Soldate aan die opmars!
“Ons woon in ’n ontwikkelende dorpie in Belize wat deur welige plantegroei omring word. Omstreeks negeuur een oggend het ’n leër ons huis binnegeval. Miere het onder die deur ingestroom en deur elke krakie ingekom op soek na prooi. Ons moes ons huis noodge-dwonge vir ’n uur of twee verlaat terwyl die miere oorgeneem het. Toe ons terugkeer, was daar geen insekte in die huis oor nie.”
VIR BAIE MENSE wat in tropiese lande soos Belize woon, is dit ’n algemene verskynsel wat nie heeltemal onwelkom is nie. Dit is ’n manier om van kakkerlakke en ander goggas in die huis ontslae te raak. En geen gemors word agtergelaat nie.
Die miere waarvan ons hier praat, word interessant genoeg soldaatmiere genoem omdat hulle soos soldate lewe en optree.a Hierdie nomadiese leërs, wat uit honderdduisende miere bestaan, bou nie neste nie, maar maak eerder tydelike kampe, met massas miere wat hulle bene inmekaarhaak en so ’n lewende gordyn rondom die koningin en haar kleintjies vorm. Van die kamp af word stroopbendes in lang kolonne uitgestuur om kos te soek, wat uit insekte en klein diertjies, soos akkedisse, bestaan. Die leiers van die stroopbende voer ook skynbaar flankbewegings uit om hulle prooi te vang. Dit gebeur wanneer die voorste werkers vassteek en die opmars terughou omdat hulle nie ’n reukspoor het om te volg nie. Die agterste miere beweeg onversetlik vorentoe en bondel saam in ander dele van die voorste linie en sprei dan uit sodat dit lyk asof hulle flankbewegings uitvoer.
Soldaatmiere werk in ’n siklus van 36 dae; hulle is ongeveer 16 dae aan die beweeg en bly dan 20 dae op dieselfde plek terwyl die koningin haar eiers lê. Daarna laat die behoefte aan kos die kolonie weer op mars gaan. Spinnekoppe, skerpioene, kewers, paddas en akkedisse vlug voor die kolonne uit, wat ongeveer tien meter wyd is, en word deur voëls gevolg wat op die vlugtelinge jag maak, maar blykbaar nie op die miere nie.
Miere, wat in Spreuke 30:24, 25 as “instinktief wys” beskryf word, is een van die wonders van die skepping.
[Voetnoot]
a Hierdie artikel bespreek die Eciton-genus van Sentraal- en Suid-Amerika.
[Prent op bladsy 31]
Soldaatmier
[Erkenning]
© Frederick D. Atwood
[Prent op bladsy 31]
Hulle vorm ’n brug deur hulle bene inmekaar te haak
[Erkenning]
© Tim Brown/www.infiniteworld.org