Hoe om jou kinders te beskerm

“Ouers speel verreweg die belangrikste rol daarin om kinders teen dwelm- en alkoholmisbruik te beskerm. Hulle moet vir hulle kinders ’n voorbeeld en ’n bron van inligting wees.”—DONNA SHALALA, SEKRETARIS VAN DIE AMERIKAANSE DEPARTEMENT VAN GESONDHEID EN MENSLIKE DIENSTE.

AS ’N OUER is jy dus die eerste linie van verdediging in die stryd teen dwelmmisbruik. Alle ouers besef ongelukkig nie hoe belangrik daardie rol is nie. “My pa was altyd besig”, sê Ireneu, ’n Brasiliaanse jeugdige. “Hy het nie baie met ons gesels nie. Ons het nooit enige raad oor dwelms gekry nie.”

In teenstelling hiermee, kyk na wat Alecxandros, ’n ander Brasiliaanse jeugdige, sê: “Wanneer daar TV-programme oor dwelmverslaafdes was, het my pa my en my broers geroep om daarna te kyk. Hy het vir ons gewys in watter ellendige toestand die verslaafdes is omdat hulle dwelms misbruik. Soms het hy die geleentheid gebruik om te vra of ons weet van jongmense by die skool wat by dwelms betrokke is. Hy het ons so teen die gevare van dwelmmisbruik gewaarsku.”

Het jy al die gevare van dwelms met jou kinders bespreek? Om dit te doen, sal jy jou moontlik hieroor moet inlig. Christenouers kan hulle kinders help om te besef dat hulle geestelik skade ly as hulle dwelms gebruik. Die Bybel spoor ons aan om ons liggaam vry te hou van alle verontreiniging, hetsy fisies of geestelik (2 Korintiërs 7:1). ’n Gereelde Bybelstudie met jou kinders kan ’n kragtige hulpmiddel wees om hulle te beskerm.a

“Vertroude vriend”

Dit is ook belangrik dat jou kinders jou moet vertrou. Jehovah is ’n “vertroude vriend” vir sy aardse kinders (Jeremia 3:4). Is jy ’n vertroude vriend vir jou kind? Luister jy werklik na jou kind? Het jou kind die vrymoedigheid om met sy probleme na jou toe te kom? Is jy meer geneig om te veroordeel as om te prys? Neem die tyd om jou kind te leer ken. Het hy of sy vriende? Wie is hulle? Die Bybel waarsku per slot van rekening: “Slegte omgang bederf nuttige gewoontes” (1 Korintiërs 15:33). Moenie bang wees om vaste perke te stel en liefdevolle dissipline te gee nie. Die Bybel sê: “Tugtig jou seun en hy sal aan jou rus verskaf en aan jou siel groot genot gee.”—Spreuke 29:17.

Moet ook nie die gevare verklein waarvoor jou kind te staan kom nie. Party ouers is dalk oorgerus en redeneer dat hulle kinders eenvoudig nie die soort is wat by dwelms betrokke sal raak nie omdat hulle uit ’n gerespekteerde gesin kom. Maar dr. José Henrique Silveira verduidelik: “Dwelmhandelaars probeer dikwels vriende maak met kinders van invloedryke mense omdat dit goeie besigheid vir hulle beteken.” Ja, as ’n gerespekteerde jeugdige verlei kan word om dwelms te gebruik, sal ander jongmense hom dikwels volg.

Wees dus realisties. Vind uit wat van die vroeë tekens van dwelmmisbruik is. Het jou kind byvoorbeeld skielik teruggetrokke, terneergedruk, vyandig of hardkoppig geword? Het hy hom om onverklaarbare redes van ou vriende of familielede onttrek? Dan het jy dalk rede om besorg te wees.

Ten spyte van ouers se prysenswaardige pogings swig party jongmense ongelukkig nog steeds voor druk en eksperimenteer hulle met dwelms. Wat moet jy doen as dit met jou kind gebeur?

Wanneer ’n jeugdige dwelms gebruik

“Toe my ouers dit uitvind”, sê Ireneu, “het my broer al ’n hele paar maande lank dwelms gebruik. Omdat hulle nooit gedink het dat een van hulle kinders eendag ’n dwelmslaaf sou word nie, het hulle aanvanklik paniekerig geraak. Aan die begin was die enigste straf waaraan my pa kon dink om my broer te lyf te gaan.”

