’n Stryd teen velkanker
DIE 51-jarige Jeremiah is ’n Australiër van Ierse herkoms, met vlamrooi hare en ’n melkwit vel, wat party beskryf as die “Keltiese vloek”. Hy sê: “Soos die meeste Australiërs was ons gesin dikwels in die buitelug, veral oor naweke en gedurende somervakansies. Ek het as kind ure lank in die swembad in ons agterplaas deurgebring of branderplank gery en krieket gespeel op die strande van die Goue Kus, suid van Brisbane. Ek het gewoonlik net ’n swembroek gedra.”
Jeremiah sê verder: “Tot my vroeë tienerjare was daar nie doeltreffende sonskermmiddels beskikbaar nie. In daardie dae het advertensies mense oor die algemeen aangemoedig om kokosneut-sonbruinolie te gebruik om soos die Australiese beeld van die gebronsde lewensredder te lyk. Destyds het ons nie besef hoe skadelik die son vir ’n mens se vel kan wees nie. Dit was eers nadat ek herhaalde kere die pyn van ernstige sonbrand verduur het, dat ek besluit het om vir my eie behoud oormatige blootstelling aan die son te vermy.” Maar die skade was reeds aangerig. “Die gevolg van al daardie jare wat ek met ’n kaal bolyf rondgeloop het, was ’n hele klomp moesies, wat donkerder en dikker begin word het, veral op my bors.”
Sedertdien het Jeremiah drie melanome sowel as talle basaalselkarsinome laat verwyder. Daarom het hy sy roetine verander. Hy sê: “Elke dag, voordat ek by die deur uitstap, smeer ek ’n vogroom aan. Bo-oor dit smeer ek ’n sonskerm aan. Nou dra ek in die somer omtrent elke dag tussen 09:00 en 16:00 ’n hoed of ’n pet.” Hy besoek ook elke drie maande ’n dermatoloog.
Jeremiah verduidelik wat hom gehelp het om sy beproewing te verduur: “Jehovah God het my die opregte oortuiging gegee dat ek kan herstel, al het ander gedink dat ek enige tyd kan sterf. Wanneer party die lewensverwagting van talle melanoomlyers van net 20 jaar gelede in ag neem, beskou hulle my as ’n lewende dooie. Ek het persoonlik die betekenis van koning Dawid se woorde ondervind: ‘Jehovah sal [my] op ’n siekbed onderskraag; [my] hele bed sal u beslis gedurende [my] siekte verander.’”—Psalm 41:3.
Iemand anders wat ’n stryd teen velkanker voer, is Maxine. Toe sy jonk was, is Maxine, wat ’n ligte vel het, na die trope gestuur as ’n sendeling, eers na die Dominikaanse Republiek en later na Puerto Rico. Twintig jaar lank het haar werk as ’n sendeling vereis dat sy die grootste deel van die dag van huis tot huis in die son deurbring. Daarbenewens het sy dit geniet om in haar vrye tyd in die son te lê. In 1971 is ’n basaalselkarsinoom op haar gesig ontdek. Sy het radiumbehandelings ontvang en toe chirurgie ondergaan, gevolg deur veloorplantings om die skade te herstel. Die kankerselle het egter bly terugkom.
Maxine verduidelik: “Die probleem was dat besmette selle dikwels nie opgespoor is nie, en dit het dus bly groei. Dit was ’n lang en stresvolle tyd—ek besoek al ongeveer 30 jaar lank dokters, klinieke en hospitale. Ek het reeds tien operasies op my gesig ondergaan, buiten heelwat besoeke aan die kliniek om die kanker op ander maniere te behandel.” Die onlangsste behandeling wat die 80-jarige Maxine ondergaan het, is Mohs-chirurgie, wat met groter sukses van die kankerselle ontslae geraak het.
Weens haar terugkerende velkanker moes Maxine aanpassings in haar sendingdiens maak, en sy doen dus die predikingswerk in die aand om die son te vermy. Wat het Maxine gehelp om met velkanker saam te leef? “’n Positiewe gesindheid is belangrik. Ek weet dat kankerselle sal bly verskyn en dat ek weer die dokter sal moet besoek. Ek aanvaar dit. Ek probeer om nie myself te bejammer of oor my beproewinge te kla nie. Dit beroof my nie van my vreugde in die bediening nie. Ek kan nog steeds met ander praat oor Jehovah se Koninkryk. En ek het die hoop dat daar binnekort in die nuwe wêreld ’n permanente genesing sal wees. Dan sal ek ’n jong, volmaakte gesig hê.”
Ja, velkankerlyers en slagoffers van ander siektes kan uitsien na ’n tyd wanneer die woorde in die boek Job vervul sal word: “Laat sy vlees frisser word as in die jeug; laat hy terugkeer na die dae van sy jeugdige krag” (Job 33:25). Totdat daardie tyd aanbreek, laat ons bewus wees van die gevaar wat oormatige blootstelling aan die son inhou en laat ons ’n daadwerklike poging aanwend om ons vel te beskerm.
[Prente op bladsy 9]
Jeremiah het al ’n paar operasies gehad om velkanker te verwyder, waarvan drie vir melanome was. Tog bly hy positief en hoopvol
[Prente op bladsy 10]
“In die nuwe wêreld . . . sal ek ’n jong, volmaakte gesig hê.”—Maxine