Armageddon​—Wat dit nie is nie

Jou bestemming is slegs ’n kort rit van Haifa af. Onder die bloedige Midde-Oosterse son snel jou motor suid van die kronkelende Kisonrivier voort tot waar die vallei vernou. Jy ry deur die nou gaping tussen die hoë Karmelreeks en die Galilese heuwels totdat die vallei skielik wyd en plat voor jou oopvou​—die vlakte van Esdralon. Jy ry met die suidekant van die vlakte langs wanneer jy ’n heuwel gewaar wat aan die bokant onnatuurlik plat is. Dit is waarna jy gesoek het! Die tel, of grondhoop, van Megiddo, die bron van die woord Armageddon.

ARMAGEDDON is in misterie en misvattings gehul. Daar is allerlei idees oor die betekenis van die woord. Die woord Armageddon is egter afgelei van Harmagedon, of Berg van Megiddo.a Dit is ’n Bybelse woord wat in Openbaring 16:16 aangetref word, waar ons lees: „En hulle het hul versamel op die plek wat in Hebreeus genoem word Armageddon.”

Wie word by Armageddon versamel en waarom? Openbaring 16:14 antwoord: „Die konings van die aarde en die hele wêreld” word versamel „vir die oorlog van daardie groot dag van die almagtige God”.

Daardie antwoord laat baie ander vrae ontstaan. Teen wie voer „die konings” oorlog en oor watter geskil? Waar sal hulle veg? Sal hulle kernwapens gebruik? Kan die oorlog afgewend word? Ja, wat is Armageddon?

Nie ’n letterlike plek nie

Armageddon kan nie ’n letterlike plek op aarde wees nie. Daar bestaan geen berg met daardie naam nie​—hoewel daar tot vandag toe ’n grondhoop is wat Megiddo heet. Die ware betekenis van Armageddon hou verband met oorloë wat in vergange tye in die omgewing van Megiddo gevoer is.

Megiddo is die plek waar van die hewigste en beslissendste veldslae in Midde-Oosterse geskiedenis plaasgevind het. Dit het alles gedurende die tweede millennium v.G.J. begin met Egiptiese koning Toetmoses III se verpletterende oorwinning oor Palestynse en Siriese heersers, en dit strek deur die eeue heen tot die jaar 1918 toe Britse veldmaarskalk Allenby die Turke verslaan het.

Maar wat vir Bybelstudente belangriker is, is dat Megiddo die terrein was waar die Israelitiese leër onder die aanvoering van rigter Barak ’n grootse oorwinning oor koning Jabin se magtige Kanaänitiese leër onder die leërowerste Sisera behaal het. Jehovah God het ingegryp en aan die Israeliete ’n klinkende oorwinning gegee.​—Rigters 4:7, 12-16, 23; 5:19-21.

Armageddon begin dus die vorm aanneem van ’n beslissende slag, met net een duidelike oorwinnaar.

Nie ’n oorlog tussen aardse nasies nie

Die geskilpunt rondom die slag van Armageddon​—wêreldheerskappy—​is vandag ’n belangrike kwessie. Maar hoewel twee strydende supermoondhede nou om wêreldoorheersing meeding, sal Armageddon nie ’n wêreldoorlog wees waarin hierdie twee moondhede met mekaar kragte meet nie. Die wêreld is weliswaar vandag in die duurste en waansinnigste wapenwedloop in die hele geskiedenis gewikkel, wat die volgende kommentaar van India Today ontlok het: „Dit alles stoot die planeet onverbiddelik tot aan die randjie van Armageddon​—die finale oorlog onder die nasies.” Maar Openbaring 16:14 toon dat „die konings van die aarde en die hele wêreld” ’n verenigde front vorm by „die oorlog van daardie groot dag van die almagtige God”.

Armageddon is derhalwe nie die mens se oorlog nie. Dit is God se oorlog. By Armageddon sal alle aardse nasies saam oorlog voer teen „die leërs in die hemel” onder die militêre bevel van die „Koning van die konings en die Here van die Here”, Christus Jesus. Hy is die regmatige heerser van die wêreld, want God het ook „alle dinge onder sy [Christus se] voete onderwerp”​—Openbaring 19:14, 16; Efesiërs 1:22.

Nie ’n kernslagting nie

Vir baie mense is kernoorlog so skrikwekkend dat hulle liewer nie daaraan wil dink nie. Veertig wetenskaplikes wat in 1983 ’n gesamentlike studie gedoen het, raam dat een derde tot die helfte van die totale wêreldbevolking onmiddellik sal sterf indien ’n volskaalse kernoorlog sou uitbreek. Hulle verslag, wat in die tydskrif Science gepubliseer is, voorspel ’n droewe toekoms vir die oorlewendes. Dit waarsku: „Enige grootskaalse kernoorlog tussen die supermoondhede sal waarskynlik tot aardwye omgewingsveranderinge lei wat ernstig genoeg sal wees om die meeste van die plante- en dierespesies op die Aarde uit te wis. In daardie geval kan die uitwissing van Homo sapiens nie uitgesluit word nie.”

Sal die almagtige God Jehovah so ’n gruwel toelaat? Nee! Hy het nie die aarde geskape „om woes te wees nie”, maar, soos hy ons verseker, „om bewoon te word” (Jesaja 45:18). By Armageddon sal God die verderwers van die aarde verderf; hy sal nie die aarde in ’n kernslagting verbrand nie.​—Openbaring 11:18.