As ouers uitvind dat hulle kind dwelms gebruik, sal hulle aan die begin heel moontlik woedend en gefrustreerd wees en voel dat hulle misluk het. Maar ’n feitestaat wat deur die Amerikaanse Onderwysdepartement vrygestel is, stel voor: “Moenie paniekerig raak nie! En moenie jouself blameer nie. Wat nou belangrik is, is om kalm te bly [en] uit te vind wat aangaan. . . . Dwelmgebruik is voorkombaar. Dwelmverslawing is ’n behandelbare siekte.”

Ja, wees liefdevol en ferm sodat die situasie nie vererger nie. As jy te kwaad of gefrustreerd word, kan dit jou kind se herstel belemmer. Daarbenewens wil jy jou kind help om ’n verantwoordelike volwassene te word wat vir homself dink. Neem dus die nodige tyd om eerlik met jou kind te redeneer sodat hy kan sien watter voordele dit inhou om nie dwelms te gebruik nie. Probeer om uit te vind wat in die weerspannige kind se hart is, en wees bereid om te luister.—Spreuke 20:5.

Ireneu vertel verder: “Later het my ouers hulle taktiek verander en my broer raad begin gee, hom verbied om na sekere plekke te gaan en sy klasse verander sodat hy nie elke dag met dieselfde skoolmaats sou assosieer nie. Hulle het hom toegelaat om net met sekere mense te assosieer en het begin om meer aandag aan hom en die res van die gesin te gee.”

Kyk hoe party ander ouers die situasie suksesvol hanteer het toe hulle uitgevind het dat hulle kinders dwelms gebruik.

Suksesverhale

“Dit is die ergste ding wat nog met ons gebeur het”, verduidelik Marcelo, ’n man wat in Sao Paulo, Brasilië, woon. “Ek en my vrou het niks vreemds in die gedrag van ons twee jong seuns opgemerk nie. Hulle het dikwels by restaurante gaan uiteet saam met ’n groep ander jongmense wat ons gedink het ons goed ken. Ons was verpletter toe ’n vriend vir ons vertel dat ons twee seuns dagga gebruik. Maar toe ons hulle daaroor uitvra, het hulle dit onmiddellik erken.”

Hoe het Marcelo sy seuns se situasie hanteer? “Ek en my vrou kon nie wegsteek hoe ontsteld ons was nie”, erken hy. “Maar hoewel ons hulle dwelmmisbruik veroordeel het, het ons nie hulle waarde as individue bevraagteken nie. Ons het besluit dat dit van daardie tyd af ons doel sou wees om ons seuns te help om met hulle dwelmmisbruik op te hou. Ons het openlik oor ons bedoelings gepraat, en albei seuns het ons voorwaardes aanvaar. Hulle sou hulle skoolopleiding voortsit, asook aanhou werk. Hulle sou nie meer toegelaat word om alleen uit te gaan nie. Ons het elke dag vir hulle gewys hoe lief ons vir hulle is, nie net op spesiale geleenthede nie. Aangesien ek ’n bouer is, het ek hulle so dikwels as wat ek kon saam met my geneem. Ons het begin om meer pret saam te hê en het meer oor die toekoms en die belangrikheid van betekenisvolle doelwitte in die lewe gepraat.” Marcelo en sy vrou het hulle seuns op hierdie manier gehelp om nie meer dwelms te misbruik nie.

Kom ons kyk na die geval van nog ’n Brasiliaanse vader. Sy seun Roberto vertel: “Toe my pa ontdek het dat my broer dwelms misbruik, het hy hom nie kwaai gekritiseer of gedissiplineer nie, maar my pa het vir hom gewys dat hy sy vriend is en sy vertroue gewen. Hy het uitgevind wie my broer se vriende is en watter plekke hy besoek het. Toe het hy met my broer begin redeneer en vir hom gewys dat hy nie dwelms of sulke vriende nodig het nie. My pa het vir hom gesê dat hy nie slapelose nagte wou deurbring op soek na hom nie.” In ’n poging om hulle seun te help, het sy stiefma haar man ten volle ondersteun. Albei het besef dat hulle onmiddellik iets moes doen en het besluit om hom by die huis te help.—Sien die venster “Kry hulp”.

Moenie tou opgooi nie!

