Hoe die aarde gered sal word

TEN SPYTE VAN die donker wolk wat oor die aarde hang, wil ons graag dink dat dit sal oorleef. Dit is immers ons tuiste—en hopelik die tuiste van ons kinders en hulle kinders. Is daar enigiets wat ons kan doen om daardie hoop te versterk?

Al is die meeste mense besorg oor die omgewing, is dit ongelukkig waar dat baie van hulle niks daarvan dink om vullis op die grond neer te gooi, afval in ’n rivier te stort of ligte te laat brand al word dit nie gebruik nie. Dit lyk moontlik na klein dingetjies, maar as elkeen van die miljarde mense op die aarde versigtig is met hoe hy die aarde behandel, kan dit ’n verskil maak. As ’n mens byvoorbeeld krag spaarsaam gebruik, met herwinningsprogramme saamwerk en behoorlik van vullis ontslae raak, lewer jy ’n bydrae tot die bewaring van die omgewing. Ons kan deur ons gewoontes toon dat ons nou vir die aarde omgee.

Ons kan nietemin nie die dade van die meeste mense om ons beheer nie. Beteken dit dat die situasie eintlik hopeloos is?

’n Groter oplossing op hande

’n Kommentaar deur Thilo Bode van die Greenpeace-organisasie, wat in die tydskrif Time aangehaal is, noem die kern van die omgewingsprobleem: “Ons vernaamste oogmerk was nog altyd dat korporasies moet dink aan hoe daar met hulle produkte weggedoen word. Hulle moet in terme van drie stappe dink: vervaardiging, gebruik en wegdoening.” Ongelukkig weet ons hoe om goedere te vervaardig, weet ons hoe om dit te gebruik, maar raak ons nie behoorlik daarvan ontslae nie. In sommige gevalle weet mense eenvoudig nie hoe om dit veilig te doen nie.

Mense is beperk, maar die aarde se Skepper is nie. Hy het alreeds bewys gelewer van sy uitnemende wysheid in die skeppingswerke wat ons op die aarde sien. Hy weet hoe om dinge te maak, te gebruik en behoorlik daarvan ontslae te raak. Baie van die prosesse wat hy in werking gestel het, vind outomaties plaas. ’n Saad ontkiem, en ’n plant groei en dra vrugte. Dan gaan dit dood—en al die elemente waaruit dit bestaan, ontbind sonder om enige besoedeling te veroorsaak, gereed om weer gebruik te word. Dit is herwinning op sy beste! Geen giftige besoedeling nie!

Die Skepper gaan nie toelaat dat die aarde in ’n onbewoonbare vullishoop verander nie. In die Bybel, in Jesaja 45:18, lees ons: “Só het Jehovah gesê, . . . Hy, die ware God, die Formeerder van die aarde en die Maker daarvan, Hy, wat dit stewig gevestig het, wat dit nie verniet geskep het nie, wat dit gevorm het om bewoon te word.”

As God die aarde gevorm het om bewoon te word, waarom het hy dan toegelaat dat dit in so ’n droewige toestand verval? Die Bybel verduidelik dat die mens aanvanklik in ’n paradys geplaas is. Om die waarheid te sê, God se voorneme was dat hierdie Paradys oor die hele aarde moes uitbrei en met mense gevul moes word (Genesis 1:28). Maar die mens het in opstand gekom. Die eerste man en vrou wou nie aan God se heerskappy onderdanig bly nie.

God het die mens toegelaat om hulle eie manier van regeer op die proef te stel. Die resultaat is wat ons vandag sien, ’n jammerlike mislukking. Mense het duidelik getoon dat hulle nie hulle probleme kan oplos nie. God kan nie die skuld gegee word vir wat gebeur het nie. Wat die Bybel sê, geld vir die hele mensegemeenskap: “Hulle het self verderflik gehandel; hulle is nie sy kinders nie, die gebrek lê by hulle. ’n Verdorwe en verdraaide geslag!”—Deuteronomium 32:5.

God het nietemin nie sy oë gesluit vir die verderwing van die aarde nie. Hy sal optree voor dit te laat is, voor die aarde ’n onbewoonbare woesteny word. Hoe weet ons dit? Openbaring 11:18 verduidelik: “Die nasies se gramskap het ontvlam, en u eie gramskap het gekom, en die vasgestelde tyd . . . om die verderwers van die aarde te verderf.” Die verderwing van die aarde sal tot ’n einde gebring word.

God se oorspronklike voorneme met die aarde, dat dit ’n paradys sal wees, sal nog verwesenlik word. God het dit deur sy woorde bevestig. Hy het byvoorbeeld gesê: “My woord . . . wat uit my mond uitgaan . . . sal nie sonder resultate na my toe terugkeer nie, maar dit sal beslis doen wat my behaag” (Jesaja 55:11). Jy sal dit dalk geniet om Jesaja hoofstuk 35 te lees, waar God beskryf hoe verwoeste gebiede in tuinagtige parke en vrugbare landerye omskep word.

Die aarde het getoon dat dit selfs nou op ’n merkwaardige wyse kan herstel wanneer besoedeling stopgesit word. God het dit so geskep. As die grootskaalse besoedeling van die aarde ophou, kan die groot verskeidenheid mikro-organismes in die water en grond baie van die skade ongedaan maak. Daarbenewens is daar rede om te glo dat hierdie vernuwingsproses selfs doeltreffender sal wees wanneer God intree en sake rig. Hy kan die opleiding en volmaakte leiding voorsien wat mense nou kortkom.

Die toekoms van die aarde is dus nie hopeloos nie. Plante en diere sal gered word. Lyste van bedreigde spesies sal nie meer bestaan nie. Ons lug en water sal weer vars wees. Gehoorsame mense sal daar wees om dit te geniet. Wil jy dit graag sien? Jy kan. Hoe? Die Bybel sê wat ons moet doen. Ondersoek die Bybel gerus stelselmatig sodat jy self kan vasstel wat jy moet doen. Vra die uitgewers van hierdie tydskrif om iemand na jou toe te stuur wat jou kan help om daarmee te begin. Gryp die geleentheid aan om te leer hoe jy en jou gesin vir ewig ’n pragtige omgewing kan geniet.