Armageddon—wanneer?

“ONS staan voor Armageddon en ons veg vir die Here.” Met daardie woorde het voormalige Amerikaanse president Theodore Roosevelt die term “Armageddon” op ’n politieke stryd toegepas waarin hy betrokke was. Moet ons Armageddon dus in die politieke arena soek?

’n Paar jaar gelede het die artikel “Ekonomiese Armageddon” in die Kanadese tydskrif Business Life verskyn. ’n Ondertitel het gevra: “Kan die Derde Wêreld se wanbetaling van skuld ons ekonomiese ineenstorting veroorsaak?” Maar moet ons aan Armageddon as ’n finansiële ramp dink?

Volgens die tydskrif Newsweek het die einde van die wêreld in 1984 ’n veldtoggeskil tydens ’n presidensiële debat geword. By daardie geleentheid is destydse Amerikaanse president Ronald Reagan “gevra of hy werklik glo dat die wêreld op ’n ‘kern-Armageddon’ afstuur. Reagan het erken dat hulle ‘filosofiese besprekings’ gehou het oor die ooreenkoms tussen huidige gebeure en Bybelse tekens wat die laaste dae voorspel het, maar die opperbevelhebber het volgehou dat hy nooit gesê het dat ‘ons volgens Armageddon moet beplan’ nie.” Maar moet ons ons ondersoek na die betekenis van Armageddon toespits op militêre optrede wat dreig om ’n kernslagting te veroorsaak?

Talle godsdienstige mense sê dat Armageddon ’n veldslag is. Maar vroeg in die 19de eeu het Bybelgeleerde Adam Clarke geskryf: “Hoe belaglik was mense se gissings oor hierdie punt tog! Volgens ons kortsigtige sieners en selfgeïnspireerde profete het hierdie veldslag in die afgelope twintig jaar op verskillende plekke plaasgevind? Eers was dit Austerlitz, toe was dit Moskou, toe was dit Leipzig, en nou is dit Waterloo! En so het hulle aangegaan, en sal hulle aangaan, om te verbyster en self verbyster te word.”

Die ondersoek na die betekenis van Armageddon laat ongetwyfeld ’n aantal lewensbelangrike vrae ontstaan. Wat is Armageddon? Wie sal daarin veg as dit ’n veldslag is? Waarom sal dit gevoer word? Waar sal dit plaasvind? En wánneer sal Armageddon plaasvind?

Wat is Armageddon?

Die term “Armageddon” word afgelei van ’n woord wat in die Bybelboek Openbaring, bekend vir sy simboliese taal, gevind word. Daarin het die apostel Johannes geskryf: “Ek het uit die bek van die draak en uit die bek van die dier en uit die mond van die valse profeet drie onreine geeste soos paddas sien kom. Want dit is geeste van duiwels [“uitinge wat deur demone geïnspireer is”, NW] wat tekens doen, wat uitgaan na die konings van die aarde en die hele wêreld, om hulle te versamel vir die oorlog van daardie groot dag van die almagtige God. . . . En hulle het hul versamel op die plek wat in Hebreeus genoem word Armageddon.”—Openbaring 16:13-16.

Armageddon, of Har–Magedon, is a transliterasie van die Griekse ekwivalent van die Hebreeuse uitdrukking Har Meghid·dohnʹ, wat “Berg van Megiddo” of “Berg van Troepemagte” beteken. Dit word met “die oorlog van daardie groot dag van die almagtige God” gekoppel. Armageddon is dus nie ’n politieke skermutseling, ’n ekonomiese ramp, ’n kernslagting of ’n menslike botsing nie. Armageddon is eerder God se oorlog.

Wie sal daarin veg?

Die drie onrein, padda-agtige geïnspireerde uitinge kom uit die monde van die draak (Satan die Duiwel), die wilde dier (sy aardse politieke stelsel), en die Anglo-Amerikaanse valse profeet. Hierdie uitinge wat geïnspireer is deur demone, of goddelose engele, versamel die aardse konings, of heersers, na Har–Magedon.—Sien hoofstuk 32 van die boek Openbaring—Sy groot klimaks is ophande!, gepubliseer deur die Watchtower Bible and Tract Society of New York, Inc.

Aan Jehovah se kant in die oorlog van Armageddon is ’n ontsaglike leër onsigbare geesmagte wat deur die Koning Jesus Christus aangevoer word. Die apostel Johannes het vertel: “Ek het die hemel geopend gesien; en daar was ’n wit perd, en Hy [Jesus] wat daarop sit, word genoem Getrou en Waaragtig, en Hy oordeel en voer oorlog in geregtigheid. . . . En die leërs in die hemel het Hom gevolg . . . En uit sy mond gaan daar ’n skerp swaard om die nasies daarmee te slaan; en hy sal hulle met ’n ysterstaf regeer, en hy trap die parskuip van die wyn van die grimmigheid en van die toorn van God, die Almagtige. En Hy dra op sy kleed en op sy heup die Naam wat geskrywe is: Die Koning van die konings en die Here van die here” (Openbaring 19:11-16). Die skerp lang swaard verteenwoordig Christus se gesag om die teregstelling te gelas van almal wat weier om God se Koninkryk te ondersteun (Openbaring 1:16; 2:16). Enorme onsigbare strydmagte is vir die oorlog van Armageddon beskikbaar.

