Van ons lesers
Slaap Die reeks “Kry jy genoeg slaap?” (22 Maart 2003) was veral tydig vir my. Ek het aan slapeloosheid begin ly nadat my dogter skielik siek geword het. Ná vyf of ses dae het ek na ’n plaaslike hospitaal gegaan en met behulp van medikasie kan ek nou slaap. Maar julle artikels het aan die hand gedoen dat ek ook genoeg oefening gedurende die dag moet kry, maar nie net voor slapenstyd nie. Ek sal hierdie raad so gou moontlik probeer toepas.
T. M., Japan
Onlangs het ek baie uitgeput begin voel. My huisdokter het my ondersoek, en sy gevolgtrekking was dat ek eenvoudig nie snags genoeg slaap kry nie en dat die medikasie wat ek vir epilepsie gebruik, my ook aantas. Ek was nie so seker van sy diagnose nie. Maar ’n week later het ek julle artikels oor slaap ontvang. Ek kon nie die tydskrif neersit nie, en nadat ek die toets op bladsy 9 gedoen het, het ek tot dieselfde gevolgtrekking as my dokter gekom. Ek probeer nou die wenke in die artikel toepas. Dankie vir die tydige inligting.
M. B., Verenigde State
Kokosneute Ek wil my waardering uitspreek vir die artikel “Een van die nuttigste neute op aarde” (22 Maart 2003). Ek het Mexiko onlangs besoek, en ek kon met my eie oë sien hoe veelsydig die kokosneut werklik is! Ek het amper al die gebruike wat in die artikel gemeld word, gesien. Nog ’n gebruik is om die takkies af te sny, die blare te stroop en 10 tot 15 van hierdie droë, slap takkies saam te bind. Dit maak ’n uitstekende vlieëslaner!
D. S., Verenigde State
Hierdie artikel het my laat dink aan hoe my ouma destyds in die 1930’s bekers van kokosdoppe gemaak het. Baie van haar bure het hulle hutte met die hout van die kokosboom gebou, en hulle dakke is met gedroogde kokosblare gemaak. Ek wil vir julle baie dankie sê vir sulke pragtige artikels.
M. B., Verenigde State
Borsvoeding Die berig “Voordele van borsvoeding” in “Ons beskou die wêreld” (22 Maart 2003) het my ontstel. Ek twyfel nie dat mense wat nie geborsvoed is nie, ’n swak immuunstelsel kan hê nie. Ek is nie geborsvoed nie en kry dikwels griep. Maar om ’n studie aan te haal wat toon dat diegene wat nie geborsvoed is nie, ’n laer IK het as dié wat wel geborsvoed is, openbaar ’n gebrek aan sensitiwiteit.
C. B., Italië
“Ontwaak!” antwoord: Dit was nie ons bedoeling om enigiemand aanstoot te gee nie. Ons het bloot verslag gelewer oor die bevindings van ’n Deense studie in verband met borsvoeding. Deur sulke inligting te publiseer, gee ons vandag se ouers die geleentheid om ingeligte besluite te neem oor hoe hulle hulle kinders grootmaak.
Afrika-spreekwoorde Ek verwonder my voortdurend oor die groot verskeidenheid artikels in die Ontwaak! Ek lees dit al bykans 40 jaar, en ek het die artikel “Akan-spreekwoorde—’n weerspieëling van sosiale norme” (22 Maart 2003) terdeë geniet. Dit het my gehelp om te besef hoe belangrik goeie maniere is as ons met ons medemens oor die weg wil kom. Ek het van die spreekwoorde neergeskryf sodat ek van tyd tot tyd daarna kan verwys.
D. Z., Verenigde State
Dit was die lekkerste, snaaksste en leersaamste artikel oor spreekwoorde wat ek nog gelees het. Ek het dit baie geniet om iets te leer oor die norme van ’n ander kultuur. Na elke spreekwoord het ek eers opgehou lees en probeer dink wat die spreekwoord beteken. Ek het natuurlik nie altyd reg geraai nie!
J. K., Duitsland