Nie ’n volgehoue stryd tussen goed en kwaad nie

Sommige godsdiensleiers glo dat Armageddon ’n langdurige stryd tussen goed en kwaad is hetsy wêreldwyd of in die verstand. „Armageddon vind elke dag iewers in die wêreld plaas” sê een Bybelkommentaar. Hoe kan dit wees aangesien die Bybel beloof dat Armageddon die snelle ondergang van alle bose nasies en mense sal beteken? Christus as God se gesalfde Koning by Armageddon „sal hulle verpletter met ’n ysterstaf [en] sal hulle stukkend slaan soos ’n erdepot”​—Psalm 2:9; kyk ook Spreuke 2:21, 22; Openbaring 19:11-21.

Nie ’n ineenstorting van die wêreldekonomie nie

Die wêreld se magtigste regerings vrees dat indien die Derde Wêreld in gebreke bly om sy skuld te betaal‘ die wêreldekonomie in ’n „Ekonomiese Armageddon” gedompel kan word’ soos die tydskrif Business Life dit noem. ’n Ineenstorting van die wêreld se banke sal waarlik tragies wees maar dit sal nie Armageddon wees nie. Die Bybelse Armageddon is ’n wêreldsituasie waarby oorlog betrokke is, nie ekonomie nie. Die profeet Jeremia gee hierdie sterk bewoorde beskrywing daarvan: „Die HERE het ’n twis met die nasies‘ Hy hou gerig oor alle vlees. Die goddelose​—aan die swaard het Hy hulle oorgegee.”​—Jeremia 25:31.

Nie ’n oorlog in die Midde-Ooste nie

„Op die een of ander tydstip sal die laaste konflagrasie in die Midde-Ooste plaasvind”, preek wêreldberoemde evangelis Billy Graham. Hierin is hy dit met baie van sy godsdienskollegas eens. Graham glo ook dat Armageddon uitgestel kan word. „Ek dink dat die wêreld tans op Armageddon afstuur”, sê hy, „en dat ,tensy daar ’n geestelike ontwaking is en ons ons tot God keer’ die wêreld in hierdie dekade voor sy Armageddon te staan kan kom.”

Die landstreek Megiddo is gans en al te klein vir al „die konings van die aarde en hulle leërs” (Openbaring 19:19). Dit skakel beslis die fundamentalistiese leerstelling uit dat Armageddon ’n wêreldoorlog sal wees wat in die letterlike laagte van Megiddo sal plaasvind. Die profeet Jeremia toon dat Armageddon selfs „die agterhoeke van die aarde” sal bereik en dat die gesneuweldes „van die een einde van die aarde tot die ander einde van die aarde” sal lê.​—Jeremia 25:32, 33.

En aangesien Armageddon „die oorlog van daardie groot dag van die almagtige God” is, kan niemand dit verhinder nie. Daar is niks wat mense kan doen om dit uit te stel nie. Jehovah het ’n „vasgestelde tyd” bepaal vir hierdie slag om te begin. Dit sal „nie versuim nie”.​—Openbaring 16:14; 11:18; Habakuk 2:3.

Grondslag vir hoop

Mense wat geregtigheid liefhet hoef nie bang te wees vir Armageddon nie. Inteendeel, dit kan ’n grondslag vir hoop wees. Die Bybel sê: „Toe het ek die hemel geopend gesien; en daar was ’n wit perd en hy wat daarop sit word genoem Getrou en Waaragtig, en Hy oordeel en voer oorlog in geregtigheid” (Openbaring 19:11). Die slag van Armageddon sal die aarde reinig van alle goddeloosheid en die weg baan vir die herstel van regverdige toestande.​—Jesaja 11:4, 5.

Die stem van Jehovah se Getuies verkondig al meer as honderd jaar God se toekomstige oorwinning oor die verdorwe, eiesinnige regeerders van hierdie stelsel. Die Getuies het, veral sedert die jaar 1925, ’n duidelike begrip van wat Armageddon is en hulle weier om daaroor te swyg. Hulle begeerte is om mense te help om oorlewendes van Armageddon te word, nie slagoffers daarvan nie. Daarom spoor hulle almal wat horende ore het aan om ag te slaan op die advies van Joël 2:31, 32, wat praat van „die groot en deurlugtige dag van die HERE”’ en byvoeg: „Elkeen wat die Naam van die HERE aanroep, sal gered word.”

Maar sommige wonder miskien nog: Armageddon sal wel die hele wêreld omvat, maar sal dit in die Midde-Ooste begin? Hoe kan ’n God van liefde ’n Armageddon toelaat? Sal daar ná Armageddon ware vrede wees? Lees die volgende drie nommers van Die Wagtoring, wat hierdie vrae sal behandel.

[Voetnote]

[Venster op bladsy 6]

Wat is Armageddon?

Armageddon IS NIE . . .

♦ ’n letterlike plek nie

♦ ’n oorlog tussen nasies nie

♦ ’n kernslagting nie

♦ ’n ineenstorting van die wêreldekonomie nie

♦ ’n stryd tussen goed en kwaad nie

♦ ’n Midde-Oosterse konflik nie

Armageddon IS . . .

♦ die wêreldwye situasie waar alle aardse nasies teen God se Seun, Jesus Christus, en sy engeleleër te staan sal kom in „die oorlog van daardie groot dag van die almagtige God”

[Prent op bladsy 4]

[Prent op bladsy 7]

By Armageddon sal God se Koning, Christus Jesus, al die bose nasies met ’n ysterstaf verpletter en hulle stukkend slaan soos ’n erdepot.​—Psalm 2:9.