Ons beskou die wêreld
Vrees vir vreemdelinge
“Meer as 80 persent van vroulike motoriste sal eerder die nag toegesluit in hulle onklaar motor deurbring as om hulp van ’n vreemdeling te aanvaar”, berig The Independent van Londen. ’n Opname onder 2 000 motoriste deur Direct Line Rescue het getoon dat 83 persent van vroue en 47 persent van mans hulp van die hand sal wys as hulle motor onklaar raak. Die meeste motoriste sal ook nie stilhou om iemand te help wie se motor gaan staan het nie. Veral vroue sal nie sommer stop nie omdat hulle bekommerd is oor hulle veiligheid en bang is dat dit dalk ’n lokval is. Die woordvoerder Nick Cole het gesê: “Dit is ’n tragiese aanklag teen ons samelewing dat baie bestuurders sal verkies om eerder die hele nag alleen in hulle motor te sit as om die vrees te ondervind om van aangesig tot aangesig met ’n vreemdeling te kom.”
Ongelowiges lei die gelowiges
Vroulike priesters in die Anglikaanse Kerk is “oor die algemeen baie meer skepties as hulle manlike kollegas oor . . . belangrike Christelike leerstellings”, berig The Times van Londen. ’n Opname onder bykans 2 000 geestelikes in die Anglikaanse Kerk het getoon dat “agt uit tien manlike priesters glo dat Jesus gesterf het om die sondes van die wêreld weg te neem”, in vergelyking met net 6 uit 10 vroulike priesters. En hoewel 7 uit 10 van die mans aan die opstanding van Jesus Christus glo, glo net 5 uit 10 van die vroue daaraan. Robbie Low, woordvoerder vir Cost of Conscience, wat die opname laat doen het, het gesê: “Dit is duidelik dat daar eintlik twee Kerke in die Anglikaanse Kerk is: die gelowige Kerk en die ongelowige Kerk, en dit is ’n skandaal. Meer en meer mense wat al hoe minder geloof het, word in gesagsposisies geplaas. Hierdie situasie, waar die gelowiges al hoe meer deur die ongelowiges gelei word, is iets wat nie geduld kan word nie.”
Pessimisties ondanks rykdom en gesondheid
Ondanks ’n verslag wat toon dat daar in 2001 “vir die derde agtereenvolgende jaar ’n verbetering in ekonomiese en maatskaplike toestande was”, is Kanadese nog steeds pessimisties oor hulle vooruitsigte, sê The Toronto Star. Navorsers by die Kanadese Raad vir Maatskaplike Ontwikkeling het gevind dat “Kanadese finansieel onveiliger voel, meer spanning by die werk ondervind, minder vertroue het dat die maatskaplike veiligheidsnet hulle sal help en kwesbaarder vir misdaad voel”. Party van die oorsake van kommer wat aangehaal is, is “salarisverhogings wat skaars met inflasie tred hou, hoër persoonlike skuldlaste, . . . lang waglyste vir sekere vorme van mediese behandeling, stygende medisynepryse, meer beserings weens padongelukke en ongegronde vrese dat geweldsmisdade aan die toeneem is”. Die skrywers van die verslag sê: “As ons sekuriteit as ’n gemoedstoestand omskryf, beweeg ons in die verkeerde rigting.”
Laer sterftesyfer
In die Verenigde State “het verbeterings op die gebied van noodbehandeling oor die afgelope 40 jaar gehelp om die sterftesyfer onder aanrandingslagoffers te laat daal”, sê ’n berig van Associated Press. Navorsers het gevind dat die aantal sterftes weens kriminele aanrandings van 1960 tot 1999 in die Verenigde State met feitlik 70 persent afgeneem het, hoewel daar gedurende dieselfde tydperk byna ses keer meer kriminele aanrandings was. Die studie het ook getoon dat 5,6 persent van die aanrandings in verswarende omstandighede in 1960 tot die dood gelei het, maar in 1999 het net 1,7 persent van die aanrandings tot die dood gelei. Navorsers het dit toegeskryf aan vooruitgang op verskeie mediese gebiede wat gehelp het om die sterftesyfer te laat daal, onder meer “die ontwikkeling van 911-nooddienste, die vinnige stabilisering en vervoer van traumaslagoffers, beter opleiding vir noodhulppersoneel en meer hospitale en traumaeenhede”, sê die berig. Professor Anthony Harris, van die Universiteit van Massachusetts in Amherst, het gesê: “Mense wat 20 jaar gelede in ’n lykshuis sou beland het, word nou bloot behandel en uit die hospitaal ontslaan, dikwels binne ’n paar dae.”
