Van ons lesers

Om te leer Ek is ’n onderwyseres, en ek het so pas die voorbladreeks “Jonk of oud—Jy kan genot daaruit put om te leer” (8 Augustus 2004) klaar gelees. Ek vra my dikwels af hoe julle dit regkry om artikels te skryf wat so bondig, so duidelik en so prakties is. Ek waardeer werklik die geesdrif waarmee julle mense van alle ouderdomme aanmoedig om te leer.

F. S., Italië

Toe ek halfpad deur hoërskool was, was ek so ongelukkig op skool dat my ouers my toegelaat het om op my eie te leer deur middel van tuisonderrigting. Ek is nou 20 jaar oud, en ek is bly dat ek dit weer eens geniet om te leer. Toe ek hierdie reeks lees, het dit my daaraan herinner dat alle mense dit kan geniet om te leer, ongeag hulle omstandighede.

N. G., Verenigde State

Ek sukkel met my oudste seun wat sewe jaar oud is. Hy geniet dit glad nie om boeke te lees, skoolwerk te doen of by Christelike vergaderinge te leer nie. Ek is van plan om die wenke in hierdie artikels toe te pas.

M. O., Japan

Een van die wenke in die artikel was om kort hersienings ná studiesessies te doen, omdat dit maklik is om dinge te vergeet wat kort tevore geleer is. Ek en my vrou leer Hindi om ons in ons bediening in die Indiese gemeenskap te help. Ek vind dit nuttig om nuwe woorde op ’n stuk papier te skryf. Later, wanneer ek ook al ’n tydjie het, kyk ek na daardie woorde. Dit help my om dit wat ek kort tevore geleer het, in my verstand in te skerp.

E. T., Verenigde State

Ek is 56 jaar oud, en ’n gebaretaalgroep is in ons gemeente gestig. Hoewel my vermoë beperk is, het ek by die groep aangesluit omdat ek hulle wou help. Net toe ek begin twyfel het of ek regtig gebaretaal sal kan leer, het ek hierdie artikels gelees. Die inligting onder die tussenhofie “Jy is nooit te oud om te leer nie” asook die laaste artikel het my werklik aangemoedig. Dit het my weer moed gegee om teen my eie pas voort te gaan en met die gebaretaalgroep vol te hou.

R. N., Japan

Glanstydskrifte Ek wil net vir julle vertel hoe interessant ek die artikel “Glanstydskrifte—‘Tel my op en koop my!’” (8 Augustus 2004) gevind het. Ek het nooit besef hoe hierdie tydskrifte iemand kan beïnvloed nie. Ek het gehou van die punt dat “’n denkbeeldige intimiteit”—as ’n mens ’n gesig ken sonder dat jy ooit die persoon ontmoet het—mense se emosies kan opwek oor die dood van iemand wat hulle nog nooit ontmoet het nie. Ek was eenkeer die slagoffer van so iets! My dogter stel nou in sekere tydskrifte belang. Ek en sy sal hierdie artikel saam bespreek.

S. M., Verenigde State

Voorkoms Dankie vir die artikel “Wanneer besorgdheid oor jou voorkoms ’n obsessie raak” (22 Julie 2004). Dit was asof dit net vir my geskryf is. Ek is 19 jaar oud, en ek ly ongelukkig al ’n geruime tyd aan eetversteurings. Dit is nie maklik om hierdie siekte te genees nie. Dankie vir artikels oor sulke onderwerpe. Dit laat my ernstig oor die saak nadink, en ek hoop dat dit my sal help om my probleem op te los.

G. L., Italië

Blokkiesraaisels Dankie vir die lekker blokkiesraaisels. Dit help my om Jehovah God en die Bybel beter te leer ken. Ek is nege jaar oud.

I. C., Duitsland

“Ontwaak!” antwoord: Die Bybelvasvra “Het jy geweet?” verskyn in sekere taaluitgawes van die “Ontwaak!” wat nie ’n blokkiesraaisel bevat nie.