’n Enkelouer, maar nie alleen nie

“Die grootste beloning van moederskap is wanneer my kinders huis toe kom, vir my ’n drukkie gee en sê dat hulle my liefhet.”—DORIS, ’N ENKELMOEDER MET TWEE KINDERS.

ENKELOUERS kan bemoedig word deur die Bybel se woorde: “Kinders is ’n seën en ’n gawe van die HERE” (Psalm 127:3, Contemporary English Version). Wanneer kinders in ’n enkelouergesin grootgemaak word, is hulle net so kosbaar in God se oë. Ons Skepper wil hê dat enkelouergesinne suksesvol moet wees. Die Bybel sê van hom: “Die vaderlose seun en die weduwee ondersteun hy” (Psalm 146:9). Enkelouers kan daarvan seker wees dat God hulle wil ondersteun.

’n Kind is daarop geregtig om in ’n liefdevolle, veilige en geborge omgewing grootgemaak te word waarin hy fisies, emosioneel en geestelik kan ontwikkel. Dit is elke ouer se plig en voorreg om deur God gebruik te word om ’n kind op te lei.

Baie enkelouers het gevind dat sukses afhang van gereelde gebed, die konsekwente toepassing van Bybelbeginsels en algehele vertroue op Jehovah. Dit is in ooreenstemming met die vermaning in Psalm 55:22: “Werp jou las op Jehovah, en hy sal jou onderskraag.”

Van tyd tot tyd sal grootouers, plaaslike ouer manne en ervare ouers in die Christengemeente moontlik beskikbaar wees om ’n enkelouergesin te help om moeilike situasies te hanteer. Gesinslede en medeaanbidders kan die pogings van enkelouers weliswaar op baie maniere ondersteun, maar uiteindelik lê die godgegewe verantwoordelikheid by ’n kind se ouers.a

Gelukkig het baie enkelouers daarin geslaag om die unieke uitdagings van hulle situasie te hanteer en verantwoordelike, goedgemanierde, godvresende kinders groot te maak. Ontwaak! het met ’n paar van hulle gepraat. Hier is van die dinge wat hierdie ouers in gemeen het.

• Ordelike huisbestuur. Suksesvolle enkelouers probeer om goedgeorganiseerd te wees en werk hard om almal se roosters te koördineer. Behoorlike beplanning en organisasie is noodsaaklik. Die Bybel sê: “Die planne van die vlytige lei gewis tot voordeel.”—Spreuke 21:5.

• Verbintenis. Suksesvolle enkelouers maak hulle gesinslewe een van hulle eerste prioriteite. Hulle probeer hard om die behoeftes van hulle kinders bo hulle eie te stel.—1 Timoteus 5:8.

• ’n Gebalanseerde benadering. Suksesvolle enkelouers verklein of vergroot nie probleme nie; hulle soek oplossings. Hulle aanvaar die uitdagings en probeer dit oorkom sonder om hulleself te bejammer of om verbitterd te raak.

• Goeie kommunikasie. Suksesvolle enkelouers bevorder kommunikasie. Hulle moedig almal in die gesin aan om hulle gedagtes en gevoelens duidelik en eerlik uit te spreek. ’n Enkelvader sê van sy kinders: “Ek praat by elke geleentheid met hulle. Ons het ‘intieme oomblikke’ wanneer ons aandete voorberei. Dit is wanneer hulle my werklik in hulle vertroue neem.”

• Sien om na jouself. Ondanks die eise wat aan hulle tyd gestel word, besef suksesvolle enkelouers dat dit belangrik is om na hulle eie geestelike, emosionele en fisiese behoeftes om te sien. Ethel, ’n geskeide enkelmoeder met twee kinders, het verduidelik: “Ek probeer ’n bietjie tyd vir myself hou. Wanneer ’n vriend byvoorbeeld die kinders musieklesse gee, gee dit my ’n uur vir myself. Ek gaan sit ’n bietjie en los die TV af.”