In hierdie ‘kritieke tye wat moeilik is om deur te kom’, kan dit ’n vermoeiende uitdaging wees om kinders groot te maak (2 Timoteus 3:1). Maar jy moet nooit jou eie emosionele en geestelike behoeftes verwaarloos nie (Matteus 5:3). Hoe waar is die woorde van Spreuke 24:10 tog: “Was jy mismoedig in die dag van benoudheid? Jou krag sal gering wees.” Jy kan baie krag daaruit put deur met ware Christene te assosieer. By vergaderinge by die Koninkryksaal van Jehovah se Getuies kan jy ondersteuning en bemoediging vind.—Hebreërs 10:24, 25.

As jy jou gesin leer om geloof in God te hê, kan dit die beste beskerming teen dwelmmisbruik wees. God dwing jongmense natuurlik nie om ’n sekere lewensweg te volg nie. Maar hy gee wel goeie raad. In Psalm 32:8 sê God: “Ek sal jou insig gee en jou onderrig in die weg wat jy moet gaan. Ek sal raad gee met my oog op jou.” As ’n liefdevolle hemelse Vader wil God jongmense teen emosionele, fisiese en geestelike verderf beskerm (Spreuke 2:10-12). Wees verseker dat God ook ouers wat vasbeslote is om hulle kinders “in die dissipline en verstandsregulering van Jehovah op te voed”, sal help en ondersteun.—Efesiërs 6:4.

Nietemin kan die druk om kinders in vandag se wêreld groot te maak soms oorweldigend wees. Is daar enige verligting in sig?

[Voetnoot]

[Lokteks op bladsy 8]

“Dwelmgebruik is voorkombaar. Dwelmverslawing is ’n behandelbare siekte.”—AMERIKAANSE ONDERWYSDEPARTEMENT

[Venster op bladsy 6]

Kry hulp

Party ouers besluit dalk dat dit die beste sal wees as hulle kind onder mediese toesig is wanneer hy die onttrekkingsimptome van dwelms kry. Presies watter behandeling die ouers kies, is ’n persoonlike saak. Maar aangesien die gehalte van die sorg in rehabilitasieklinieke grootliks verskil, sal dit goed wees as ouers sake deeglik ondersoek voordat daar op behandeling besluit word. Volgens die psigiater Arthur Guerra de Andrade, ’n professor aan die Universiteit van Sao Paulo in Brasilië, herstel net 30 persent van die pasiënte in klinieke van hulle dwelmverslawing. Ouers moet dus werklik in die herstel van hulle kinders belangstel, selfs wanneer mediese deskundiges betrokke is.

[Venster/Prente op bladsy 7]

Hulp vir dié wat dwelms probeer opgee

Is jy ’n jeugdige wat van dwelmmisbruik probeer wegbreek? Indien wel, sal jy vind dat Bybellees en die toepassing van wat jy lees jou kan help in jou pogings om te herstel. Jy sal dit moontlik veral nuttig vind om die boek Psalms te lees, aangesien dit uitdrukking gee aan baie van die pynlike emosies wat jy dalk nou ondervind. As jy opreg tot God bid en werklik jou diepste gedagtes teenoor hom uitstort, sal dit jou ook help (Filippense 4:6, 7). Jy sal begin besef dat hy werklik vir jou omgee en dat hy wil hê dat jy suksesvol moet wees. Maar aangesien God niemand dwing om iets teen sy sin te doen nie, is dit noodsaaklik dat jy werklik die begeerte het om van dwelms weg te breek. Die psalmis Dawid wat dikwels God se ondersteuning ondervind het, het gesê: “Ek het vurig gehoop op Jehovah, en daarom het hy sy oor tot my geneig en my hulpgeroep gehoor. Hy het my ook uit ’n bruisende kuil opgetrek, uit die modder van die afsaksel. Toe het hy my voete op ’n groot rots gestel; hy het my voetstappe stewig gevestig” (Psalm 40:1, 2). Vandag gee God diegene wat die begeerte het om hulle lewe te verander en hom te dien, dieselfde soort ondersteuning.

[Prent op bladsy 5]

“My pa het ons teen die gevare gewaarsku”—Alecxandros

[Prent op bladsy 8]

Neem die tyd om jou kinders teen die fisiese en geestelike gevare van dwelmgebruik te waarsku

[Prent op bladsy 8]

Wees bewus van jou kind se assosiasie

[Prent op bladsy 8, 9]

As jy kalm bly, kan jy voorkom dat ’n slegte situasie vererger