Die Bybel se beskouing

Armageddon—Moet jy dit vrees?

WAT is “Armageddon”? Eenvoudig gestel, die term is van toepassing op die toestand of situasie waarin die heersers van die wêreld versamel word in opstand teen God en sy Koninkryk in die hande van Jesus Christus. In die Bybelboek Openbaring het die apostel Johannes ’n visioen gesien waarin die heersers versamel en stelling teen God inneem op ’n figuurlike plek wat Armageddon genoem word.

Die woord “Armageddon” kom net een keer in die Skrif voor, en tog word dit vandag algemeen as ’n metafoor gebruik. Die woord is al toegepas op rampe, groot en klein, van ’n kernslagting tot ’n rekenaarvirus. Verskeie blitsverkopers is gebaseer op die sogenaamde einde van die wêreld, die tydperk net voor Armageddon. ’n Romanreeks met hierdie tema het meer as 60 miljoen eksemplare oor die afgelope tien jaar verkoop.

Party mense vrees Armageddon. Hulle meen dat terroriste, oorlogsugtige nasies of rampe buite die mens se beheer ’n wêreldwye vernietiging sal veroorsaak, en dat die aarde daarna nie meer lewe sal kan onderhou nie. Ander glo dat God self op ’n vasgestelde tyd ons planeet en alles daarop in sy toorn gaan vernietig. Dit is inderdaad skrikwekkende vooruitsigte! Maar wat is die korrekte begrip van “die oorlog van die groot dag van God die Almagtige” by Armageddon?—Openbaring 16:14, 16.

Sal die aarde heeltemal verderf word?

Nie alle mense sal by Armageddon vernietig word nie. Hoe weet ons dit? Die Bybel verseker ons dat “Jehovah [weet] hoe om mense van godvrugtige toegewydheid uit beproewing te verlos, maar om onregverdige mense te bewaar vir die dag van die oordeel om uitgeroei te word” (2 Petrus 2:9). Ons kan dus vol vertroue wees dat God sy almagtige krag onder volmaakte beheer sal hou. Net diegene wat God se soewereiniteit teëstaan, sal by Armageddon sy toorn ervaar. Daar sal geen onskuldige slagoffers wees nie.—Psalm 2:2, 9; Genesis 18:23, 25.

Die Bybel sê vir ons dat God “die verderwers van die aarde [sal] verderf” (Openbaring 11:18). Dit is dus duidelik dat dit nie Jehovah God se voorneme is om ons planeet te vernietig nie. Hy sal eerder ontslae raak van die goddelose mensegemeenskap wat sy heerskappy teëstaan. Dit is in ooreenstemming met die presedent wat hy gestel het toe hy die Vloed van Noag se dag gebring het.—Genesis 6:11-14; 7:1; Matteus 24:37-39.

’n “Vreesinboesemende dag”

’n Aantal Bybelprofesieë oor die komende vernietiging is weliswaar angswekkend. Die profeet Joël het byvoorbeeld van “die groot en vreesinboesemende dag van Jehovah” gepraat (Joël 2:31). God se arsenaal bestaan uit sneeu, hael, aardbewings, aansteeklike siekte, oorstromende stortreën, vuur en swael wat neerreën, dodelike verwarring, weerlig en ’n plaag wat vlees laat verrot (Job 38:22, 23; Esegiël 38:14-23; Habakuk 3:10, 11; Sagaria 14:12, 13).a En die Bybel gee ’n beeldende beskrywing van ’n tyd wanneer die lyke van dié wat sal omkom, die oppervlak van die aarde sal bedek en soos mis op die grond sal wees of voedsel vir die voëls en ander diere sal wees (Jeremia 25:33, 34; Esegiël 39:17-20). Vrees sal God se vyande tydens hierdie oorlog oorval.—Openbaring 6:16, 17.

Beteken dit dat gehoorsame aanbidders van die ware God die verstommende gebeure wat tydens Armageddon sal plaasvind, moet vrees? Glad nie, want God se knegte op die aarde sal nie aan hierdie stryd deelneem nie. Bowendien sal hulle deur Jehovah beskerm word. Nietemin sal die vreesinboesemende vertoning van God se krag ware aanbidders met ontsag vervul.—Psalm 37:34; Spreuke 3:25, 26.

Dit is egter betekenisvol dat die apostel Johannes geïnspireer is om ons te verseker: “Gelukkig is elkeen wat die woorde van die profesie van hierdie boekrol bewaar”, en dit sluit die waarskuwing oor Armageddon in (Openbaring 1:3; 22:7). Kan enigiemand gelukkig wees as hy oor Armageddon peins? Hoe is dit moontlik?

God spoor mense tot optrede aan

Wanneer ’n hewige tifoon, of orkaan, ’n plek nader, gee die plaaslike owerheid lewensreddende waarskuwings. Om seker te maak dat almal die waarskuwing hoor, sal die polisie moontlik selfs uitgestuur word met waarskuwingstelsels of van deur tot deur gestuur word. Die doel hiervan is nie om mense bang te maak nie, maar om hulle aan te spoor tot lewensreddende optrede. Skerpsinnige individue is dankbaar vir die waarskuwings, en diegene wat positief daarop reageer, is verheug dat hulle opgetree het.

Dit is dieselfde met God se waarskuwingsboodskap oor die naderende “stormwind” van Armageddon (Spreuke 10:25). Jehovah het besonderhede aangaande sy oorlog in sy geskrewe Woord voorsien. Sy begeerte is nie om mense bang te maak nie, maar om hulle deeglik te waarsku, sodat hulle tot berou kan kom en ’n doelgerigte poging sal aanwend om hom te dien (Sefanja 2:2, 3; 2 Petrus 3:9). Diegene wat hierdie stappe neem, sal geseën word met oorlewing. Ons hoef dus nie God se naderende oorlog te vrees nie. Ons kan eerder die toekoms tegemoetgaan met die vertroue dat ‘elkeen wat die naam van Jehovah aanroep, veilig sal wegkom’.—Joël 2:32.

[Voetnoot]

[Prent op bladsy 12]

Wanneer ’n hewige storm nader, gee die plaaslike owerheid lewensreddende waarskuwings

[Prent op bladsy 13]

God se waarskuwingsboodskap oor Armageddon is ’n aansporing tot lewensreddende optrede