Hoe die Bybel suikersiektelyers kan help
SELFBEHEERSING en ’n positiewe uitkyk is veral noodsaaklik vir die gesondheid en welsyn van suikersiektelyers. Maar hulle het volgehoue ondersteuning nodig om hierdie eienskappe aan te kweek. Gesinslede en vriende moet die suikersiektelyer dus nie in die versoeking bring om ongesonde kos te eet nie deur miskien te sê: ‘Net hierdie een keer sal nie saak maak nie.’ “My vrou is ’n regte steunpilaar”, sê Harry, wat hartprobleme en Tipe 2-diabetes het. “Sy hou nie kos in die huis wat ek nie mag eet nie. Maar party ander verstaan nie, en hulle weet nie hoe moeilik hulle dit vir my maak nie.”
As jy gereeld met ’n suikersiektelyer assosieer, kan jy hierdie twee pragtige Bybelbeginsels in gedagte hou: “Laat elkeen aanhou om, nie sy eie voordeel nie, maar dié van die ander persoon te soek”, en “Die liefde . . . soek nie sy eie belang nie.”—1 Korintiërs 10:24; 13:4, 5.
Almal wat besorg is oor hulle gesondheid—hetsy hulle suikersiekte het of nie—moet selfbeheersing aan die dag lê wanneer dit by kos kom. Die Bybel help ons in hierdie verband, want dit beklemtoon die belangrikheid daarvan dat elkeen van ons selfbeheersing moet aankweek. Het jy jou voorgeneem om hierdie eienskap in jou lewe aan te kweek? (Galasiërs 5:22, 23). Bybelvoorbeelde, soos die Christenapostel Paulus, kan ons ook help. “Hy het ’n permanente doring in die vlees gehad”, sê een suikersiektelyer, “maar hy het God nogtans getrou en tot die beste van sy vermoë gedien. Ek kan dit ook doen!”
Ja, Paulus het aanvaar wat hy nie kon verander nie en was baie suksesvol as ’n sendeling (2 Korintiërs 12:7-9). Dustin, wat 18 jaar oud is, is blind gebore en het suikersiekte gekry toe hy 12 was. Hy skryf: “Ek weet dat niemand ’n volmaakte lewe in hierdie wêreld het nie. Ek sien uit na die tyd in God se nuwe wêreld wanneer ek nie suikersiekte sal hê nie. Vir my is dit net iets tydeliks. Dit duur dalk langer as ’n verkoue of griep, maar dit sal uiteindelik verbygaan.”
Toe Dustin dit gesê het, het hy die Bybelse belofte van volmaakte gesondheid in ’n paradysaarde onder God se Koninkryk in gedagte gehad (Openbaring 21:3, 4). God se Woord belowe dat onder hierdie Goddelike heerskappy “geen inwoner sal sê: ‘Ek is siek’ nie” (Jesaja 33:24; Matteus 6:9, 10). Wil jy graag meer oor hierdie Bybelse belofte uitvind? Tree in verbinding met Jehovah se Getuies in jou omgewing of skryf aan die uitgewers van hierdie tydskrif by die gepaste adres op bladsy 5.
[Prent op bladsy 12]
Selfbeheersing en ’n positiewe uitkyk is noodsaaklik