Die teenstanders is Satan, sy demonleërs en die konings van die hele bewoonde aarde. Maar ons moet nie net aan wêreldheersers in die sigbare ryk dink nie, want die mense oor wie hulle regeer, is ook daarby betrokke. Daar is voorspel: “Die toorn van die HERE is oor al die nasies, en grimmigheid oor al hulle leërskare.”—Jesaja 34:2.

Waarom sal dit gevoer word?

Armageddon sal geveg word omdat God regverdig is en boosheid nie langer sal duld nie (Psalm 11:7). Satan die Duiwel se organisasie, wat bestaan uit demone sowel as opstandige mense en wat verantwoordelik was vir millenniums van goddeloosheid en weë, moet dus vernietig word. (Vergelyk Genesis 3:15.) Jehovah se universele soewereiniteit sal geregverdig word by Armageddon, en daardie oorlog sal sy naam reinig van al die smaad wat dit deur die eeue heen aangedoen is. Soos God deur sy profeet Esegiël gesê het: “Ek sal my heilige Naam nie meer laat ontheilig nie; en die nasies sal weet dat Ek die HERE [“Jehovah”, NW] is.”—Esegiël 39:7.

God se oorlog van Armageddon sal in werklikheid verhoed dat die hele mensdom vernietig word. Jehovah het die aarde geskep om bewoon te word, nie om deur ’n termonukleêre oorlog tussen mense vernietig te word of andersins ongeskik vir lewe gemaak te word nie (Jesaja 45:18). Hy sal “die verderwers van die aarde verderf” (Openbaring 11:18). Maar die psalmis het gesê: “Die HERE is Koning! Ook staan die wêreld [Hebreeus, te·velʹ; die aarde, as vrugbaar en bewoon, die bewoonbare aardbol] vas, sodat dit nie wankel nie.”—Psalm 96:10.

Wat God by Armageddon gaan doen, sal in volkome harmonie wees met sy hoofeienskappe—geregtigheid, wysheid, mag en liefde (Deuteronomium 32:4, vgl. NW; Job 12:13; Jesaja 40:26; 1 Johannes 4:8). Hy sal teen “goddelose sondaars” optree, nie teen die regskapenes nie (Judas 14, 15). Net ‘die goddeloses sal aan die swaard oorgegee word’ (Jeremia 25:31). Dit sal die weg baan vir die herstelling van die Paradys ter vervulling van die goddelike voorneme met die aarde en die mensdom.—Lukas 23:43.

Waar sal dit plaasvind?

Aangesien die term “Armageddon” ontleen word aan ’n Hebreeuse uitdrukking wat “Berg van Megiddo” beteken, sal party dalk tot die slotsom kom dat hierdie oorlog op ’n baie hoë plek met daardie naam geveg sal word. Maar daar was nooit ’n berg met die naam Megiddo nie. Sowat 100 kilometer noordwes van Jerusalem was daar ’n heuweldorp, of stad, wat Megiddo genoem is, maar net ’n heuweltjie van omtrent 20 meter dui nou die plek aan.—Josua 17:11.

Daardie eertydse stad het op “die laagte van Megiddo” uitgekyk (2 Kronieke 35:22). Dit is van pas om Armageddon (of Har–Magedon) met daardie omgewing te assosieer, want dit was die terrein van beslissende oorloë. Dit is byvoorbeeld waar God rigter Barak gehelp het om Kanaänitiese koning Jabin en sy leërmag, onder aanvoering van Sisera, ’n verpletterende nederlaag toe te dien (Rigters 4:12-24; 5:19, 20). In daardie omgewing het Gideon en sy klein groepie manskappe die Midianiete totaal verslaan (Rigters 7:1–8:35). Dit is ook daar waar konings Ahasia en Josia gedood is.—2 Konings 9:27; 23:29, 30.

Dit is egter noemenswaardig dat hierdie laagte, wat ook die Esdraelon-vlakte genoem word, slegs 32 kilometer lank en aan die oostekant 29 kilometer wyd is. Die konings van die hele bewoonde aarde en hulle leërs sal nooit in so ’n klein plekkie inpas nie. Buitendien is nòg ’n heuweltjie (die heuwel van Megiddo), nòg ’n laagte ’n berg. Dit is dus duidelik dat Armageddon nie beperk sal word tot ’n bergagtige gebied in die Midde-Ooste nie. Armageddon (of Har–Magedon) is eerder simbolies van ’n wêreldsituasie, hoewel die betekenis daarvan gedeeltelik aan Megiddo en die gebeure in daardie omgewing ontleen is.

