Van ons lesers

Kinderprostitusie Ek kan nie in woorde beskryf hoe dankbaar ek is vir die reeks “Kinderprostitusie—’n Tragiese werklikheid” (8 Februarie 2003) nie. Hierdie reeks het die afstootlikheid van die probleem blootgelê. Ek dink dit moet in die sekulêre pers herdruk word sodat meer mense kan weet dat hierdie soort slawerny bestaan.

M. K., Tsjeggiese Republiek

Sirië Dankie vir die artikel “Sirië—spore van ’n interessante verlede” (8 Februarie 2003). Ek het, om die waarheid te sê, nog nooit in geskiedenis belanggestel nie. Maar hierdie artikel het my gehelp om die verskillende paaie waarop Paulus gereis het, asook die stede wat hy besoek het, te visualiseer. Hierdie soort inligting help ons om ons kennis te verbreed en om te verstaan wat knegte van God in die verlede moes trotseer.

T. S., Verenigde State

Bly fiks Ek wil julle bedank vir al die wenke oor oefening en hoe om gewig te verloor wat al in “Ons beskou die wêreld” verskyn het. Ek het veral die brokkie “Bly fiks” (8 Februarie 2003) waardeer. Dit het getoon dat selfs ’n bietjie oefening kan help om ’n mens se gesondheid te verbeter. Ek het dit bemoedigend gevind, want van die medisyne wat ek gebruik, laat my gou moeg word, en gevolglik moet ek my oefensessies kort hou. Dankie vir hierdie wenk om fiks en gesond te bly.

G. P., Verenigde State

Blokkiesraaisels Net ’n paar woorde om baie dankie te sê vir die blokkiesraaisels in julle tydskrifte. Ek is heeltemal versot daarop! Dit is pret, opvoedkundig en ’n goeie manier vir my om aan die einde van die dag te ontspan.

J. G., Verenigde State

Ek het nog altyd daarvan gehou om blokkiesraaisels in te vul, en toe dit in die Ontwaak! begin verskyn, het ek daarna begin uitsien. Ek moes aanvanklik die meeste Bybeltekste naslaan, maar vir baie van die blokkiesraaisels hoef ek dit nie meer te doen nie! Ek het dus heelwat Bybelverse en -karakters leer ken.

E. G., Verenigde State

Glimlag My familie en vriende het my Glimlag genoem. Ek het selfs ’n foto ontvang waarop geskryf is: “As jy ooit iemand sonder ’n glimlag sien, gee hom een van joune.” Maar ’n paar tragedies wat my familie onlangs getref het, het my baie neerslagtig gemaak. Die artikel “Die waarde van ’n glimlag” (22 Januarie 2003) het my beskouing verander. Nou kan ek mense weer eens gelukkig maak met ’n glimlag. Ek dank Jehovah dat hy hierdie artikel gebruik het om my te help om my beskouing reg te stel.

O. F., Nigerië

Vullis In die reeks “Vullis—Sal ons daaronder begrawe word?” (22 Augustus 2002) haal julle ’n Italiaanse omgewingsorganisasie se skatting aan van hoe lank dit verskeie items neem om in seewater te vergaan. Na my mening is die skatting dat blikkies eers na 500 jaar vergaan, baie onakkuraat. In die brak water van Florida se Pelikaan-eiland Nasionale Natuurreservaat het ek baie aluminium- en metaalblikkies gesien wat verpoeier wanneer ek liggies met my stewel daarteen skop. Hierdie blikkies kon nie langer as tien jaar daar gewees het nie—miskien selfs minder. Soos enigiemand wat ’n aluminiumboot het, goed weet, verweer aluminium in soutwater.

S. S., Verenigde State

“Ontwaak! antwoord: Dit is waar dat ander skattings baie meer konserwatief is. Maar “Elements of Marine Ecology”, deur R. V. Tait en F. A. Dipper, wys daarop dat dit aluminiumblikkies tussen 80 en 100 jaar en ander metaalblikkies tussen 50 en 100 jaar kan neem om te vergaan. Metaalblikkies wat aan lug blootgestel is, kan vinniger vergaan as dié wat net aan water blootgestel is.