Die Bybel se beskouing

Hoe kan jy verkeerde begeertes weerstaan?

“Wanneer ek wil doen wat reg is, is die slegte by my aanwesig.”—ROMEINE 7:21.

PAULUS het, miskien meer as enige ander apostel, hard gestry om die verhewe beginsels van die Christelike godsdiens te bevorder (1 Korintiërs 15:9, 10). En tog het hy die bekentenis hierbo openhartig gedoen. Sy gedagtes en sy verkeerde begeertes was voortdurend in konflik met mekaar. Het jy al ooit soos die apostel Paulus gevoel? Ja, wie van ons, as onvolmaakte mense, het nie al daardie innerlike konflik ervaar nie?

Die stryd om verkeerde begeertes te oorwin, is vir baie ’n geweldige uitdaging. Party worstel met drange na onsedelike seksuele bevrediging. Ander is aan dobbelary, tabak, dwelms of alkohol verslaaf. Hoe kan ons skadelike en onrein begeertes weerstaan wanneer ons daardeur geteister word? Watter hulp is beskikbaar? Sal die stryd teen verkeerde begeertes ooit eindig?

Liefde—Die sleutel om verkeerde begeertes te weerstaan

Jesus het die aandag gevestig op die twee grootste gebooie in die Mosaïese Wet. Die eerste een is: “Jy moet Jehovah jou God liefhê met jou hele hart en met jou hele siel en met jou hele verstand” (Matteus 22:37). As ons God liefhet soos Jesus gesê het ons moet, moet ons grootste begeerte nie dan wees om Hom te behaag nie? Indien wel, kan daardie regverdige begeerte ons help in ons stryd teen selfs die hardnekkigste verkeerde begeertes! Dít is nie net ’n idealistiese teorie nie. Miljoene Christene voer daagliks ’n suksesvolle stryd teen verkeerde begeertes. Hoe kan jy hierdie sterk verhouding met God aankweek? Deur met waardering oor sy goedheid te peins, soos gesien word in sy skepping, in die Bybel en in sy handelinge met ons as persone.—Psalm 116:12, 14; 119:7, 9; Romeine 1:20.

Die tweede grootste gebod wat Jesus aangehaal het, is: “Jy moet jou naaste liefhê soos jouself” (Matteus 22:39). Die apostel Paulus het gesê dat liefde ‘hom nie onwelvoeglik gedra nie’ en ‘nie sy eie belang soek nie’. Sulke onselfsugtige liefde help ons dus om enige gedrag te vermy wat ander sal seermaak (1 Korintiërs 13:4-8). Hoe kan dit aangekweek word? Deur ons in die plek van ander te stel en opregte besorgdheid vir hulle gevoelens en blywende welsyn te toon.—Filippense 2:4.

Watter hulp is beskikbaar?

Aangesien God verstaan hoe moeilik dit vir ons is om te doen wat reg is, het hy hulp in verskeie vorme voorsien. Deur sy geskrewe Woord, die Bybel, leer hy ons om te haat wat sleg is en om ’n heilsame respek vir hom te ontwikkel (Psalm 86:11; 97:10). Die Bybel bevat ware verhale wat die rampspoedige gevolge toelig as ’n mens voor verkeerde begeertes swig. Jesus het daarbenewens gesê dat God ons Sy heilige gees, die grootste krag in die heelal, sal gee as ons daarvoor vra (Lukas 11:13). Dit kan ons voorneme versterk om te doen wat reg is. Nog ’n voorsiening is die wedersydse ondersteuning en aanmoediging van ander Christene wat ook verkeerde begeertes weerstaan (Hebreërs 10:24, 25). Namate negatiewe invloede deur hierdie positiewe invloede verdring word, word ons gehelp in ons strewe om te doen wat reg is (Filippense 4:8). Werk hierdie benadering werklik?

Dink byvoorbeeld aan Fidel wat in sy gemeenskap as ’n dronkaard bekend was. Terwyl hy onder die invloed van drank was, het hy tabak gerook, gedobbel en met ander baklei. Sy studie van die Bybel en omgang met Jehovah se Getuies het hom gehelp om daardie gebruike te bowe te kom. Hy geniet nou ’n baie beter lewe saam met sy vrou en twee kinders.

Iemand vra dalk: ‘Maar sê nou ek het ’n terugslag?’ Die apostel Johannes het aan hierdie moontlikheid aandag gegee. Hy het geskryf: “My kindertjies, ek skryf hierdie dinge aan julle sodat julle nie ’n sonde begaan nie. En tog, as iemand ’n sonde begaan, het ons ’n helper by die Vader, Jesus Christus, ’n regverdige. En hy is ’n soenoffer vir ons sondes, en tog nie net vir ons s’n nie, maar ook vir dié van die hele wêreld” (1 Johannes 2:1, 2). Ja, Jesus se offerande dek die sonde van iemand wat berou het en opreg probeer om veranderinge aan te bring sodat hy God kan behaag. Met hierdie voorsiening in gedagte, kan enigeen van ons dan geldige rede hê om op te gee in die stryd om te doen wat reg is?

Verkeerde begeertes sal oorwin word

As ons ons liefde vir God en naaste opbou en van God se hulp gebruik maak, kan ons selfs nou sukses behaal in ons stryd teen verkeerde begeertes. Verder verseker God se Woord ons dat hierdie stryd nie vir ewig sal voortduur nie. Diegene wat gebruik maak van God se geestelike voorsienings, sal in die nabye toekoms volkome genees word, fisies sowel as geestelik (Openbaring 21:3-5; 22:1, 2). Hulle sal bevry word van die las van sonde, asook die dood wat daardeur meegebring word (Romeine 6:23). Daarenteen sal diegene wat onrein en skadelike begeertes doelbewus koester, nie daardie seëninge ontvang nie.—Openbaring 22:15.

Hoe bemoedigend is dit tog om te weet dat ons nie vir ewig met verkeerde begeertes hoef te worstel nie. Hulle sal heeltemal en permanent uit die weg geruim word. Wat ’n verligting sal dit tog wees!