Afstandbeheertoestelle en kweekhuisgas
In Australië word die meeste kweekhuisgas in die wêreld per persoon vrygestel, berig The Sydney Morning Herald. ’n Vername oorsaak van hierdie probleem is “Australië se beheptheid met afstandbeheertoestelle”. Hoe hou hierdie toestelle verband met die vrystelling van kweekhuisgas? TV’s, video-opnemers en ander elektroniese toestelle moet in gereedmodus bly sodat die afstandbeheertoestel kan werk. Hulle word dus selde heeltemal afgeskakel. Die gevolg is dat kragstasies elke jaar ’n bykomende vyfmiljoen ton koolstofdioksied in die lug vrystel. Met ander woorde, die krag wat nodig is om elektriese toestelle in Australië in gereedmodus te hou, stel net soveel kweekhuisgas vry as die uitlaatgasse van eenmiljoen motors. Die koerant lewer kommentaar oor wat dit Australië se verbruikers kos en sê: “In 2000 het die krag wat deur toestelle in gereedmodus gebruik is, 11,6 persent van die elektrisiteit uitgemaak wat huishoudings gebruik het—’n bykomende $500 miljoen [R2 600 miljard].”
“Die eeu van titaan”?
Titaan is ’n ligte, sterk metaal wat uiters roesbestand is. Wetenskaplikes het dit vir die eerste keer in 1910 gelouter, en titaan se duursame eienskappe maak dit ideaal vir gebruik in vliegtuie en vir mediese doeleindes. Wanneer dit in die menseliggaam ingeplant word, veroorsaak dit selde ontsteking, en daarom kan dit as ’n plaasvervanger vir been gebruik word. ’n Verteenwoordiger van die Japannese Titaangenootskap het gesê: “Omdat titaan feitlik permanent teen roes bestand is, is amper geen onderhoud nodig (vir titaanprodukte) nie, en die metaal hoef nie ná net een gebruik weggegooi te word nie. Uit ’n omgewingsoogpunt sal titaan die 21ste eeu se gewildste metaal wees.” Die grootste nadeel is dat dit tien keer soveel as vlekvrye staal kos. Maar namate titaan se gebruike toeneem, word daar verwag dat die prys sal daal. Volgens Japan se Daily Yomiuri “het die geskiedenis van metaal verskuif van koper na staal en van staal na aluminium. Dit lyk of die 21ste eeu die eeu van titaan gaan wees.”
Swak opleiding vir die huwelik
Meer as 40 persent van die paartjies wat saamwoon voordat hulle trou, skei voor hulle tiende huweliksherdenking, berig New York se Daily News. Syfers wat deur die Nasionale Sentrum vir Gesondheidstatistiek saamgestel is, toon ook dat die moontlikheid twee keer groter is dat paartjies wat voor die huwelik saamwoon en meer as tien jaar getroud is, uiteindelik sal skei. “As ’n paartjie daaraan dink om ’n lewe saam te begin, [en] hulle glo nie dat dit reg is om saam te woon nie”, sê Matthew Bramlett, hoofsamesteller van die verslag, “is hulle ook die soort mense wat waarskynlik nie sal skei nie.” En mense wat voor die huwelik saamwoon, “is blykbaar baie minder gewillig om die pyn te verduur wat daarmee gepaardgaan om die probleme in ’n verhouding op te los”, sê die huweliksberader Alice Stephens.
Die soeke na ’n kerk
“Daar is vroeër gesê dat iemand wat eenkeer ’n Metodis is, altyd ’n Metodis sal wees. Nie meer nie”, berig The Sacramento Bee. Volgens Dexter McNamara, hoof van die Interkerklike Diensburo in Sacramento, “is kerklike bande nou vir mense minder belangrik . . . Mense is baie gewilliger om verskillende kerke op die proef te stel.” Wanneer aanbidders na ’n kerk soek, neem hulle dikwels dinge in ag soos die musiek, manier van aanbidding, die lengte van dienste, jeugprogramme, die grootte van die gemeente en hoe ver dit van die huis af is. “Daar is oorgenoeg kerke om van te kus en te keur”, sê Allan Carlson, hoof van die Howard-Sentrum vir die Gesin, Godsdiens en Gemeenskap. “In 1950 was 85 persent van die volwassenes in dieselfde kerk as hulle ouers”, maar nou “het hulle ’n groter keuse”.