Van ons lesers

Lyding Baie dankie vir die artikel “Jongmense vra . . . Waarom laat God ons ly?” (22 Maart 2004). Ek is 14 jaar oud, en twee mense aan wie ek baie geheg was—my oupa en my tannie—is onlangs oorlede. Ek het geweet dat God nie vir hulle dood verantwoordelik is nie. Satan moet die skuld kry, en hy het net ’n kort tydjie oor. Hierdie artikel het my regtig vertroos. Hou asseblief aan om sulke artikels te skryf. Ek wil julle weer eens uit die diepte van my hart bedank.

B. B., Verenigde State

Die meisie met wie ek sou trou, is in ’n motorongeluk dood. Dit was ’n verskriklike tragedie—vir my, vir die gemeente en veral vir haar ouers. Ek dank Jehovah dat hy my gehelp het om oor my diepe smart te kom. En ek dank julle vir die artikel “Waarom laat God ons ly?” Dit het op net die regte tyd gekom.

I. D., Duitsland

Ek wou eers nie hierdie artikel lees nie. Ek het gedink dat dit somber sou wees. Twee jaar gelede is my ouer broer aan ’n siekte dood, en dit het my met emosionele wonde gelaat. Maar die artikel het my daaraan herinner dat Jehovah die Gewer van goeie dinge is. Ek het gevoel dat my wonde vinnig besig is om te genees, en ek het moed geskep om in hierdie onstabiele wêreld te volhard.

S. H., Japan

Suiker ’n Aantal mense het al vir my gesê dat die artikel “Suikers van die lewe” (22 Maart 2004) in werklikheid ’n gewilde gesondheidsproduk bevorder wat veronderstel is om siektes, waaronder kanker, te genees. Ek maak nie beswaar teen julle artikel nie, maar ek maak wel beswaar teen mense wat dit gebruik vir geldelike gewin of om hulle eie idees te bevorder.

P. K., Australië

“Ontwaak!” antwoord: Die artikel “Suikers van die lewe” het bloot berig gelewer oor die bevindings van bioloë aangaande die belangrike rol wat suiker in gesondheid speel. Ons het geensins bedoel om ’n sekere produk te bevorder nie. Wanneer “Ontwaak!” berig lewer oor gesondheidsake, beveel dit nie enige spesifieke benadering in behandeling by sy lesers aan nie. Individuele Christene moet self seker maak dat enige behandeling wat hulle volg, gesonde verstand weerspieël en nie met Bybelbeginsels bots nie.

Laktoseonverdraagsaamheid Ek ondervind al ’n aantal jare die simptome wat in die artikel “’n Kykie na laktoseonverdraagsaamheid” (22 Maart 2004) genoem word. Ek het gevolglik ’n waterstofasemtoets laat doen, wat getoon het dat ek aan laktoseonverdraagsaamheid ly. Toe ek die artikel vir die internis wys, het hy gesê dat dit baie goed nagevors is, en hy het my gevra om julle te bedank vir die goeie artikel wat julle geskryf het. Hy kon nie onthou of hy al ooit die Ontwaak! gelees het nie.

E. S., Duitsland

Oormatige drinkery Dankie vir die artikel “Die Bybelse beskouing: Is oormatige drinkery werklik so verkeerd?” (8 Maart 2004). Ek besef nou dat my alkoholgebruik die rede is vir die argumente tussen my en my vrou, en ek besef dat ek baie geld op alkohol verkwis het. Vandag drink ek minder en nie so gereeld nie.

G. K., Tanzanië

Blokkiesraaisels Ek geniet dit om die blokkiesraaisels te doen wat in die Ontwaak! verskyn. Dit is leersaam. In die begin moes ek dikwels die Bybel raadpleeg om die regte woord te vind. Nou doen ek dit selde. Ek skryf dit aan my Bybelstudieprogram toe. En dit was die blokkiesraaisels wat my aangespoor het om met so ’n Bybelstudieprogram te begin!

W. K., Pole

“Ontwaak!” antwoord: Die blokkiesraaisel wat in die “Ontwaak!” verskyn, word in sommige tale vervang met ’n lys Bybelvrae getiteld “Het jy geweet?”