“Volmaakte lig”
AS JY al ooit aan ’n elektriese gloeilamp geraak het wat ’n rukkie aan was, weet jy dat dit baie warm kan word. Die hitte wat deur die gloeilamp afgegee word, is die gevolg van energie wat verlore gaan. ’n Tipiese gloeilamp gee slegs 10 persent van sy energie as lig af, terwyl 90 persent as hitte verlore gaan. In vergelyking hiermee is die klein liggewende insek wat die vuurvliegie genoem word (sien bo, vergroot) se energieverbruik amper 100 persent doeltreffend.
Vuurvliegies mors so min energie as hitte dat die lig wat hulle voortbring, al “volmaakte lig” genoem is. Hoe doen hulle dit? Die agterlyf van ’n vuurvliegie bevat ’n organiese stof wat as lusiferien bekend staan. Wanneer suurstof die agterlyf bereik deur ’n buis wat die abdominale tragea genoem word, meng dit met lusiferien, en die chemiese reaksie wat dan plaasvind, gee ’n dowwe geel tot rooigroen lig af.
Die selle wat die vuurvliegie se lig voortbring, bevat ook urinesuurkristalle, wat help om die lig weg van die insek se agterlyf te weerkaats. Wetenskaplikes sê dat vuurvliegies hulle lig gebruik om maats te lok en dat verskillende soorte vuurvliegies verskillende flikkerpatrone en -ritmes het.
Sou jy nie saamstem dat die manier waarop hierdie klein diertjies gemaak is, hulle Skepper, Jehovah God, loof nie? Ja, soos die psalmis gesê het: “Laat alles wat asemhaal, Jah loof.”—Psalm 150:6.
[Foto-erkenning op bladsy 31]
© Darwin Dale/Photo Researchers, Inc.