Gebore in ’n koue wêreld!

’N BABA word in ’n genadelose, koue wêreld gebore, in ’n stresvolle wêreld. Hoewel ’n baba nie werklik kan sê hoe hy voel nie, dink party wetenskaplikes dat die fetus selfs voor geboorte weet wat om hom aangaan.

Die boek The Secret Life of the Unborn Child sê: “Ons weet nou dat die ongebore kind bewus is van sy omgewing en daarop reageer en dat hy van die sesde maand af (en moontlik selfs vroeër) ’n aktiewe emosionele lewe lei.” Hoewel die baba moontlik nie die bevalling onthou nie, wonder party wetenskaplikes of die stres wat met die geboorte gepaardgaan, sy latere lewe beïnvloed.

Ná geboorte duur die stres voort. Buite die baarmoeder word die baba nie meer outomaties gevoed nie. Die lewenslyn wat hom van suurstof en voedingstowwe voorsien het, is nie meer daar nie. As hy wil oorleef, moet hy begin om self asem te haal en voedingstowwe in te neem. Hy het iemand nodig om hom te voed en na sy ander fisiese behoeftes om te sien.

Die pasgebore baba moet ook verstandelik, emosioneel en geestelik ontwikkel. Iemand moet die kleintjie dus versorg. Wie is in die beste posisie om dit te doen? Wat het die baba van sy ouers nodig? Hoe kan daar op die beste manier in hierdie behoeftes voorsien word? Die volgende artikels sal hierdie vrae beantwoord.