Plante—’n Waardevolle bron van medisyne
Deskundiges skat dat ’n kwart van al die moderne farmaseutiese geneesmiddels waarop mense staatmaak hulle oorsprong—ten volle of ten dele—het in chemikalieë wat in plante voorkom. Hierdie feit word dikwels aangehaal deur diegene wat verskillende kruiemiddels aanbeveel.
Die meeste navorsing wat op geneeskragtige plante gedoen word, is daarop gerig om aktiewe verbindings te isoleer. ’n Vername voorbeeld van so ’n verbinding is aspirien—afkomstig van salisien wat in die bas van die witwilgerboom gevind word.
Aktiewe verbindings wat in ’n plant voorkom, kan in ’n voldoende en akkurater dosis toegedien word as hulle geïsoleer is. Een naslaanwerk sê: “Om genoeg wilgerboombas te neem om die voordele van aspirien te verkry of om genoeg vingerhoedjieblare te neem om by die volle lewensreddende uitwerking van digitalis baat te vind, word baie makliker bereik deur ’n pil te drink as om natuurlike middels te gebruik.”
Aan die ander kant kan dit nadelig wees om die aktiewe verbindings van ’n geneeskragtige plant te isoleer. Een nadeel is dat enige voedings- en moontlike geneeskundige waarde wat deur ander stowwe in die plant verskaf word, verlore kan gaan. Daarbenewens het sommige van die organismes wat siekte veroorsaak, bestand geword teen die geneesmiddels wat gebruik word om hulle te beveg.
Kinien, ’n stof wat van die bas van kinabome berei word, is ’n voorbeeld van die nadele wat dit kan inhou om die aktiewe verbinding van ’n geneeskragtige plant te isoleer. Hoewel kinien ’n groot persentasie van die parasiete doodmaak wat malaria veroorsaak, vermeerder dié wat nie doodgemaak word nie namate die ander sterf. Een naslaanwerk verduidelik: “Sulke weerstand het ’n groot rede tot kommer in die geneeskunde geword.”
[Prente op bladsy 15]
Die witwilgerboom, waarvan aspirien verkry word
[Erkenning]
USDA-NRCS PLANTS Database/Herman, D.E. et al. 1996. North Dakota tree handbook
[Prente op bladsy 15]
Die kinaboom, waarvan kinien verkry word
[Erkenning]
Courtesy of Satoru Yoshimoto