Wanneer oorlewing afhang van kamoeflering
DEUR ONTWAAK!-MEDEWERKER IN SPANJE
IN DIE insekwêreld hou elke dag twee groot uitdagings in: hoe om genoeg kos te vind en hoe om nie ander se kos te word nie. Insekte is smaaklike happies vir voëls, paddas en akkedisse. Vir baie insekte hang oorlewing daarvan af dat hulle met hulle omgewing saamsmelt.
Om dit te kan doen, beskik ’n aantal inseksoorte oor merkwaardige kamoefleervermoë. Hulle kamoeflering is baie doeltreffender as enige vermomming waarmee die mens al vorendag gekom het. Kyk na drie treffende voorbeelde.
● Dooieblaarskoenlappers. Die bruin onderkant van hulle vlerke lyk feitlik net soos ’n dooie blaar. Hulle boots die kleur sowel as die nerwe en die stingel van die blaar na. Die kamoeflering is so goed dat die skoenlappers op ’n groen blaar kan sit en presies soos ’n dooie blaar lyk wat van ’n boom afgeval het.
● Koringkrieke, of langhoringsprinkane. Baie koringkrieke oorleef, nie deur dooie blare na te boots nie, maar eerder groen blare. “Die ooreenkoms is nie net in vorm en kleur nie: dit sluit ook die patroon van die nerwe en die swamvlekkies in”, verduidelik een bron. As jy mooi na die bygaande foto kyk, sal jy die klein vlekkies op die insek se vlerk sien, wat die vermomming selfs realistieser maak.
● Boomspringers. Hierdie klein insekte word selde opgemerk. En hierin lê die sleutel tot hulle oorlewing—hulle smelt met die agtergrond saam deur ’n ry dorings na te boots. In hierdie geval lyk elke insek soos ’n doring, en ’n hele klomp boomspringers wat in ’n ry op ’n tak sit, gee die tak ’n doringagtige voorkoms. Eers as ’n mens dit van naderby bekyk, sal jy sien dat die “dorings” eintlik klein boomspringers is.
Die verskeidenheid kamoeflerings wat insekte gebruik, is byna net so merkwaardig soos die akkuraatheid daarvan. ’n Ruspe uit Costa Rica lyk net soos voëlmis, terwyl stokinsekte, ja, jy het reg geraai, net soos stokkies lyk. Daar is ’n sprinkaan in Suid-Afrika wat amper soos ’n klip lyk, en ’n insek in Israel boots die blomplant waarvan hy leef, volmaak na.
Watter vorm die kamoeflering ook al aanneem, dit beskerm die insek en gee ons ’n fassinerende kykie in die verstommende verskeidenheid wat in die skepping gevind word.
[Prent op bladsy 22]
’n Stokinsek
[Prent op bladsy 23]
’n Dooieblaarskoenlapper
[Erkenning]
Zoo, Santillana del Mar, Cantabria, España
[Prent op bladsy 23]
Boomspringers
[Prent op bladsy 23]
’n Koringkriek
[Prent op bladsy 23]
’n Ruspe wat soos voëlmis lyk
[Erkenning]
© Gregory G. Dimijian/Photo Researchers