Die skitterende ster van die voëlvertoning
DEUR ONTWAAK!-MEDEWERKDER IN SPANJE
DIE pou verskyn voor ’n pragtige kleurgordyn asof hy die ster van ’n nuwe teateropvoering is. Glansende vere, vyf keer langer as sy lyf, is bo hom uitgesprei en glinster in die sonlig.
Hierdie luisterryke vertoning is die pou se hofmaakritueel. Wanneer die skouspel sy klimaks bereik, begin sy stertvere bewe en bring dit ’n geritsel voort wat blykbaar tot die sukses van die vertoning bydra. Hoe kan die wyfie hierdie skouspel weerstaan wat al ‘die pragtigste advertensie in die wêreld’ genoem is?
Maar die pou sal ook sy vertoning lewer vir toeskouers wat hy nie die hof probeer maak nie. “Natuurkenners het bevestig dat poue meer dikwels en langer voor groepe mense pronk as in die teenwoordigheid van wyfies”, sê die boek Wonders of Peacocks. Die pou se spreekwoordelike reputasie dat hy trots is, spruit moontlik voort uit sy gewilligheid om sy siervere te vertoon.
En waarom nie? Sy vertoning is ongetwyfeld die moeite werd om na te kyk. Die pou se lang stertdekvere, met hulle glansende oogkolle, verskil in lengte, sodat dit ’n volmaakte waaier kan vorm. Afhangende van die hoek van die sonstrale wissel die kleur van hierdie vere van koper, brons en goud tot diep blougroen en pers.
In Westerse lande, waar die pou se hoofdoel in die lewe blykbaar is om met sy vere te loop en pronk, neem mense dalk aan dat die voël min ander nuttige eienskappe het. Maar in Indië, waar hy inheems is, waardeer dorpsbewoners hom ook omdat hy jong kobras en ander giftige slange vang. Die feit dat die pou blykbaar nie deur die kobra se gif aangetas word nie, het hom ’n simbool van goddelikheid en onsterflikheid in die Ooste gemaak.
Ongeveer 3 000 jaar gelede is daar in die Midde-Ooste baie waarde aan die pou geheg. Koning Salomo het poue saam met ander kosbare handelsware soos ‘goud, silwer en ivoor’ ingevoer (1 Konings 10:22). “Poue is waarskynlik vir die eerste keer aan die lande om die Middellandse See bekend gestel toe Salomo hulle ingevoer het”, sê die boek The Natural History of the Bible. ’n Paar eeue later is Aleksander die Grote in so ’n mate deur poue beïndruk dat hy sy manskappe verbied het om hulle dood te maak.
Selfs vandag is daar min mense wat nie deur die pou se unieke vertoning beïndruk word nie. En ons moenie van die vertoning se regisseur vergeet nie. Net soos ’n kunstenaar se vaardigheid in sy werke gesien kan word, so kan ons Skepper se oorspronklikheid as kunstenaar duidelik gesien word in hierdie juweel onder sy skepsele.
[Volbladillustrasie op bladsy 17]
[Foto-erkenning op bladsy 16]
Cortesía del Zoo de la Casa de Campo, Madrid