Suikersiekte—“Die stille doder”
TOE Ken 21 jaar oud was, het hy om ’n onverklaarbare rede altyd dors gebly. Hy moes ook dikwels urineer—uiteindelik ongeveer elke 20 minute. Kort daarna het Ken se ledemate swaar begin voel. Hy was altyd moeg, en sy visie het verdof.
Die keerpunt het gekom toe Ken ’n virus gekry het. ’n Besoek aan die dokter het bevestig dat Ken nie net griep gehad het nie—hy het ook Tipe 1-diabetes mellitus, oftewel suikersiekte, gehad. Hierdie chemiese afwyking belemmer die liggaam se vermoë om gebruik te maak van sekere voedingstowwe, hoofsaaklik ’n bloedsuiker wat glukose genoem word. Ken het ses weke in die hospitaal deurgebring voordat sy bloedsuikervlak gestabiliseer het.
Dit was meer as 50 jaar gelede, en behandeling het gedurende die afgelope halfeeu aansienlik verbeter. Maar Ken ly nog steeds aan suikersiekte, en hy is nie die enigste een nie. Volgens skattings is daar wêreldwyd meer as 140 miljoen mense met suikersiekte, en volgens die Wêreldgesondheidsorganisasie kan hierdie syfer teen 2025 verdubbel. Dit is te verstane dat deskundiges bekommerd is oor die hoë voorkoms van suikersiekte. “Met die voorkomssyfers wat ons begin sien”, sê dr. Robin S. Goland, mededirekteur van ’n behandelingsentrum in die Verenigde State, “kan dit die begin van ’n epidemie wees.”
Kyk na hierdie kort verslae van regoor die wêreld.
AUSTRALIË: Volgens Australië se Internasionale Instituut vir Diabetes “is suikersiekte een van die ernstigste gesondheidsprobleme van die 21ste eeu”.
INDIË: Ten minste 30 miljoen mense het suikersiekte. “Sowat 15 jaar gelede het ons beswaarlik enige pasiënte onder 40 gehad”, sê ’n dokter. “Vandag is elke tweede persoon in hierdie ouderdomsgroep.”
SINGAPOER: Byna ’n derde van die bevolking tussen 30 en 69 het suikersiekte. Baie kinders—waarvan party net tien jaar oud is—is met suikersiekte gediagnoseer.
VERENIGDE STATE: Ongeveer 16 miljoen mense het die siekte, en elke jaar word nagenoeg 800 000 nuwe gevalle gediagnoseer. Miljoene het die siekte maar is onbewus daarvan.
Die behandeling van suikersiekte word bemoeilik, aangesien iemand al lank die siekte kan hê voordat dit gediagnoseer word. “Omdat die vroeë simptome redelik matig kan wees”, sê die tydskrif Asiaweek, “word suikersiekte dikwels nie gediagnoseer nie.” Gevolglik is suikersiekte al die stille doder genoem.
Aangesien hierdie siekte so algemeen voorkom en so ernstig is, sal die volgende artikels hierdie vrae bespreek:
● Wat is die oorsake van suikersiekte?
● Hoe kan suikersiektelyers daarmee saamleef?
[Venster/Prent op bladsy 4, 5]
Die oorsprong van die naam
Die term “diabetes mellitus” kom van ’n Griekse woord wat “om deur te loop” beteken en ’n Latynse woord wat “soet soos heuning” beteken. Hierdie woorde gee ’n gepaste beskrywing van die siekte, want water beweeg deur die suikersiektelyer asof dit van die mond deur die urinekanaal en dan reguit uit die liggaam loop. Die urine is ook soet weens die suiker daarin. Trouens, voordat doeltreffender tegnieke ontdek is, was een toets vir suikersiekte om ’n pasiënt se urine naby ’n miershoop uit te gooi. As dit die insekte gelok het, het dit getoon dat daar suiker daarin is.