• ’n Positiewe gesindheid. Suksesvolle enkelouers behou ’n positiewe gesindheid teenoor ouerskap en die lewe oor die algemeen. Hulle sien positiewe aspekte in spanningsvolle situasies. ’n Enkelmoeder sê: “Ek het tot die besef gekom dat enkelouerskap nie net iets negatiefs is nie.”

Suksesverhale

Werk hierdie beginsels? Ja, soos gesien kan word uit die talle suksesverhale van enkelouers. Gloria, ’n geskeide, werkende enkelmoeder in Engeland, wat in die eerste artikel genoem is, het twee seuns en ’n dogter grootgemaak. Al drie van hulle het voltydse Christenbedienaars geword, wat hulle lewe aan die bevordering van Bybelopvoeding wy. Toe sy gevra is hoe sy dit gedoen het, het Gloria verduidelik: “Die eerste uitdaging was om ’n gereelde, interessante gesinsbybelstudie te hou. Ek wou hê die kinders moet gelukkig wees, gemoedsrus hê, tevrede wees en teen slaggate beskerm word. Ek het in die aand begin werk. Ek wou soveel tyd as moontlik met die kinders deurbring. Voor ek werk toe gegaan het, het ons as ’n gesin saam gebid en het ek hulle in die bed gesit. My tannie het in die huis gebly terwyl ek by die werk was.”

Hoe het Gloria haar kinders gehelp om die regte prioriteite te stel? Sy sê verder: “My hoofdoel was om geestelike dinge eerste te stel. Ons het nie baie geld gehad nie, en ek was baie eerlik hieroor met die kinders. Alles wat ek hulle gevra het om te doen, het ek self ook gedoen, en hulle het almal hulle samewerking gegee.” Gloria sê die volgende oor wat haar gehelp het om haar gesin na aan mekaar te hou: “Die geheim was om dinge saam te doen. Niemand het alleen na sy of haar kamer gegaan nie. Ons het saam kos gemaak, saam skoongemaak en die huis saam versier. Maar ons was ook gebalanseerd. Ek het altyd seker gemaak dat daar ook geleenthede vir ontspanning was.”

Carolyn, ’n enkelmoeder van ’n jong seun met die naam Joseph, is gelukkig met die manier waarop hy grootword. Wat is haar geheim? “Ons lees die Bybel saam voor ons gaan slaap”, sê sy, “en dan vra ek hom vrae oor wat hy geleer het. Ons bespreek ook spesifieke paragrawe in Bybelpublikasies en pas dit dan persoonlik toe. Dit help Joseph wanneer hy probleme het, soos wanneer hy by die skool afgeknou word.” Carolyn erken dat haar lewe geensins maklik is nie, maar sy voel nie dat sy alleen is nie. Sy sê: “Dit is ’n voortdurende stryd, maar ek voel dat Jehovah my werklik help. Ek ontvang ook baie aanmoediging van die Christengemeente.”

Die suksesverhale van duisende enkelouers, soos Gloria en Carolyn, bewys dat ouers vandag op die beproefde beginsels in die Bybel kan vertrou om goedgemanierde, geestelike sterk kinders groot te maak (Spreuke 22:6). Sukses is moontlik! Enkelouerskap skep baie uitdagings wat geleenthede bied om te groei en te gee. Om ten volle op God te vertrou en oortuig te wees dat hy hulp sal voorsien, is die beste manier om die uitdagings van enkelouerskap die hoof te bied.—Psalm 121:1-3.

[Voetnoot]

[Prente op bladsy 11]

Gesinsbybelstudie het Gloria se drie kinders gehelp om voltydse Christenbedienaars te word. Hier kyk hulle na ’n brief en ’n foto van die oudste seun, wat nou as ’n sendeling dien

[Prente op bladsy 12]

Carolyn en haar seun, Joseph