Wanneer sal Armageddon plaasvind?

Aangesien Megiddo in die land van God se eertydse volk was, hou die gebeure tydens Armageddon verband met Jehovah se Getuies in hierdie “tyd van die einde” (Daniël 12:4). Har–Magedon is van toepassing op “die plek” waarheen die aarde se politieke heersers versamel word as teenstanders van Jehovah en sy Koninkryk in die hande van Jesus Christus (Openbaring 16:14, 16). Maar daardie “plek” (Grieks, toʹpos) dui ’n wêreldsituasie aan. Armageddon sal plaasvind wanneer ’n sekere situasie ontwikkel wat alle Getuies van Jehovah in die wêreld raak.

Die geestelike voorspoed van Jehovah se Getuies vertoorn Satan die Duiwel, wat binnekort ’n hewige aanval teen hierdie oënskynlik weerlose Christene sal rig. Hierdie wêreldwye aanval deur Satan, of Gog, word in Esegiël hoofstukke 38 en 39 beskryf. Onder die Duiwel se invloed sal die nasies optrek teen Jehovah se vredeliewende volk wat uit alle nasies versamel is. Ja, sataniese teenstand sal geopenbaar word deur wêreldwye optrede teen Jehovah se aardse knegte, die sigbare verteenwoordigers en verkondigers van God se Koninkryk.

’n Veldslag word dikwels geken aan die plek waar dit geveg word. Daarom kan God se magtige verdediging van sy volk die veldslag, of oorlog, van Armageddon genoem word. Wanneer Jehovah optree om sy knegte teen Gog se aanval te verdedig, sal Armageddon ontketen wees! Menseregerings sal in duie stort. Oorstromende wolkbreuke, verwoestende haelstene, vuur en swawel uit die hemel, onkeerbare pessiektes—waarlik dade van God—sal wêreldpaniek buite die geledere van Jehovah se Getuies veroorsaak. Hulle mensevyande sal hulle wapens teen hulle eie geledere begin gebruik. En dié wat nie deur hierdie selfmoordende oorlog verdelg word nie, sal deur Jehovah vernietig word.—Esegiël 38:18-23; Daniël 2:44.

In verskrikking sal elke mens se hand teen sy naaste opgelig wees in ’n waansinnige maar vergeefse stryd om oorlewing (Sagaria 14:12, 13). “Die wat deur die HERE verslaan is, sal dié dag lê van die een einde van die aarde tot die ander einde van die aarde; hulle sal nie beklaag of versamel of begrawe word nie; hulle sal mis op die aarde wees” (Jeremia 25:33). Enige poging om neutraal te bly in God se oorlog sal jou jou lewe tydens Armageddon kos! En soos hierdie tydskrif al so dikwels skriftuurlik bewys het, sal die huidige geslag nie verbygaan voordat Armageddon plaasvind nie!—Mattheüs 24:21, 34.

Wat Armageddon tot stand sal bring

Armageddon sal die laaste spoor van Satan se aardse organisasie uitwis. Verder sal die Duiwel en sy demone in die afgrond gegooi word (Openbaring 20:1-3). Watter seëninge sal Jehovah se volk, die vreugdevolle oorlewendes van sy groot oorlog van Armageddon, dan tog ontvang! Hulle sal vreugdevol begin met heropbouingswerk wat die hele aarde in ’n paradys sonder besoedeling, pyn, droefheid, trane en die dood sal verander. (Openbaring 11:15, 18; 21:3, 4). En jy kan daar wees as jy die psalmis se woorde ter harte neem: “Wag op die HERE en hou sy weg, en Hy sal jou verhoog, om die aarde te besit; jy sal met welgevalle neersien op die uitroeiing van die goddelose mense” (Psalm 37:34). Ja, jy kan die oorlog van die groot dag van God die Almagtige belewe en ’n gelukkige oorlewende wees wanneer Armageddon toeslaan!

[Lokteks op bladsy 4]

Armageddon is nie ’n politieke skermutseling, ’n ekonomiese ramp, ’n kernslagting of ’n menslike botsing nie. Armageddon is God se oorlog

[Lokteks op bladsy 5]

God se oorlog van Armageddon sal verhoed dat die hele mensdom vernietig word

[Lokteks op bladsy 6]

Enige poging om neutraal te bly in God se oorlog sal jou jou lewe tydens Armageddon kos!

[Lokteks op bladsy 7]

“Terwyl al hierdie dinge dan vergaan, hoedanig moet julle nie wees in heilige wandel en godsvrug nie?—julle wat die koms van die dag van God verwag en verhaas.”—2 Petrus 3:11, 12