Van ons lesers

Enkelouergesinne Ek kan eenvoudig nie vir julle sê hoe baie ek die voorbladreeks “Enkelouergesinne kan suksesvol wees” (8 Oktober 2002) geniet het nie. Ek wil dit oor en oor lees! Ek is ’n enkelouer met twee kinders. Elke keer as ek hierdie artikels lees, verseker dit my dat ek suksesvol kan wees en dat ek nie alleen is nie. Baie dankie!

C. B., Verenigde State

Ek is geskei. Die lewe was baie moeilik, aangesien ek twee kinders alleen moes grootmaak. Ek dank Jehovah dat hy ons gebede hoor en sulke liefdevolle artikels voorsien. So verseker hy ons dat hy aan ons dink en dat hy ons liefhet.

L. T., Tsjeggiese Republiek

Baie dankie vir hierdie artikels. Ek is nou ’n enkelouer en moes weer gaan werk nadat ek jare lank ’n huisvrou was, en dit het my begin onderkry. Maar die artikels het my die nodige hoop en aanmoediging gegee om aan te gaan. Ek gaan probeer om die wenke toe te pas, soos om goed georganiseerd te wees en ’n gereelde gesinsbybelstudie te hê. Ek sal hierdie tydskrif byderhand hou en dit lees elke keer as ek voel dat my situasie my onderkry.

B. A., Verenigde State

Ek het ’n seun en dogter en het 14 jaar gelede ’n enkelouer geword. Dankie vir die moeite wat julle met julle publikasies doen, maar dele van hierdie reeks het my teleurgestel. Die woord “suksesvol” is byvoorbeeld oor en oor gebruik. Ek voel dat ek die wenke op bladsy 11 toegepas het, maar ek het nie soveel sukses behaal as die ouer wat op daardie bladsy uitgebeeld word nie. ’n Mens is tog seker nie net suksesvol as jou kind ’n voltydse evangeliedienaar of sendeling word nie.

M. S., Japan

“Ontwaak!” antwoord: Ons besef dat sukses op verskillende maniere gemeet kan word. Ons het bedoel om praktiese wenke te gee wat enkelouers kan help om die lewe se moeilike uitdagings die hoof te bied en om hulle te verseker dat hulle pogings nie tevergeefs is nie. Voorbeelde van jongmense in die voltydse diens is gebruik om te toon dat enkelouers al daarin geslaag het om godvresende kinders groot te maak. Ons hoop dat alle ouers—enkel of getroud—sal voortgaan om in die geestelike, emosionele en fisiese behoeftes van hulle kinders te voorsien.

Ierse Hongersnood Dankie vir die leersame artikel “Die Groot Ierse Hongersnood—’n epos van dood en emigrasie” (8 Oktober 2002). Gedurende hierdie hongersnood het talle Ierse immigrante per skip na Kanada gekom. Baie het weens cholera, tifus en ander siektes gesterf. Baie kinders is wees gelaat, en party is deur Franssprekende gesinne aangeneem en Franse vanne gegee. Gevolglik het baie mense mettertyd hulle Ierse agtergrond verloor.

K. S., Kanada

Jongmense vra Ek wil graag iets sê oor julle artikel “Jongmense vra . . . Waarom het my ouer my nie lief nie?” (22 September 2002). Nadat my ouers geskei is, het ek verskriklik neerslagtig geraak. Soms het dit gelyk of niemand my kan help nie. Ek het die wonderlikste ma en broer in die wêreld, maar soms voel ek ’n leemte in my hart—’n leemte wat my pa veronderstel is om te vul. Ek het tot Jehovah gebid om my op die een of ander manier te versterk. Dit is presies wat hierdie artikel gedoen het. Dit het my gehelp om beter oor myself te voel, en ek het geleer hoe om die situasie te verwerk. Psalm 27:10 het my werklik geraak. Dit het my help besef dat Jehovah my liefhet, al lyk dit of niemand anders vir my lief is nie.

D. B., Verenigde State