Van ons lesers
Bedrog Julle sal nooit weet hoeveel ek die reeks “Beskerm jou teen bedrog” (22 Julie 2004) waardeer het nie. Ek bestuur ’n klein besigheid van my huis af, en ek was ’n slagoffer van bedrog. Die gevoelens wat ek ervaar het, was net soos dié wat in die reeks beskryf is—skaamte, skuldgevoelens en verleentheid omdat ek so onverstandig was. Ek het gedoen presies wat die artikels voorgestel het. Ek het my fout erken, tot Jehovah gebid en met ’n ouer man gesels wat my vriend is. Met behulp van hierdie artikels kon ek daarvan vergeet. Wat ’n verligting was dit tog!
T. G., Verenigde State
Voorhuwelikse seks Die artikel “Jongmense vra . . . Wat is so verkeerd met voorhuwelikse seks?” (22 Julie 2004) was vir my ’n bron van krag. Die gedagtes van jongmense wat in die artikel aangehaal is, is soortgelyk aan dié wat ek al gehad het. Ek is veral diep getref deur die woorde van Psalm 84:11, wat vir ons sê dat Jehovah niks goeds sal terughou van dié wat in onberispelikheid wandel nie.
T. U., Duitsland
As jongmens het ek nog altyd my bes gedoen om kuis te bly in Jehovah se oë, maar dit is partykeer moeilik. Hierdie artikel het my vasbeslote gemaak om kuis te bly en het my daaraan herinner dat ek nie die enigste een is wat te staan kom voor druk van Satan se wêreld nie. Die wete dat Jehovah soveel vir jongmense omgee, is werklik bemoedigend.
F. B., Botswana
Voorkoms Ek wil dankie sê vir die artikel “Wanneer besorgdheid oor jou voorkoms ’n obsessie raak” (22 Julie 2004). Ek is 21 jaar oud, en ek was werklik baie bewus van die feit dat ek groter as ander mense gebou is. Maar nou wil ek meer aandag skenk aan die skoonheid van die innerlike mens. Dit is asof die artikel vir my geskryf is!
N. U., Japan
Ongelukkig word ons vandag wysgemaak dat ons die volmaakte liggaam moet hê. Dit is partykeer ’n stryd, en ek is dikwels neerslagtig omdat ek nie die stryd wen nie. Maar ek wil daaraan bly werk, en hierdie artikel het my baie gehelp!
D. P., Duitsland
Post-polio-sindroom (PPS) Dankie vir die ondervinding van Jack Meintsma in die artikel “’n Siekte met ’n dubbele slag” (22 Julie 2004). Ek ly al die afgelope 23 jaar aan poliartritis, maar het simptome soortgelyk aan dié wat in die artikel genoem word. Ek wil broer Meintsma bedank vir die inligting oor nuttige toestelle en dat aangetaste spiere minder gebruik moet word.
U. K., Oostenryk
Ek het polio gehad toe ek twee en ’n half jaar oud was en PPS op 25. Die dokters was nie vertroud met hierdie sindroom nie, en hulle kon dit nie maklik diagnoseer nie. Voordat ek hierdie artikel gelees het, het ek nog nooit sulke omvattende inligting oor hierdie onderwerp teëgekom nie.
J. E., Frankryk
My ma het poliomiëlitis gekry toe sy ses jaar oud was. Die akkurate beskrywing van die siekte het my gehelp om haar toestand te verstaan.
T. V., Italië
Ek het polio gehad toe ek 18 maande oud was, en ek is nie naastenby so erg soos broer Meintsma aangetas nie. Maar ek is effens afgemat as gevolg van swak spiere. Die artikel het my help verstaan hoe ek my energie kan spaar. Wat my die meeste gehelp het, was om te lees dat Jehovah sien en omgee!
L. J., Verenigde State