Kitskos vir insekte

● Insekte smul graag aan kalorieryke kitsmaaltye. ’n Blomkop is ’n gerieflike bron. Soos kitskosrestaurante adverteer blomme hulle teenwoordigheid met helder kleure. Dit lok insekte, wat dan op die blomme gaan sit, waar hulle aan die stuifmeel kan smul of die nektar kan opsuig.

Omdat insekte ná ’n koel nag nogal traag is, het hierdie koudbloedige diertjies die son se energie nodig om aan die gang te kom. Talle blomme bied insekte ’n volledige pakket—voedsame kos en ’n plekkie om in die son te bak. Kom ons kyk na ’n bekende voorbeeld.

Die witmagriet is ’n algemene blom wat regoor Europa en Noord-Amerika voorkom. Dit lyk dalk nie juis besonders nie, maar as jy die tyd neem om dit te ondersoek, sal jy sien dat daar groot bedrywigheid is. Hierdie magriet bied ’n ideale plek vir insekte om die dag te begin. Die wit blomblare weerkaats die son se hitte, en die geel hartjie bied ’n goeie rusplek waar insekte die son se energie kan absorbeer.a

Om die besoek selfs aanlokliker te maak, is die hartjie van die magriet vol stuifmeel en nektar, voedsame kos waarop baie insekte floreer. Watter beter plek kan ’n insek vind om ’n goeie ontbyt en die son te geniet?

Deur die loop van die dag word die witmagriete dus deur ’n magdom insekte besoek. Jy sal moontlik kewers, kleurvolle skoenlappers, stinkbesies, krieke en allerhande vlieë sien. Maar as jy nie oplettend is nie, sal jy dalk nooit hierdie fassinerende “kitskosrestaurante” vir insekte raaksien nie.

Wanneer jy dus weer in die natuur kom, kan jy gerus ’n poging aanwend om party van hierdie onopvallende magriet-ekosisteme van naderby te bekyk. As jy dit doen, sal die ondervinding waarskynlik jou waardering vergroot vir die Skepper wat dit alles ontwerp het.

[Voetnoot]