Van ons lesers

Beskerm jou kinders Ek het ’n jong vrou ontmoet wat ’n paar kinders in haar huis geneem het wat seksueel gemolesteer is. Ek het haar die nommer van 8 Oktober 1993 met die reeks “Beskerm jou kinders!” aangebied. Toe ek haar weer besoek, het sy gesê: “Die artikels het my gehelp om hierdie nuwe situasie te hanteer. Ek het die tydskrif saamgeneem toe ek ’n afspraak by die kinderhof gehad het en dit vir die aanklaer gewys. Sy, sowel as die regter, is beïndruk deur die artikels en wou dit onder die ander regsgeleerdes versprei.” Hierdie jong vrou het meer lektuur gevra en studeer nou die Bybel saam met ons.

E. T. V., Brasilië

Blokkiesraaisels ’n Paar dae gelede het ek en my kleindogter die Ontwaak! van 8 Desember 1995 deurgekyk toe ons die blokkiesraaisel sien. Sy het uitgeroep: “Ek hou baie van blokkiesraaisels!” Ons het dus die tekste saam nageslaan, en ek het haar die antwoorde self laat uitwerk. Ons het die aangenaamste halfuur of wat saam deurgebring. Gaan daarmee voort! Ons sien uit na die volgende blokkiesraaisel.

M. G., Kanada

Ek is nege jaar oud. Ek hou baie van julle tydskrif, maar ek hou die meeste van die blokkiesraaisels omdat dit my help om gebeure en mense in die Bybel te onthou. Baie dankie hiervoor.

J. M. T., Brasilië

Dodelike siektes Dankie vir die breedvoerige, duidelike en juiste reeks “Dodelike siektes—die stryd tussen die mens en mikrobes” (22 Februarie 1996). Ek het nooit besef dat mikrobes so ontsettend ingewikkeld is en soveel skade in jou liggaam kan aanrig nie.

C. L., Verenigde State

Die tydskrif het presies op die regte tyd gekom, aangesien ek longontsteking opgedoen het en antibiotika moes neem. Die artikels het my gehelp om te verstaan waarom ek erger pleks van beter gevoel het nadat ek die geneesmiddels begin neem het. Ek is dankbaar vir hierdie inligting wat op so ’n maklik verstaanbare wyse aangebied is.

I. W., Duitsland

Etiopië Nadat ek die artikel “Fassinerende Etiopië” (22 Februarie 1996) gelees het, is my hart met waardering gevul. Ek het baie Etiopiese familielede wat nie Getuies van Jehovah is nie. Hierdie artikel was so uitstekend dat ek vol vertroue is dat dit hulle belangstelling sal wek om van ons groot God, Jehovah, te leer.

J. R., Luxemburg

Voormalige geisja Ek is diep ontroer deur die artikel “’n Padda se kind” (22 Februarie 1996). Weens my moeder se invloed het ek van jongs af ’n studie van klassieke ballet gemaak. Toe ek een van Jehovah se Getuies geword het, het ek besluit om ballet op te gee, hoewel ek baie lief daarvoor was. Hierdie artikel het my bemoedig. Dit het my gehelp om te sien dat daar ander Christene is wat soortgelyke opofferings gemaak het. Ek dank julle met my hele hart.

J. S., Japan

Ek kon die trane nie keer toe ek na die foto van Sawako Takahasji met haar gelukkige, teokratiese gesin gekyk het nie. Die lyding wat ek in die verlede verduur het, het lank my lewe oorheers, en die feit dat ek myself as ’n slagoffer beskou het, het my baie hartseer gemaak. Omdat ek besef dat Jehovah my vorige tekortkominge sal vergewe, het ek die moed om my daarop toe te lê om ’n gedoopte Christen te word.

M. K., Japan

Dit was een van die leersaamste en aangenaamste verhale wat ek nog gelees het. Dit het my ook help verstaan wat vooroueraanbidding behels. Voordat ek hierdie outobiografie gelees het, was dit vir my moeilik om hierdie vorm van aanbidding te begryp.

P. Y., Verenigde State