsfasiliteite na te gaan.
Wat voorlê
Biotegnologie het ontsaglike potensiaal om goed sowel as kwaad in die hand te werk. Ander vername tegnologiese rigtings—metaalkunde, plofstowwe, binneverbranding, lugvaart, elektronika—word alles nie net vir vreedsame doeleindes gebruik nie, maar ook vir vyandige doeleindes. Sal dit ook met biotegnologie die geval wees? Baie meen dat die antwoord op hierdie vraag ja is.
’n Verslag in 1999 deur die Amerikaanse Kommissie vir Nasionale Veiligheid het gesê: “Individue sowel as groepe . . . sal mag en invloed verkry, en baie sal skrikwekkende vernietigingsmiddele tot hulle beskikking hê. . . . Daar sal meer ad hoc-selle en individue wees, wat dikwels deur godsdiensywer, skynbaar onredelike kultiese opvattings of bittere haatdraendheid beweeg word. Terroriste kan nou tegnologie gebruik wat vroeër net vir groot state beskikbaar was en aanvalle rig teen yslike interne bevolkingsentrums.”
Hoewel ons nie weet wat in die onmiddellike toekoms sal gebeur nie, weet ons wat God vir die mensdom in gedagte het. Die Bybel belowe dat die tyd sal kom wanneer mense op aarde ‘in veiligheid sal woon, sonder dat iemand hulle laat bewe’ (Esegiël 34:28). As jy meer omtrent hierdie vertroostende belofte wil weet, kan jy gerus met Jehovah se Getuies in jou omgewing in aanraking kom of na die gepaste adres op bladsy 5 van hierdie tydskrif skryf.
[Prent op bladsy 10]
Navorsers ontwikkel maniere om antraks te neutraliseer
[Erkenning]
Photo courtesy of Sandia National Laboratories
[Prent op bladsy 10]
Konferensie oor Biologiese Wapens, 19 November 2001, Switserland
[Erkenning]
AP Photo/Donald Stampfli
[Prente op bladsy 11]
Die Bybel belowe ’n tyd wanneer almal ‘in veiligheid sal woon’